عالىمنىڭ «مەنشىك قاتىناستارىنىڭ قايتا قۇرىلۋى جانە ۇلتتىق مۇددەلەردى ىسكە اسىرۋ» اتتى ەڭبەگىن ماسكەۋ مەن تمد ورتالىق قالالارىنىڭ عىلىمي جۋرنالدارىندا جاريالادى. عالىمنىڭ جەتەكشىلىگىمەن باسقا دا عىلىمي دالدىگى جوعارى ۇسىنىستار مەن پىكىرلەر جازىلىپ جاتتى. بىراق مۇنى ەل ۇكىمەتىن سول جىلداردا باسقارعاندار قابىلدامادى, ونىڭ جازعاندارىنا جاۋاپ بەرىلمەدى. ويتكەنى ولار ءوزىمىزدىڭ جاعدايعا سايكەس وزگەشەلىكتەردى جاساۋ مۇمكىن ەمەس دەپ ويلادى. ءسويتىپ, عالىمدارىمىزدىڭ قاناتىن قىرقىپ, ولاردىڭ اقىل-ويلارىن كەرەك قىلماي, دامۋدى جەرگىلىكتى جاعدايعا سايكەس ەمەس جولمەن اكەتىپ, اقىرىندا ەكونوميكانى بارىنشا السىرەتتى.
اكادەميك امانجول قوشانوۆ سولتۇستىك قازاقستان وبلىسىنداعى القا-اعاش اۋىلىندا تۋعان. ول – ايگىلى شال اقىننىڭ كىندىگىنەن تارايتىن قوشان اقساقالدىڭ پەرزەنتى. اۋدان ورتالىعى مارەۆكا سەلوسىنداعى ورتا مەكتەپتى التىن مەدالعا بىتىرگەننەن كەيىن ماسكەۋدىڭ مەملەكەتتىك ۋنيۆەرسيتەتىنە تۇسەدى. ونى اياقتاعان سوڭ ەڭبەك جولىن 1957 جىلى اقتوبەنىڭ كووپەراتيۆتىك تەحنيكۋمىندا ساباق بەرۋدەن باستاپ, 2 جىلدان كەيىن عىلىم اكادەمياسى ەكونوميكا ينستيتۋتىنا اۋىسىپ, ءومىرىنىڭ سوڭىنا دەيىن وسى ورىندا قىزمەت ىستەپ, كىشى عىلىمي قىزمەتكەردەن ونىڭ ديرەكتورىنا دەيىنگى باسپالداقتاردان وتكەن. ول 400-دەن استام عىلىمي ەڭبەك جازعان, سونىڭ 38-ءى – مونوگرافيالار. 1979 جىلى دوكتورلىق ديسسەرتاتسيا قورعاپ, 1989 جىلى اكادەميك اتاعىن العان. عالىم 2004 جىلى «پاراسات» وردەنىمەن, 2014 جىلى ءىىى دارەجەلى «بارىس» وردەنىمەن, 2015 جىلى مەملەكەتتىك سىيلىق العان جانە كوپتەگەن مەدالمەن ماراپاتتالعان. ونىڭ ەڭبەكتەرى شەتەلدەردە دە جوعارى باعالانىپ, عالىمنىڭ ەسىمى الەمدىك ەنتسيكلوپەديالار مەن انىقتامالىقتارعا ەنگەن. امانجول قوشانوۆ – سولتۇستىك قازاقستان وبلىسىنىڭ جانە الماتى قالاسىنىڭ قۇرمەتتى ازاماتى.
جۋىردا قىزىلجار قالاسىندا «اكادەميك امانجول قوشانوۆ جانە قازاقستاننىڭ ەكونوميكالىق عىلىمى» اتتى عىلىمي-تەوريالىق كونفەرەنتسيا ءوتتى. بۇل ءىس-شارا مارقۇم عالىمنىڭ تۋعانىنا 90 جىلدىعىنا ارنالدى. وعان الماتىدان, استانادان كەلگەن عالىمدار, زيالى قاۋىم وكىلدەرى, عالىمنىڭ ەتجاقىن تۋىستارى قاتىستى. جيىن ۇلتتىق عىلىم اكادەمياسىنىڭ پرەزيدەنتى اقىلبەك كۇرىشباەۆتىڭ, سولتۇستىك قازاقستان وبلىسىنىڭ اكىمى عاۋەز نۇرمۇحامبەتوۆتىڭ قۇتتىقتاۋىمەن اشىلدى.
