جاڭا ماۋسىم تانىستىرىلىمىن تەلەارنا تىلشىلەرى مەن ولاردىڭ جاساندى ينتەللەكت ارقىلى جاسالعان وبرازدارى بىرلەسىپ جۇرگىزدى. ەلدەگى ەڭ ۇلكەن مەديا ۇجىم كۇزگى ماۋسىمدا اۋديتوريانىڭ بارلىق ساناتىنىڭ سۇرانىسىن قامتيتىن ءتۇرلى جانرداعى 28 جاڭا باعدارلاما, جالپى سەريالارىنىڭ سانى 150 ءبولىمدى قۇرايتىن 11 جاڭا تەلەحيكايا مەن دەرەكتى فيلمدەر جەلىسىن ۇسىنادى ەكەن.
ونىڭ ىشىندە قوعامعا مەيىرباندىق, جاۋاپكەرشىلىك, جاناشىرلىق سەكىلدى قۇندىلىقتاردى قاراپايىم كەيىپكەرلەر ارقىلى ورنىقتىرۋعا باعىتتالعان «جاقسىلىق جاسا» اتتى جاڭا باعدارلامانى ەرەكشە اتاپ وتۋگە بولادى. جۇما كۇنى كەشكە ەفيرگە شىعاتىن حاباردىڭ بىرنەشە شىعارىلىمى كورەرمەنگە جول تارتتى. ءوز ءومىرىن قيىپ, 130 بالانى قۇتقارعان قاراعاندىلىق پوليتسيا قىزمەتكەرى قايرات جۇمابەكوۆتىڭ, جامبىل وبلىسىنداعى جول اپاتىندا ورتكە ورانعان كولىكتەن بىرنەشە ادامدى الىپ شىققان ءمادي اليەۆتىڭ, استانادا 15 جاستاعى ءجاسوسپىرىمدى پاتەردەگى ورتتەن اراشالاپ العان التىنبەك التاەۆتىڭ ەرلىك ىستەرى مەن وقيعا كۋاگەرلەرى كورسەتىلدى.
ۇلتتىق ارنا ەلدىڭ 17 ايماعىنىڭ ەرەكشەلىگىن قامتيتىن «اتامەكەن» تەلەۆيزيالىق ترەۆەل-شوۋ باعدارلاماسىن دا قولعا الىپتى. ترەۆەل-شوۋ – ەفيردە كورىنبەي كەتكەن جانر. شىعارماشىلىق ۇجىم جاز بويى ءار ايماقتاعى شالعاي ەلدى مەكەندەر مەن ءوندىرىس وشاقتارىن ارالاپ شىعىپتى. مۇندا ەڭبەك ادامدارىنىڭ بەينەسى ايقىن كورسەتىلگەن. بۇل – مەملەكەت باسشىسى جولداۋىندا ايتقان ەڭبەك ادامدارىنىڭ ءرولىن دارىپتەۋدىڭ مىسالى.
زاڭ شىعارۋشى ورگان پارلامەنتتىڭ جۇمىسىنا ارنالعان «قوس پالاتا» حابارىندا جۋرناليست يرينا سوۆەتجانقىزى دەپۋتاتتىق ساۋالدارداعى ماسەلەلەردى كەڭىنەن تارقاتىپ, كورەرمەندەرگە قۇقىقتىق باستامالاردىڭ جاي-جاپسارىن تۇسىندىرەدى. كىشكەنتاي كورەرمەندەر مەن ولاردىڭ اتا-انالارىنا ارنالعان دۇنيەلەر دە نازاردان تىس قالماعان. وسىنداي جوبالاردىڭ ءبىرى – «دارا بالا» حابارى. ەلىمىزدەگى ەڭ تالانتتى بالالاردى ءبىر الاڭعا بىرىكتىرگەن جوباعا ارنايى ىرىكتەۋدەن وتكەن جاس ونەرپازدار, ءبىلىم, عىلىم, ونەر, سپورت سالالارىنداعى دارىندى بالالار قاتىسادى.
كورپوراتسيانىڭ جاڭا ماۋسىمعا دايىنداعان قوماقتى دۇنيەسىنىڭ ءبىرى – تەلەحيكايالار ءوندىرىسى. اتاپ ايتساق, ۇلتتىق ارنا كورەرمەندەرگە 11 پرەمەرا ۇسىنباق. جالپى ءبولىم سانى 150 سەريا بولاتىن جاڭا تەلەحيكايالار اراسىندا تۋريزم, ينكليۋزيا, سپورت پەن مەديتسينا, قۇتقارۋشىلار تاقىرىبىنا, وتباسىلىق قۇندىلىقتاردى دارىپتەۋگە باعىتتالعان دراما, مەلودرامالار, قازاق تەاترىنىڭ 100 جىلدىعىنا ارنالعان «شام تۇبىندەگى شىندىق», 1930-1940 جىلدارداعى مادەني كەزەڭگە, سول زامانداعى احمەت جۇبانوۆ باستاعان قازاق كاسىبي مۋزىكا ونەرىنىڭ كورنەكتى تۇلعالارىنا ارنالعان «جەل ۇستىندەگى ۆالس», جەڭىستىڭ 80 جىلدىعىنا وراي سايىن مۇراتبەكوۆ شىعارماسىنىڭ جەلىسىمەن تۇسىرىلەتىن «جابايى الما» تاريحي تەلەحيكايالارى بار. سونىمەن قوسا بيىل كورپوراتسيا بەردىبەك سوقپاقباەۆتىڭ «ون التى جاسار چەمپيون» شىعارماسىن ەكرانيزاتسيالايدى. وسى ارقىلى شىعارماشىلىق ۇجىم قالامگەرلەردىڭ مۇراسىن دا دارىپتەيدى. دەرەكتى فيلم جانرى دا جاڭعىرتىلىپ, تىڭ تۋىندىلار تۇسىرىلمەك.
