وبلىستىڭ جاستار ساياساتى ماسەلەلەرى باسقارماسى جاستاردىڭ ءومىر ءسۇرۋ ساپاسىن جاقسارتۋ, ولاردىڭ قۇقىقتارىن قورعاۋ, الەۋمەتتىك-ەكونوميكالىق دامۋدى قولداۋعا قاتىستى ءتۇرلى باعدارلامالاردى اتقارىپ كەلەدى. الماتى وبلىسى جاستار ساياساتىنا ينۆەستيتسيا سالا وتىرىپ, جاستاردىڭ الەۋمەتتەنۋىنە, كاسىبي دامۋىنا, شىعارماشىلىق قابىلەتتەرىن اشۋعا باعىتتالعان ماڭىزدى جوبالاردى ءجىتى قولعا الىپ, جۇيەلى جۇزەگە اسىرادى.
«وبلىستا جاستاردىڭ ءبىلىمى مەن كاسىپتىك دايارلىعىن ارتتىرۋعا باعىتتالعان 41 جوعارى, ارنايى وقۋ ورنى جۇمىس ىستەيدى. كاسىپكەرلىككە باعىتتالعان «بيزنەس باستاۋ» جوباسى جاستاردى ءوز ءىسىن باستاۋعا ىنتالاندىرادى. شاعىن نەسيەلەۋ باعدارلامالارى ارقىلى 35 جاسقا دەيىنگى جاستارعا 5 ميلليون تەڭگەگە دەيىن قارىز بەرىلەدى. ەندى ءوڭىر جاستارىنا «الاتاۋ جاستارى» تۇرعىن ءۇي باعدارلاماسىنىڭ ارقاسىندا باسپانالى بولۋعا مۇمكىندىك تۋىپ وتىر», دەدى بريفينگتە ءسوز العان وبلىستىق جاستار ساياساتى ماسەلەلەرى باسقارماسىنىڭ باسشىسى ءمادي احمەتوۆ.
الماتى وبلىسىندا «وتباسى بانكىمەن» بىرلەسىپ «الاتاۋ جاستارى» تۇرعىن ءۇي باعدارلاماسىنىڭ ىسكە قوسىلاتىندىعى ءوڭىر جاستارىنا سەرپىن بەرەرى انىق. جوبا 35 جاسقا دەيىنگى (قوسا العاندا) وبلىستىڭ جاس تۇرعىندارىنا جەكە باسپانا ساتىپ الۋعا جەڭىلدەتىلگەن نەسيە الۋعا مۇمكىندىك بەرەدى.
«الاتاۋ جاستارى» باعدارلاماسى – جاستاردىڭ تۇرعىن ءۇي جاعدايىن جاقسارتۋعا جاسالعان قادام عانا ەمەس, جاس وتباسىلاردىڭ ءوز ءۇيى تۋرالى ارماندارىن جۇزەگە اسىرۋ مۇمكىندىگى. جىلجىمايتىن م ۇلىك باعاسىنىڭ ءوسۋىن ەسكەرە وتىرىپ, مۇنداي باستامالار ايماقتىڭ الەۋمەتتىك ساياساتىندا شەشۋشى ءرول اتقارادى. باعدارلامانى ىسكە قوسۋ جاستارعا تۇراقتىلىق پەن بولاشاققا دەگەن سەنىمدىلىكتى ارتتىرۋعا كومەكتەسەدى. باعدارلاماعا قاتىسۋ – جايلى ءۇي مەن جايلى ءومىر ءسۇرۋ جاعدايلارىن جاساۋ مۇمكىندىگى, بۇل اسىرەسە قازىرگى قوعام جاعدايىندا وتە ماڭىزدى», دەيدى «وتباسى بانك» اق الماتى وبلىستىق فيليالى ديرەكتورىنىڭ ورىنباسارى انار ەستيار.
«الاتاۋ جاستارى» باعدارلاماسىنىڭ شارتتارىنا سايكەس قاتىسۋشىلاردىڭ الماتى وبلىسىنداعى رەسمي جۇمىس ءوتىلى ءبىر جىلدان كەم بولماۋى ءتيىس. ونى مىندەتتى تۇردە زەينەتاقى جارنالارىنىڭ تۇراقتى ءتۇسىمى كورسەتىلگەن قۇجاتپەن راستاۋ قاجەت. سونداي-اق ءوتىنىش بەرۋشىنىڭ, ونىڭ وتباسى مۇشەلەرىنىڭ سوڭعى 5 جىلدا اتتارىنا تىركەلگەن جىلجىمايتىن م ۇلىكتەرى بولماۋى ءتيىس.
