كەيىنگى جىلدارى قالادا قۇرىلىس قارقىنى ارتىپ كەلەدى. وسىعان دەيىن بوي كوتەرگەن تۇرعىن ۇيلەردەن 525 وتباسى جاڭا پاتەرگە قونىستاندى. بيىل ناۋرىزدا دا قاراعايلى شاعىن اۋدانىندا تۇرعىن ءۇي كەزەگىندە تۇرعان 77 ازامات باسپانامەن قامتىلدى. تامىز ايىندا 237 ادام قولدارىنا جاڭا پاتەردىڭ كىلتىن الدى. وتكەن جىلى پاتەر كەزەگىندە تۇرعان 211 وتباسى باسپانالى بولدى.
سونىمەن قاتار قالانىڭ دامۋىنا ۇلەس قوسىپ كەلە جاتقان ءارتۇرلى سالا ماماندارىنا «سەمەي قالاسىنىڭ قۇرمەتتى ازاماتى» جانە «ۇزدىك قىزمەتكەر» اتاعى بەرىلدى. مەرەكەلىك ءىس-شارادا ءسوز العان قالا اكىمى نۇربول نۇرساعاتوۆ ەڭبەگىمەن ەلەنگەن جانداردىڭ ءومىرى مەن قىزمەتى كوپكە ۇلگى ەكەنىن اتاپ ءوتتى.
«بۇگىن سەمەي قالاسىنىڭ قالىپتاسۋى مەن دامۋىنا لايىقتى زور ۇلەس قوسقان ازاماتتاردى ۇلىقتاپ وتىرمىز. سەمەي قالاسىنىڭ قۇرمەتتى ازاماتى اتانۋ – بىررەتتىك جۇمىستىڭ ناتيجەسى ەمەس, ۇزاق جىلدار بويى ءبىر سالادا تابان اۋدارماي جەمىستى ەڭبەك ەتكەندەرىڭىزدىڭ, قىزمەت جاساعاندارىڭىزدىڭ جەمىسى. سىزدەردىڭ ەرەن ەڭبەكتەرىڭىز بەن ونەگەلى ومىرلەرىڭىز وسكەلەڭ ۇرپاققا وشپەس ۇلگى», دەدى ن.نۇرساعاتوۆ.
سەمەي قالاسىنىڭ دامۋىنا قوسقان ۇلەسى ەلەنىپ, قوعام قايراتكەرى مەنسافا ۋسمانوۆا, سپورت ارداگەرى يۋري ماسلوۆ, ءبىلىم بەرۋ سالاسىنىڭ ۇزدىگى جۇماعازى ستامبەكوۆ, 2012 جىلدان باستاپ قازىرگى ۋاقىتقا دەيىن «سپۋتنيك» مت جشس باسقارما توراعاسى قىزمەتىن اتقاراتىن قايرات ميراشەۆ, سۋرەتشى, پەداگوگ تولەۋعازى جۇبانىشەۆ, فۋتبولشى, حالىقارالىق ساناتتاعى تورەشى الەكساندر بوريسوۆ, «التىن دارىگەر» توسبەلگىسىنىڭ يەگەرى, حيرۋرگ بازار تولەۋوۆ «سەمەي قالاسىنىڭ قۇرمەتتى ازاماتى» اتاندى.
سونداي-اق قاراپايىم ەڭبەك ادامدارى دا نازاردان تىس قالعان جوق. اۆتوبۋس جۇرگىزۋشىسى دارحان جاۋكەنوۆ, ەلەكتر مامانى نۇرتاس جاناقىمەتوۆ, قوسالقى جۇمىسشى ماۋىتقازى راحىمباەۆ, الەۋمەتتىك قىزمەتكەر راۋشان مۇسابەكوۆا, مەحانيك ماۆلەتيان حازيپوۆ, سۋ شارۋاشىلىعىنىڭ قىزمەتكەرى دۋمان مولدەنوۆ, جىلۋ ستانساسىنىڭ قىزمەتكەرى يۋري كليمەنكو, جول جوندەۋ جۇمىستارىنا اتسالىسقان مارات رامازانوۆ «ۇزدىك قىزمەتكەر» اتاعىنا يە بولدى. ولارعا العىسحاتتار مەن 100 مىڭ تەڭگەلىك سەرتيفيكاتتار تابىستالدى.
قالا اكىمى ن.نۇرساعاتوۆ سەمەي قالاسىنىڭ 103 جاستاعى ەڭ قارت تۇرعىنى زەينە امانباەۆانىڭ شاڭىراعىنا ارنايى بارىپ, قۇرمەت كورسەتتى. زەينە اپا 1921 جىلى ابىرالى اۋدانىندا دۇنيەگە كەلگەن. سوعىس جىلدارى كولحوزدا ءارتۇرلى جۇمىس اتقارعان. كەيىن سەمەيدە قوعامدىق جۇمىستارعا بەلسەنە ارالاسىپ, حالىق قۇرمەتىنە يە بولعان. ونىڭ ومىرلىك جولداسى دا زاڭ سالاسىندا ۇزاق جىلدار بويى قالتقىسىز قىزمەت ەتتى. بۇگىندە زەينە اپا – نەمەرە-شوبەرەلەرىنىڭ قۇرمەتىنە بولەنىپ وتىرعان ابزال انا.
اباي وبلىسى