«شىعارماشىلىق كوماندا جاڭا ماۋسىمدا ۇلتتىڭ جاڭا ساپاسىن قالىپتاستىرۋعا قاجەتتى قۇندىلىقتاردى دارىپتەيتىن باعدارلامالارمەن قوسا, ەلدەگى ەلەۋلى وقيعالارعا, ماڭىزدى داتالار مەن وزگە دە وزەكتى تاقىرىپتارعا ارنالعان تەلەحيكايالار مەن دەرەكتى فيلمدەر ۇسىنادى. «قازاق قىزى» سەرياسىمەن شىعاتىن دەرەكتى جوبالارىمىزدا عاينيجامال دۋلاتوۆا, زەينەپ بوكەيحانوۆا, ءنازيپا قۇلجانوۆا, گۇلسىم اسفەندياروۆا, اققاعاز دوسجانوۆا, ءمۇبينا نيازوۆا سەكىلدى ءار سالادان شىققان تۇڭعىش قايراتكەر ايەلدەردىڭ ەڭبەكتەرىن ناسيحاتتاۋدى ماقسات ەتتىك. كەلەر جىلى بۇل تسيكلدى تاريحي تەلەحيكاياعا اينالدىرۋدى جوسپارلاپ وتىرمىز», دەدى «قازاقستان» رترك» اق باسقارما ءتورايىمى ءلاززات تانىسباي.
ساياسي-قوعامدىق باعىتتاعى «اشىق الاڭ», «الەم جانە ءبىز», «جەدەل جەلى», «باس تاقىرىپ» جوبالارى, مەديتسينالىق كەڭەس بەرەتىن «تەلەدارىگەر», وتباسى تاتۋلىعىنىڭ سىرىن كورسەتەتىن «تاتۋ-ءتاتتى», اسكەري-پاتريوتتىق باعىتتاعى «اقساۋىت», تىكەلەي ەفيردە كۇننىڭ رەزونانستى وقيعالارىن تالداۋعا ارنالعان «1001 ءتۇن» جوبالارى جاڭا ماۋسىمدا دا جالعاسادى.
شىعارماشىلىق كەشكە قاتىسقان اقپارات سالاسىنىڭ ارداگەرى, مەملەكەت جانە قوعام قايراتكەرى قۋانىش سۇلتانوۆ اۋديتوريا سۇرانىسىنا جاۋاپ بەرەتىن باعدارلامالار مولايۋىنا بارلىق مەديا مۇددەلى بولۋعا ءتيىس ەكەنىن ايتادى. «Qazaqstan» ارناسى – قوعام وزگەرىستەرى مەن ۇلت تاريحىنداعى جاڭا پاراقتارعا ۇنەمى ءمان بەرىپ وتىراتىن ۇلكەن ۇجىم. رۋحانيات پەن قۇندىلىقتارىمىزدى ۇلىقتاۋدا جاڭاشىلدىعىمەن, زور ىزدەنىسىمەن كوش باسىندا جۇرەدى», دەپ اتاپ ءوتتى.
كورپوراتسيا قۇرامىنداعى «Abai tv» تەلەارناسىنان كلاسسيكالىق مۋزىكا مەن تەاترداعى الەمدىك دەڭگەيدەگى تۋىندىلاردى تەرەڭ تالدايتىن «ارناۋ», زياتكەرلىك باعىتتاعى «ويمەرگەن», كىتاپ وقۋ مادەنيەتىن قالىپتاستىرۋدى كوزدەيتىن «مەنىڭ كىتاپحانام» جاڭا حابارلارى ەفيرگە شىعادى. «Balapan» تەلەارناسى كىشكەنتاي كورەرمەندەرگە 20-عا جۋىق جاڭا جوبا مەن مۋلتحيكايالار ۇسىنادى. ونىڭ ىشىندە مەكتەپ جاسىنا دەيىنگى بالالار اراسىنداعى «iBars» زياتكەرلىك تەلەۆيزيالىق بايقاۋى, بالالاردى عىلىمعا باۋلۋدى كوزدەيتىن «عىلىمعا ساياحات», اتا-انالارىمەن بىرلەسە سايىسقا تۇسەتىن «ويزەرەك» تانىمدىق جوباسى بار.
جاڭا تەلەۆيزيالىق جوبالاردان بولەك, «قازاقستان» تەلەراديوكورپوراتسياسى جىل سوڭىنا دەيىن «التىن قورداعى» قۇندى اۋديوشىعارمالار جيناقتالعان 6 ءبولىمدى «اسىل مۇرا» جيناعىن, سپورت جۋرناليستەرى مەن كوممەنتاتورلارىنا ارنالعان «كوممەنتاتورلار سوزدىگىن» جارىققا شىعارادى.
