جاڭا سالىق كودەكسىندە كوپتىڭ تىلەگى ەسكەرىلەدى

ايتالىق, پرەزيدەنت جاڭا سالىق كودەكسىنىڭ ساپالى ازىرلەنۋى ءۇشىن ونىڭ قابىلداۋ مەرزىمىن كەلەسى جىلعا دەيىن ۇزارتتى. البەتتە, بۇل ماسەلەدە قوعامنىڭ, ونىڭ ىشىندە ىسكەر ورتانىڭ تىلەگى مەن بيۋد­جەت­تىڭ ەرەكشەلىكتەرى ەسكەرىلىپ, سالماق­تى ءارى بايىپتى شەشىم قابىلدانۋى قاجەت.

جاسىراتىنى جوق, وسى زاڭدى دايىنداۋ بارىسىندا سالىق رەجىمدەرى تۋرالى كوپ سۇراق تۋىندادى. قازىر ارنايى سالىق رەجىمى اياسىندا 2 ملن-عا جۋىق كاسىپكەر جۇمىس ىستەپ جاتىر. وڭتايلاندىرىلعان دەكلاراتسيانى 1 ملن 900 مىڭداي ادام تاڭداعان. ال بولشەك سالىق جۇيەسى ارقىلى 30 مىڭداي ادام ءوز كاسىبىن ىلگەرىلەتىپ كەلەدى. ارينە, بۇل رەجىمدەردىڭ پايداسى بار. بىراق وسى ارقىلى سالىق تولەۋدەن جالتارىپ جۇرگەندەر دە كەزدەسەدى. مىسالى, كەيبىر ءىرى كومپانيالار وزدەرىنىڭ ماڭايىنا جۇزدەگەن جەكە كاسىپكەردى شوعىرلاندىرىپ, وسىلايشا, شىعىستارىن ارتتىرۋمەن بىرگە سالىق مىندەتتەمەسىن ازايتۋدىڭ امالىن قاراستىرىپ ءجۇر.

مەملەكەت باسشىسىنىڭ جولداۋىندا ايتىلعانداي, ارنايى سالىق رەجىمدەرى جەكە تۇلعالارعا ارنالىپ, باعىتتالۋعا ءتيىس. سول سەبەپتى اتالعان زاڭدى قايتا قاراس­تىرىپ, پىسىقتايمىز. ءبىزدىڭ ماقسا­تى­مىز – سالىق تۇسىمدەرىن ۇلعايتۋ, سول ارقىلى ەكونوميكالىق وسىمگە جول اشۋ.

بۇعان قوسا جولداۋدا قارىزدارى بار كاسىپكەرلەردىڭ شوتتارىن بىردەن بۇعاتتاماۋ جونىندە دە ايتىلدى. راس, قازىر قارىز مولشەرى 6 اەك-تەن اساتىن بولسا, وندا ەسەپشوت بۇعاتتالادى. پرەزيدەنتتىڭ تاپسىرماسىنا سايكەس بۇل تالاپ, شەكتى قويۋ مولشەرى قايتا قارالادى. ايتالىق, بەرەشەك دەڭگەيى 20-25 اەك-تەن اسىپ جاتسا دا, ءبىز ونىڭ شوتىن بۇعاتتاماي, تەك قانا حابارلاما جىبەرۋ ارقىلى باقىلاۋ جۇرگىزۋ تەتىگىن ەنگىزۋدى كوزدەپ وتىرمىز. ايتسە دە جىبەرىلگەن حابارلامالار مەن ءتيىستى ەسكەرتۋلەر ەلەنبەي, قارىز مولشەرى ۇلعايا بەرسە, سوندا عانا ناقتى شارالار قابىلدانادى. تۇتاستاي العاندا, باقىلاۋ جۇيەسىنەن بىرتە-بىرتە ارىلىپ, سەرۆيستىك قىزمەتتەرگە باسىمدىق بەرۋدى جوسپارلاپ وتىرمىز.

ەرجان ءبىرجانوۆ,

قارجى ۆيتسە-ءمينيسترى