وسى بەس زاۋىتتىڭ ىشىندە ونىمدەرىن حالىق كۇنبە-كۇن كورگەن جالعىز ءوندىرىس ورنى – س.كيروۆ اتىنداعى ماشينا جاساۋ زاۋىتى. ويتكەنى كاسىپورىن اسكەري ونىمدەرمەن قاتار جاستار ۇستاۋعا لايىقتى ماگنيتوفوندار دا شىعاراتىن.
1941 جىلعى قاراشادا رەسەيدىڭ يۆانوۆ وبلىسىنداعى الەكساندروۆ قالاسىنان وسى زاۋىت ماماندارىمەن جانە جابدىقتارىمەن بىرگە پەتروپاۆلعا كوشىرىلگەن. بۇرىن دا بىرنەشە زاۋىتتى ادامدارىمەن بىرگە قابىلداپ, مۇرنىنان شانشىلىپ جۇرگەن قالا باسشىلارى جەرگىلىكتى تۇرعىنداردى تاعى دا قونىستارىنان قىسا ءتۇسىپ, زاۋىتتىڭ مىڭعا جۋىق جۇمىسشىسى مەن مامانىنا ارەڭ ورىن تاۋىپ بەرەدى.
قىرىق ەكىنىڭ ساقىلداعان سارى ايازىندا, كۇنىنە 16-18 ساعات جۇمىس ىستەگەن زاۋىت جۇمىسشىلارى اقپان ايىندا اشىق اسپان استىندا العاشقى ونىمدەرىن بەرە باستايدى. بۇلار ارمياعا اسا قاجەتتى راديوقابىلداعىشتار مەن راديوپەلەنگاتورلار ەدى. اسىرەسە راديوپەلەنگاتورلار راديوتولقىنداردىڭ (RDF) شىعىپ جاتقان كوزىن انىقتاۋعا وتە پايدالى. انتەنناسى سورايعان راديوپەلەنگاتور ارقىلى جاۋدىڭ تۇراعى عانا ەمەس, سوزدەرى دە انىقتالاتىن. كەيىن ولار قۇتقارۋ-ىزدەۋ وپەراتسيالارىندا, راديوبارلاۋدا تۇراقتى قولدانىلا باستادى.
سوعىستان كەيىنگى جايماشۋاق جىلداردا جاستار ونىڭ «رومانتيك» ماگنيتوفونىمەن جاپپاي «دوس» بولدى. اۋىل كلۋبتارىندا, دالاداعى قوستاردا, تابيعات اياسىنداعى دەمالىستاردا ءان تىڭداۋ, بي بيلەۋ وسى ماگنيتوفون كومەگىمەن اتقارىلاتىن. سول جىلداردا قولىنا «رومانتيك» ۇستاپ جۇرەتىن جىگىتتەر سەرىلەردىڭ سەرىسىندەي كورىنىپ, بويجەتكەندەر وندايلارعا كوڭىل اۋدارماي قالمايتىن.
ال سول ماگنيتوفوندار بۇكىل وداق بويىنشا تەك ەكى قالانىڭ زاۋىتىندا شىعارىلدى. ءبىرى گوركي (قازىرگى نيجني نوۆگورود) بولسا, ەكىنشىسى پەتروپاۆلدىڭ س.كيروۆ اتىنداعى زاۋىتى ەدى. وسىنىڭ ءوزى قازاقستان زاۋىتىنىڭ داڭقىن اسپانعا شىعاردى. «رومانتيك» الۋ ءۇشىن پەتروپاۆلدىڭ راديو-تەحنيكالىق دۇكەندەرىنە وداقتىڭ تۇكپىر-تۇكپىرىنەن جاستار اعىلىپ جاتۋشى ەدى.
قازىر زاۋىت «س.كيروۆ اتىنداعى زاۋىت» اق دەپ اتالىپ, «قازاقستان ينجينيرينگتىڭ» ءبىر فيليالى رەتىندە جۇمىس ىستەپ جاتىر. ونىمدەرىنىڭ سپەكترى ءارتۇرلى. كلۋب جانە رۆس راديوستانتسياسىنان باستاپ بۋشك-2م شتانگالىق مۇناي ايداۋدى باسقارۋ بلوگىنە دەيىن شىعارادى. قازىر مۇندا زاماناۋي تەحنولوگيانىڭ قۇلاعىندا وينايتىن بىلىكتى ماماندار جۇمىس ىستەيدى. قىزمەتكەر سانى مىڭعا جۋىقتايدى. ونىمدەرگە سىرتتىڭ قىزىعۋشىلىعى دا وراسان. ماسەلەن, ZIK دەپ اتالاتىن كومپيۋتەردىڭ قۋاتى مەن ساپاسى الەمدىك برەندتەردەن ءبىر مىسقال كەم ەمەس. 2016 جىلدان بەرى زاماناۋي باسۋ پلاتىن دا شىعارۋعا كىرىستى. قازىر زاۋىت – 4-ءشى جانە 5-ءشى دالدىكتەگى باسۋ پلاتىن يگەرگەن ەلدەگى جالعىز كاسىپورىن.
سونىمەن قاتار, زاۋىت ستاتسيونارلىق جانە جىلجيتىن نىسانداردىڭ «كونۆوي-پ» اتتى كۇزەت جۇيەسىنىڭ دابىلىن ءوز كۇشتەرىمەن ويلاپ شىعارعان. ەگەر كۇزەتىلەتىن نىسانعا سىرتتان قول سۇعىلسا اۆتوماتتى كەشەن جۇمىسقا كىرىسەدى. ونى تەمىرجولدىڭ جىلجىمالى قۇرامدارىنا دا قويۋعا بولادى.
مۇناي-گاز سەكتورىنىڭ جۇمىسىنا ارنالعان ۋزد-7نك باعدارلامالىق-اپپاراتتىق كەشەنى اتتى ءونىم مۇناي كەن ورىندارىندا تەربەلەتىن ستانوكتاردى ەلەكتر توعىنىڭ قاتتى قىسىمدارىن باقىلاۋ ارقىلى قورعاۋعا ارنالعان. ول بۋشك-2 باسقارۋ بلوگى بازاسىندا جاقسى جۇمىس ىستەپ, تۇتىنۋشىلار كوڭىلىنەن شىقتى.
بۇلاردان بولەك, رەزينو-تەحنيكالىق ونىمدەر, جەڭىل مەتالل كونسترۋكتسيالىق بۇيىمدار, وندىرىستىك ماقساتتاعى تەلە-راديو اپپاراتۋرالار, ەلەكتروندىق پريبورلاردى نارىققا ۇسىنىپ وتىر. جىل سايىن مەملەكەت بيۋدجەتىنە 1 ملرد تەڭگەگە جۋىق سالىقتىق ءتۇسىم تۇسىرەدى.
سولتۇستىك قازاقستان وبلىسى
