UNICEF پەن ددۇ دەرەكتەرى بويىنشا, قازاقستان تاۋەلسىزدىگىنىڭ العاشقى جىلدارىندا ءاربىر مىڭ نارەستەنىڭ 23-ءى ءبىر ايعا دا جەتپەي شەتىنەپ وتىرعان. قازىر جاعداي الدەقايدا جاقساردى دەسەك – 2022 جىلدىڭ سوڭىن اقاراي نارەستە ءولىمى 5 پروميللەدەن تومەن بولعان. بۇل ەۋروپالىق وداق ەلدەرىندەگى ستاتيستيكاعا وتە جاقىن ءارى ورتالىق ازيا ەلدەرى اراسىنداعى ەڭ جاقسى كورسەتكىش دەۋگە بولادى.
قازاقستاندا العاش رەت وتكىزىلىپ وتىرعان نەوناتولوگتاردىڭ اۋقىمدى جيىنى جاڭا تۋعان, شالا تۋعان نارەستەلەرگە مەديتسينالىق كومەك كورسەتۋ ساپاسىن جاقسارتۋدى, ەلىمىزدەگى نەوناتالدىق ءولىم-ءجىتىم كورسەتكىشتەرىن تومەندەتە ءتۇسۋدى كوزدەيدى.
ەكى كۇنگە سوزىلاتىن فورۋمدا شەتەلدىك ماماندار نەوناتولوگيا سالاسىنداعى نەگىزگى ماسەلەلەردى, سونىڭ ىشىندە التىن ساعاتتا جاڭا تۋعان نارەستەنى العاشقى رەانيماتسيالاۋ, شالا تۋعان جانە اۋرۋشاڭ نارەستەلەردى قاتارعا قوسۋدا ارنايى تاماقتى قولدانۋداعى ۇزدىك تاجىريبەلەرىن, رەسپيراتورلىق قولداۋدىڭ حالىقارالىق تاسىلدەرىن, جاڭا تۋعان نارەستەلەردىڭ ينفەكتسيالارىمەن كۇرەس, جوعارى قاتەرلى جۇكتىلىك كەزىندە باقىلاۋدىڭ پروگرەسسيۆتى تاكتيكاسى مەن باسقا دا وزەكتى تاقىرىپتاردى تالقىلاپ وتىر.
كوكەيكەستى كونفەرەنتسياعا قر دەنساۋلىق ساقتاۋ مينيسترلىگىنىڭ مۇرىندىق بولسا, قازاقستان اكۋشەر-گينەكولوگتارى مەن نەوناتولوگتارىنىڭ كونگرەسى «استانا مەديتسينا ۋنيۆەرسيتەتى» كەاق مەن AYALA قايىرىمدىلىق قورىنىڭ قولداۋىنا سۇيەنىپ ۇيىمداستىردى.
قر شتاتتان تىس باس نەوناتولوگى جانە قازاقستان اكۋشەر-گينەكولوگتارى مەن نەوناتولوگتارى كونگرەسىنىڭ پرەزيدەنتى بەكتۇرعان كارين وسىناۋ جيىن بۇكىل ورتالىق ازيا وڭىرىندە نەوناتالدىق ءولىم-ءجىتىمدى ازايتۋعا ەلەۋلى ۇلەس قوسىپ, نەوناتولوگيا مەن پەريناتولوگياداعى حالىقارالىق جانە وڭىرلىك كوشباسشىلارمەن ىنتىماقتاستىقتى ودان ءارى جەمىستى ەتۋگە كومەكتەسەدى دەپ ەسەپتەيدى.
