ريو وليمپياداسىنىڭ, الەم چەمپيونى, ازيا ويىندارىنىڭ ەكى دۇركىن جەڭىمپازى, الەم چەمپيوناتىنىڭ كۇمىس جۇلدەگەرى, قۇرلىقتىڭ ەكى دۇركىن چەمپيونى دانيار ەلەۋسىنوۆتىڭ قارسىلاسى دا وسال ەمەس ەدى. 28 جاستاعى دجو نوينايدىڭ كاسىپقويلار اراسىندا كۇش سىناسىپ جۇرگەنىنە 11 جىلدان استى. سول كەزدەن بەرى رينگكە 29 مارتە كوتەرىلىپ, 23 رەت جەڭىسكە جەتتى. 11 كەزدەسۋدى مەرزىمىنەن بۇرىن اياقتادى. ءتورت رەت ۇتىلىپ, ەكى مارتە تەڭ ءتۇستى. بىراق قازاقتىڭ قايسار ۇلىنا دجو لايىقتى قارسىلىق كورسەتە المادى. 10 راۋندقا ەسەپتەلگەن جەكپە-جەك بەل ورتادان اسقان تۇستا اياقتالدى. ءبىرىنشى, ءتورتىنشى راۋندتاردا نوكداۋن العان نويناي بەسىنشى راۋندتان كەيىن باسەكەنى جالعاستىرۋدان باس تارتتى. ءسويتىپ دانيار WBC Peace نۇسقاسىنىڭ چەمپيوندىق بەلبەۋىن يەلەندى.
ارينە, جەرلەسىمىزدىڭ بۇل جەڭىسىنە قۋاندىق. دەسەك تە ەرەكشە ءبىر شاتتانىپ, كەۋدەمىزدىڭ ماقتانىش سەزىمى كەرنەدى دەپ ايتا المايمىز. ويتكەنى دانياردىڭ الەۋەتى بۇدان دا زور ەدى. وسىدان بىرەر جىل بۇرىن اۋەسقوي بوكستاعى بارلىق بەلەستى باعىندىرعان وتانداسىمىزدىڭ كاسىپقوي رينگتىڭ دە ۇشار شىڭىنا شىعاتىنىنا كۇماندانعاندار كەمدە-كەم ەدى. ءبىز ونى اقش-تا, نيۋ-يوركتەگى ايگىلى «مەديسون-سكۆەر-گاردەننەن» كورگىمىز كەلدى. بىراق ءبارى ويلاعانداي بولمادى. ول جەردە ەلەۋسىنوۆ ءبىر عانا جەكپە-جەك وتكىزدى. 2019 جىلعى 13 قىركۇيەكتە جەرگىلىكتى بوكسشى رەشارد حيكستى ءبىرىنشى راۋندتا ۇرىپ جىقتى. كەيىننەن تاعى ەكى كەزدەسۋىن امەريكانىڭ فينيكس پەن حولليۆۋد قالالارىندا وتكىزدى. سوڭعى رەت 2021 جىلعى 19 جەلتوقساندا استانادا ارگەنتينالىق حۋان ەرنان لەالدى ۇپاي سانىمەن ۇتىپ, IBO نۇسقاسىندا چەمپيوندىق ءتاجدى يەلەندى. سودان كەيىن دانيار ەكى جىلعا جۋىق ۋاقىت بويى كوپشىلىك نازارىنان تىس قالدى.
قازىر دانياردىڭ جاسى 33-تە. قارتايىپ تۇرعان جوق. ءدال وسى جاسىندا شارشى الاڭدا جاسىنداي جارقىلداپ جۇرگەن جۋان جۇدىرىقتى جىگىتتەردىڭ قاتارى قالىڭ. قانداسىمىز مىقتى ءبىر پروموۋتەر, مەنەدجەر تاۋىپ, سونىمەن جاقسىلاپ جۇمىس ىستەۋى كەرەك. بىزگە كەرەگى – ەلەۋسىنوۆتىڭ استانا نەمەسە الماتىدا ەمەس, الىستاعى امەريكادا ايقاسقانى. بيىك بەلەستەردى باعىندىرۋدى ماقسات تۇتقان ازاماتتىڭ شوقتىعى بيىك بوكسشىلاردىڭ شوعىرلانعان جەرىندە, سولاردىڭ قاق ورتاسىندا جۇرگەنى الدەقايدا ءتيىمدى. تەك سوندا عانا دانيار كاسىپقويلار اراسىندا ۆاسيلي جيروۆ, گەننادي گولوۆكين نەمەسە جانىبەك ءالىمحان ۇلى سەكىلدى ءوزىن تۇبەگەيلى مويىنداتادى. وسى كۇنگە دەيىن ەلەۋسىنوۆ 12 جەكپە-جەك وتكىزىپ, بارلىعىندا جەڭىسكە جەتتى. جەتى جەكپە-جەكتە قارسىلاستارىن نوكاۋتقا جىبەردى.
الماتىداعى بوكس كەشىندە ءبىر توپ ارالاس جەكپە-جەك شەبەرلەرى كاسىپقوي رينگتە ونەر كورسەتتى. «نايمان» دەگەن جاناما ەسىممەن تانىلعان اتىشۋلى قۋات حاميتوۆ نۇربەرگەن ءشارىپوۆتى ۇپاي سانىمەن ۇتتى.
كاسىپقوي رينگتەگى تۇساۋكەسەر كەزدەسۋىندە جۇمان جۇمابەكوۆ تاجىك اسرور اكپارحودجاەۆتان ايلاسىن اسىردى. داستان بەكەن مەن ەراسىل اقىرانبەك تە جەڭىسكە جەتتى. العاشقىسى مما-دا «موتيۆاتور» دەگەن بۇركەنشىك ەسىمدى يەلەنگەن انۋاربەك بەكەمبەتوۆتەن باسىم تۇسسە, ەكىنشىسى رەسەيلىك ميحايل دولگوپولوۆتىڭ وسال تۇسىن تاپتى. ال ءادىلجان ساندىبەكوۆ رەسەيدە تۋىپ-وسكەن قانداسىمىز ەلنار يشيمباەۆقا ەسە جىبەردى.