عالىمنىڭ قوساعى, بيولوگيا عىلىمدارىنىڭ كانديداتى راۋشان قوشانوۆا بايانداماسىندا جارىنىڭ ارحيۆىنەن جالپاق جۇرتقا بەلگىسىز بولىپ كەلگەن كوپتەگەن دەرەكتى تاپقانىن ايتتى. سونىڭ ىشىندە مارقۇمنىڭ «قايتا قۇرۋ» جىلدارىندا سولتۇستىك قازاقستاننىڭ ەكونوميكالىق دامۋى تۋرالى جاريالانباعان ەڭبەگى بولعان ەكەن. سونىمەن بىرگە ونىڭ قوعامدىق عىلىمداردىڭ بارىنە اتسالىسىپ, پىكىر ايتقانى تۋرالى باياندادى. «ول مىنەزى وتە جۇمساق, پاراساتتى جان ەدى. اسپيرانتتارىنىڭ جۇمىسىن بۇگە-شىگەسىنە دەيىن وقىپ, پايدالى پىكىرلەرىن ايتۋدان جالىقپايتىن. ونىڭ جەتەكشىلىگىمەن 16 دوكتورلىق ديسسەرتاتسيا قورعالدى. ول ەلىمىزدىڭ عىلىمىنا, ەكونوميكانىڭ دامۋىنا قاتتى الاڭدايتىن», دەدى راۋشان عافارقىزى. ءوزىنىڭ ىنىلەرى مەن قارىنداستارىنا ماماندىق تاڭداۋدا پايدالى كەڭەستەر بەرىپ, ولاردى ءوزىنىڭ سوڭىنان ەرمەي, باسقا سالالاردىڭ ماماندارى بولعانىن قالاعان ەكەن. سونىڭ ارقاسىندا ونىڭ ءىنىسى ينجەنەر-قۇرىلىسشى, ءبىر قارىنداسى دارىگەر, تاعى ءبىرى ساۋدا سالاسىنىڭ مامانى بولىپتى. راۋشان قوشانوۆا ءبىز جوعارىدا ايتقان ويىمىزدى ناقتىلاپ, عالىمنىڭ ۇزاق ۋاقىت بويى سارىلىپ, ۇزەڭگىلەستەرىمەن بىرگە نارىقتىق ەكونوميكاعا كوشۋدى زەرتتەپ, تۇجىرىمدارىن ۇكىمەتتىڭ قاراۋىنا تاپسىرعانىن, الايدا وعان جاۋاپ تا بەرىلمەگەنىن ايتتى. «تەك قازىر عانا ونىڭ وسى تۇجىرىمدارى تالقىلانىپ جاتىر», دەدى ول.
كونفەرەنتسيادا ەكونوميكا عىلىمدارىنىڭ دوكتورلارى ساۋلە قاليەۆا, اناتولي باشماكوۆ, تاريح عىلىمدارىنىڭ دوكتورى قادىر احمەتوۆ, پەداگوگيكا عىلىمدارىنىڭ دوكتورى ەڭلىك جۇماتاەۆا, عالىمنىڭ قىزى, ەكونوميكا عىلىمدارىنىڭ كانديداتى جانار قوشانوۆا جانە ت.ب. بايانداما جاسادى. امانجول قوشانوۆتىڭ ومىرىنەن سىر شەرتەتىن فوتوگرافيالار مەن ەڭبەكتەرىنەن تارتىمدى كورمە دە ۇيىمداستىرىلىپ, كورەرمەندەردىڭ كوزايىمى بولدى. كونفەرەنتسيانىڭ قارارىندا پەتروپاۆل قالاسىنىڭ ءبىر كوشەسى جانە جوعارى ەكونوميكالىق كوللەدج امانجول قوشانوۆ ەسىمىمەن اتالسىن دەگەن ۇسىنىس جاسالدى.
پەتروپاۆل