جاڭا تۇرعىن ءۇي باعدارلاماسىنا قاتىسۋ تۋرالى وتىنىشتەر 1-15 قازان ارالىعىندا قابىلدانادى. ۇمىتكەرلەر قوناەۆ قالاسى, 1 ش/ا, №41, «بايتەرەك» بو, 1 قابات, اكت زالى مەكەنجايىندا وبلىس اكىمدىگىنىڭ ىشكى ساياسات باسقارماسىنا ءوتىنىش بەرۋلەرى قاجەت.
وتىنىشتەردى قابىلداۋ اياقتالعاننان كەيىن اكىمدىكتەن ارنايى قۇرىلعان كوميسسيا جينالعان ۇپايلارىنا سايكەس باعدارلاماعا قاتىسۋشىلاردى ىرىكتەيدى.
ۇپايلار قالاي ەسەپتەلەدى؟
– جۇمىس ءوتىلى – 1 جىل جۇمىس ءوتىلى – 2 بالل, قالعان ءاربىر جىلعا
1 بالل (5 جىلعا دەيىنگى جۇمىس ءوتىلى ەسكەرىلەدى);
– وتباسىلىق جاعدايى – تىركەلگەن نەكە – 5 بالل, تۇرمىس قۇرماعاندار – 1 بالل;
– 18 جاسقا دەيىنگى بالالاردىڭ بولۋى – ءبىر بالا ءۇشىن – 2 بالل, ەكى, ودان دا كوپ بالا ءۇشىن – 1 بالل;
– مەملەكەتتىك قىزمەتشىلەر, بيۋدجەتتىك ۇيىمداردىڭ قىزمەتكەرلەرى – 5 بالل;
– جالدامالى پاتەردى وتەۋ تۋرالى كەلىسىمى بار بيۋدجەتتىك ۇيىمداردىڭ قىزمەتكەرلەرى (كوشىپ كەلگەن, قابىلدانعان مەملەكەتتىك قىزمەتشىلەر) –10 بالل;
– دەپوزيتىندە كەمى 500 مىڭ تەڭگە سالىمى بار بانك كليەنتتەرى – 2 بالل.
وتىنىشتەردى قابىلداۋ اياقتالعاننان كەيىن قاتىسۋشىلاردىڭ ءتىزىمى جاسالىپ, «وتباسى بانكىنە» جىبەرىلەدى. قاتىسۋشىلار جۇمىس كۇندەرى ساعات 10:00-18:00 دەيىن قاسكەلەڭ قالاسى, تولە بي كوشەسى 50/1 نەمەسە ىلە اۋدانى, وتەگەن باتىر اۋىلى, تيتوۆ 13ا مەكەنجايلارىنداعى «وتباسى بانكىنىڭ» بولىمشەلەرىندە تولەم قابىلەتتىلىگىن باعالاتۋلارى قاجەت. ىزىنشە ءوز كۇشتەرىمەن باسپانا تابۋلارى كەرەك. ونى ساتىپ الۋعا بانك 18 ملن تەڭگە نەسيە بەرەدى. ەگەر م ۇلىكتىڭ قۇنى 18 ملن تەڭگەدەن اساتىن بولسا, ۇمىتكەر ايىرماشىلىقتى ءوز قاراجاتى ەسەبىنەن تولەي الادى.
باعدارلاما قاتىسۋشىلارى باسپانانى العاشقى نارىقتان (پايدالانۋعا بەرىلگەن بولۋى ءتيىس), سونداي-اق ەكىنشى نارىقتان تۇرعىن ءۇي (پاتەر نەمەسە جەكە ءۇي) ساتىپ الا الادى.
العاشقى جارنا 10% قۇرايدى. نەسيەگە سىياقى مولشەرلەمەسى جىلدىق 6%-عا تەڭ (جتسم 6,2% باستاپ 6,8% دەيىن). نەسيەنىڭ مەرزىمى – 19 جىلعا دەيىن.
الماتى وبلىسى
