فوتو سەناتتىڭ ءباسپاسوز قىزمەتى
دەپۋتاتتار اتوم ەلەكتر ستانتسياسىن سالۋ تۋرالى الداعى رەفەرەندۋمعا قاتىستى وزەكتى تاقىرىپتاردى تالقىلادى. «اگرو-ەسىل» جشس, «نامىس» جشس جانە ستاۆروپول ورتا مەكتەبىنىڭ ەڭبەك ۇجىمدارى كوكەيدە جۇرگەن ساۋالدارىن قويىپ, قىزۋ پىكىرتالاس ورىستەدى.
«اتوم ەلەكتر ستانتسياسىن سالۋ – ءبىزدىڭ بولاشاعىمىزدىڭ ماسەلەسى ەكەنىن ءبارىمىز تۇسىنەمىز. سوندىقتان ويلاسا وتىرىپ, سالماقتى شەشىمگە كەلۋ كەرەك. ءبىزدىڭ جانە بالالارىمىزدىڭ بولاشاعى قانداي بولاتىنىن رەفەرەندۋم قورىتىندىسى پاش ەتەدى», دەدى ولگا پەرەپەچينا.
تالقىلاۋ بارىسىندا اەس قۇرىلىسىنا قاتىستى ەكولوگيالىق جانە ەكونوميكالىق ماسەلەلەر, سونداي-اق ونىڭ قازاقستان ازاماتتارىنىڭ ومىرىنە اسەرى اتاپ ءوتىلدى. كەزدەسۋگە قاتىسۋشىلار سەناتورلار بەرگەن تۇسىنىكتەمەگە وراي ءوز الاڭداۋشىلىقتارىن ءبىلدىردى.
«ءاربىر ازاماتتىڭ رەفەرەندۋمعا قاتىسۋى ماڭىزدى. بۇل بارلىق قازاقستاندىقتاردىڭ ءوز پىكىرىن ءبىلدىرۋ جانە ەلىمىزدىڭ بولاشاعىنا اسەر ەتەتىن شەشىمگە بەلسەندى قاتىسۋ قۇقىعى», دەپ اتاپ ءوتتى دەپۋتات اسەم راحمەتوۆا.
