سۋرەت: facebook.com@Taraz.24
مەدياساۋاتتىلىق – قازىرگى كەزەڭنىڭ باستى تالابى. ويتكەنى سويلەم قۇرىلىسى مەن ءارىپ قاتەلەردەن بولەك, كەي جۋرناليستەر دەرەكتى تەكسەرۋدى, ونىڭ راس-وتىرىگىنە كوز جەتكىزبەي جاريالاۋعا بولمايتىنىن, وعان قوسا مەديا ەتيكانىڭ بار ەكەنىن تۇسىنە بەرمەيدى. وسىعان وراي پانەلدىك سەسسيالاردا فاكتچەكينگ, مەدياەتيكا, مەدياساۋاتتىلىق تاقىرىپتارى كوتەرىلدى. ءتىپتى جۋرناليستەر اراسىندا ديكتانت ءوتتى.
سونداي-اق مەديا اپتالىقتا جۇرتشىلىقتى وڭىرلىك باق-تىڭ كونتەنتىمەن تانىستىرۋعا مۇمكىندىك تۋدى. ايماقتارداعى مەديانىڭ پروبلەمالارىنا دا باسا نازار اۋدارىلدى. اسىرەسە قاتىسۋشىلار مامان تاپشىلىعىن باسا ايتتى. مەنىڭشە, جوعارى وقۋ ورىندارىنداعى جۋرناليستيكاعا ءتۇسۋ ءتارتىبىن وزگەرتۋ قاجەت. وعان قوسا ۋنيۆەرسيتەتتەرگە تەوريالىق ءبىلىمى مەن پراكتيكالىق بىلىگى ۇشتاسقان كاسىبي مامانداردى كوبىرەك تارتۋ كەرەك.
تاعى ءبىرى قاۋزالعان وزەكتى ماسەلەنىڭ ءبىرى – بالالار كونتەنتىن دامىتۋ. اتالعان تاقىرىپ تۋراسىندا شەتەلدىك ماماندار دا شاقىرتىلىپ, ترەندتەگى فورماتتار تالقىلاندى. نەگىزى بۇل پروبلەما بۇعان دەيىن اتىراۋدا وتكەن ۇلتتىق قۇرىلتايدا دا كوتەرىلگەن ەدى. ماقسات – مەديا پلاتفورمالارداعى قازاق ءتىلىنىڭ قولدانىس اياسىن ارتتىرۋ.
زارينا قۋاتوۆا,
«تاراز 24» تەلەارناسىنىڭ ديرەكتورى
