فوتو: kursiv.media
مۇحتار ەرماننىڭ ايتۋىنشا, 30 مەملەكەتتىڭ, ونىڭ ىشىندە 4 ءىرى حالىقارالىق ۇيىمنىڭ اتىنان بارلىعى 177 بايقاۋشى اككرەديتتەلگەن.
«بۇگىنگى تاڭدا مونيتورينگكە قاتىساتىن حالىقارالىق ۇيىمداردىڭ قاتارىندا تاۋەلسىز مەملەكەتتەر دوستاستىعى, شانحاي ىنتىماقتاستىق ۇيىمى, تۇركى مەملەكەتتەرى ۇيىمى, ازياداعى ءوزارا ءىس-قيمىل جانە سەنىم شارالارى كەڭەسى بار. جالپى, رەسپۋبليكالىق رەفەرەندۋمدى باقىلاۋعا 30 شەت مەملەكەتتىڭ وكىلدەرى قاتىسادى», دەدى مۇحتار ەرمان.
سونىمەن قاتار سىرتقى ىستەر ءمينيسترىنىڭ ورىنباسارى رومان ۆاسيلەنكو سىرتقى ىستەر مينيسترلىگىندە الەمنىڭ 14 ەلىنەن 38 باق-تىڭ 162 شەتەلدىك ءجۋرناليسى تۇراقتى اككرەديتتەلگەنىن ايتتى.
«ولاردىڭ رەفەرەندۋمدى باقىلاۋعا قۇقىعى بار. بىراق 38 شەتەلدىك جۋرناليست تىكەلەي رەفەرەندۋمعا ۋاقىتشا اككرەديتاتسيا الدى. جالپى رەفەرەندۋمدى 37 ەلدەن 200 شەتەلدىك جۋرناليست باقىلايدى», دەپ ءتۇسىندىردى ول.
ال قىرعىزستان استاناسىندا قازاقستان رەسپۋبليكاسى ەلشىلىگى جانىنداعى سايلاۋ ۋچاسكەسىندە اەس قۇرىلىسى بويىنشا الداعى رەسپۋبليكالىق رەفەرەندۋمعا بەلسەندى دايىندىق جۇمىستارى جۇرگىزىلىپ جاتىر. تىزىمدە 300-دەن استام ەل ازاماتتارى بار ەكەنى حابارلاندى.
