فوتو: istockphoto.com
47 ۋنيۆەرسيتەتتىڭ 700 وقىتۋشىسى Tech Orda باعدارلاماسىنىڭ ارنايى اعىنى اياسىندا جاساندى ينتەللەكت جانە Game Development باعىتتارى بويىنشا قارقىندى وقىتۋدان وتەدى.
وقىتۋ «ترەنەرلەردى دايىنداۋ» (ToT) جۇيەسى شەڭبەرىندە ۇيىمداستىرىلادى. بۇل وقىتۋشىلارعا تەك تەوريالىق نەگىزدەردى مەڭگەرىپ قانا قويماي, ولاردى پراكتيكادا قولدانۋعا مۇمكىندىك بەرەدى.
«2023 جىلى وتكەن Digital Bridge حالىقارالىق فورۋمىندا جوعارى وقۋ ورىندارىندا جاساندى ينتەللەكت سالاسىنداعى پاندەردىڭ مازمۇنى مەن وقىتۋ ادىستەرىن جاڭارتۋ ۇسىنىلدى. وسىعان وراي مەملەكەت باسشىسى جوعارى وقۋ ورىندارىنداعى پەداگوگتاردىڭ بىلىكتىلىگىن ارتتىرۋعا تاپسىرما بەردى. باعدارلاما اياسىندا 650 وقىتۋشى جاساندى ينتەللەكت باعىتىندا, ال 50 پەداگوگ Game Development باعىتىندا وقىتىلادى. وقىتۋدى وتكىزۋ ءۇشىن 7 قازاقستاندىق IT-مەكتەپ تاڭدالدى. ساباقتار ونلاين جانە وفلاين, سونداي-اق IT-مەكتەپتەر پلاتفورمالارىندا وقۋ ماتەريالدارىنا قول جەتكىزۋدى قوسا العاندا, ارالاس فورماتتا وتەدى», دەدى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ.
وقىتۋشىلار اپتاسىنا ەكى ساباق وقيدى. ساباقتىڭ ۇزاقتىعى ارقايسىسى 90 مينۋتتان, ءار توپتا 25 ادامعا دەيىن قامتىلادى. ءدارىس قازاق جانە ورىس تىلىندە بەرىلەدى, بارلىق ماتەريالدار, ونىڭ ىشىندە بەينەساباقتار ەكى تىلدە ۇسىنىلادى.
«جاساندى ينتەللەكت» باعىتى بويىنشا وقۋ باعدارلاماسى Prompt engineering, Data analytics, Data Science جانە Computer Vision بويىنشا كىرىسپە كۋرستى قامتيدى. ال, ىلگەرى كۋرس جاساندى ينتەللەكت, تابيعي ءتىلدى وڭدەۋ (Natural Language Processing) جانە تەرەڭدەتىپ وقىتۋ (Deep learning) تاقىرىپتارىن قاراستىرادى. Game Development باعىتىندا گەيمديزايننىڭ نەگىزدەرى, كومپيۋتەرلىك گرافيكا, مودەلدەۋ جانە تەكستۋرالاۋ, ريگگينگ, انيماتسيا جانە ويىندارداعى UI/UX نەگىزدەرى, سونداي-اق ويىن ازىرلەۋ وقىتىلادى.
