سۋرەت: ru.freepik.com
- قىتايدىڭ حاربين قالاسىندا ازيا وليمپيالىق كەڭەسى وكىلدەرىنىڭ قاتىسۋىمەن 2025 جىلى الاۋى تۇتاناتىن قىسقى ازيا ويىندارىنا دايىندىق بارىسى جايىندا سەمينار ءوتتى. بۇل ءىس-شاراعا ەلىمىزدىڭ سپورت دەپارتامەنتىنىڭ ديرەكتورى بەكتۇر قياتباي, حالىقارالىق قاتىناستار دەپارتامەنتىنىڭ باس مەنەدجەرى ايزات قاراشاشەۆ قاتىستى. سەميناردان بولەك ۇوك قىزمەتكەرلەرى جەكە كەزدەسۋ وتكىزىپ, وندا ۇيىمداستىرۋعا قاتىستى مەرزىم, لوگيستيكا, تۇراتىن جەرلەردىڭ جاعدايى, جۇك تاسىمالداۋ, سپورتتىق جابدىقتاردى راسىمدەۋ, تاعى باسقا ماسەلەلەرى تالقىلاندى.
- الماتى وبلىسى اۋماعىندا ستەند اتۋدان وتكەن ازيا كۋبوگى جولىنداعى جارىستا ەل قۇراماسى 14 جۇلدەگە قول جەتكىزدى. ونىڭ التاۋى – التىن. جەكەلەگەن سايىستاردا اسەم ورىنباي, ەدۋارد ەششەنكو, نيكيتا مويسەەۆكە تەڭ كەلەر ەشكىم تابىلمادى. سونداي-اق كوماندالىق باسەكەدە ەلىمىزدىڭ ەرلەر (داۆيد پوچيۆالوۆ, ەدۋارد ەششەنكو, يليا پەنكوۆ) مەن ايەلدەر (اسەم ورىنباي, زويا كراۆچەنكو, ادەل ساداقباەۆا) قۇراماسى دا توپ جاردى.
- تايپەيدە ساداق اتۋدان جاسوسپىرىمدەردىڭ ازيا بىرىنشىلىگىندە جەرلەستەرىمىز قوس قولا مەدالعا يە بولدى. ارالاس جۇپتار اراسىندا اندرەي تيۋتيۋن مەن ولگا نەجيۆىح, كوماندالىق جارىستا ولگا نەجيۆىح, اناستاسيا ەرشوۆا, كاميلا عازيزوۆا ءۇشىنشى ورىندى ەنشىلەدى.
- ەلىمىزدىڭ جاس تەننيسشىسى بەيبىت جۇقاەۆ شانحايداعى ATP 1000 سەرياسىنداعى ءتۋرنيردىڭ نەگىزگى بولىگىندە كۇش سىناسۋ قۇقىعىنا يە بولدى. ىرىكتەۋ سايىسىنىڭ فينالىندا ول ۇلىبريتانيالىق بيللي ءحارريستى 7:5, 2:6, 6:4 ەسەبىمەن قاپى قالدىردى. العاشقى اينالىمدا قانداسىمىز رومان سافيۋللينگە قارسى وينايدى. بەيبىتتەن بولەك, اتالعان دودادا قوس الەكساندر – بۋبليك پەن شەۆچەنكو دا ونەر كورسەتەدى.
- بۇل كۇندەرى فۋتبولدان ەلىمىزدىڭ جاسوسپىرىمدەر قۇراماسى (U-15) مينسكىدە جالاۋى جەلبىرەگەن «ۋەفا دامۋ تۋرنيرىندە» باق سىناپ جاتىر. تۇساۋكەسەر كەزدەسۋىندە رەسەيدەن 0:7 ەسەبىمەن ويسىراي ۇتىلعان وتانداستارىمىز كەلەسى ماتچتا بەلارۋسكە ەسە جىبەردى – 2:3. 4 قازاندا ءبىزدىڭ كوماندا ازەربايجانمەن شەبەرلىك بايقاسادى.
- 15 جەلتوقساندا ماسكەۋدە ارالاس جەكپە-جەكتەن ACA 182 ءتۋرنيرىنىڭ شىمىلدىعى تۇرىلەدى. باستى باسەكەلەردىڭ بىرىندە ەلىمىزدىڭ فايتەرى ارتەم «سپارتاك» رەزنيكوۆ (24-7, 18 كو) رەسەيلىك يۋسۋپ «بورز» (19-3, 13 كو) رايسوۆپەن كۇش سىناسادى. قوس سپورتشى وسىدان ءتورت جىل بۇرىن ءدال وسى پروموۋشەننىڭ تۋرنيرىندە ايقاستى. ول كەزدە جەرلەسىمىز تورەشىلەردىڭ شەشىمىمەن جەڭىسكە جەتتى.
- حالىقارالىق بياتلونشىلار وداعى (IBU) 2028, 2029 جىلدارداعى الەم چەمپيوناتتارىن قابىلدايتىن قالالاردى انىقتادى. بۇل باسەكەلەر اۋستريانىڭ حوحفيلتسەنى مەن نورۆەگيانىڭ وسلوسىندا وتەدى. ال 2025, 2027 جىلدارداعى دودا شۆەيتساريانىڭ لەنتسەرحايدەسى مەن ەستونيانىڭ وتەپياسىندا ۇيىمداستىرىلادى.
- الەمدەگى ەڭ قۇندى فۋتبولشىلار كوشىن ەرلينگ حولاند باستاپ تۇر. گەرمانيانىڭ «Transfermarkt» پورتالىنىڭ مالىمدەۋىنشە, نورۆەگيا ۇلتتىق قۇراماسى مەن انگليانىڭ «مانچەستەر سيتي» كلۋبى شابۋىلشىسىنىڭ قازىرگى كەزدەگى ترانسفەرلىك باعاسى – 200 ميلليون ەۋرو. ودان كەيىنگى ورىنداردا بۇل كۇندەرى ءمادريدتىڭ «رەالىنىڭ» نامىسىن قورعاپ جۇرگەن برازيليالىق ۆينيسيۋس جۋنيور, انگليالىق دجۋد بەللينگەم, فرانتسيالىق كيليان مباپپە تۇر. ولاردىڭ قۇنى – 180 ميلليون ەۋرو.