«قازىرگى تاڭدا قازاقستانداعى نەوناتالدىق قىزمەت پەريناتالدىق ورتالىقتاردىڭ, پەرزەنتحانالاردىڭ مىڭداعان دارىگەرلەرى مەن مەدبيكەلەرىن بىرىكتىرىپ, ولار مەديتسينالىق كومەكتىڭ ساپاسىن جاقسارتۋ ءۇشىن تىنىمسىز جۇمىس ىستەپ جاتىر. ساپا ءبىرىنشى كەزەكتە دارىگەرلەردىڭ دە, ورتا مەديتسينالىق قىزمەتكەرلەردىڭ دە بىلىمىنە, تاجىريبەسى مەن داعدىلارىنا بايلانىستى. سوندىقتان جەتەكشى حالىقارالىق تاجىريبەشىلەردىڭ قاتىسۋىمەن كونفەرەنتسيالار وتكىزۋ – ەلدەگى نەوناتولوگيانى دامىتۋدا اسا ماڭىزدى. ءبىز ءبىلىم بەرۋدەگى باستامالارىمىزدى جىلدار بويى قولداپ, دەمەۋشىلىك تانىتىپ كەلە جاتقان AYALA قايىرىمدىلىق قورىنا ريزاشىلىعىمىزدى بىلدىرەمىز», دەيدى بەكتۇرعان قارين.
ءوز كەزەگىندە AYALA قايىرىمدىلىق قورىنىڭ نەگىزىن قالاعان ءارى پرەزيدەنتى ايدان سۇلەيمەنوۆا: «AYALA قايىرىمدىلىق قورى 14 جىلدان بەرى تەگىن شەبەرلىك سىنىپتارىن, سەمينارلاردى ۇيىمداستىرىپ كەلەدى, وتاندىق نەوناتولوگتاردىڭ, مەدبيكەلەردىڭ, اكۋشەرلەردىڭ كاسىبي ماشىعىن دامىتۋ ماقساتىندا وسىنداي كونفەرەنتسيالارعا قولداۋ تانىتادى. وعان قوسا «AYALA اكادەمياسى» ونلاين-پلاتفورماسىن قازاق تىلىندەگى كەز كەلگەن ءموبيلدى قۇرىلعىدان قولجەتىمدى تەگىن بەينە كۋرستارىمەن بەلسەندى تۇردە دامىتۋ ۇستىندەمىز. بىرنەشە جىلدان بەرى ءتۇرلى ەلدەردەن نەوناتولوگتار مەن نەوناتالدىق مەدبيكەلەردى بىرىكتىرە وتىرىپ, ونلاين-كلۋبتار وتكىزۋگە كومەكتەسەمىز. دارىگەرلەرىمىزدىڭ العان ءبىلىمى مەن ەڭ ۇزدىك حالىقارالىق تاجىريبەنى كۇندەلىكتى قولدانۋى قازاقستانداعى نەوناتالدىق مەديتسينالىق كومەك رەتىندە ناعىز سەرپىلىسكە نەگىز بولىپ كەلەدى», دەدى.
شالا تۋعان شاقالاقتاردى قۇتقارۋدى كوزدەيتىن حالىقارالىق اۋقىمداعى جيىنعا AstraZeneca, Baxter, MedConceptService, Drager, Acino سىندى كومپانيالار دەمەۋشىلىك تانىتسا, Paris-Saclay ۋنيۆەرسيتەتتىك اۋرۋحانالارى (فرانتسيا), كليۆلەندتەگى Cleveland Clinic Children's and Pediatric Institute (اقش), Santaros Klinikos ۆيلنيۋس ۋنيۆەرسيتەتى اۋرۋحاناسى, Sahlgrenska ۋنيۆەرسيتەتىنىڭ سيلۆيا پاتشايىم بالالار اۋرۋحاناسى (شۆەتسيا), پوزنان مەديتسينا عىلىمدارى ۋنيۆەرسيتەتى (پولشا), نەوناتالدىق ماسەلەلەر جونىندەگى رەسپۋبليكالىق پەريناتالدىق ورتالىق (وزبەكستان), انا مەن بالانى قورعاۋ ۇلتتىق ورتالىعى (قىرعىزستان), الماتى قالاسىنىڭ پەدياتريا جانە بالالار حيرۋرگياسى عىلىمي ورتالىعى, استانا مەديتسينا ۋنيۆەرسيتەتى, تۇركىستان, وسكەمەن, قاراعاندى, قىزىلوردا, تاراز قالالارىنىڭ وبلىستىق پەريناتالدىق ورتالىقتارى مەن باسقا دا ەلىمىزدەگى جەتەكشى مەديتسينالىق مەكەمەلەر, ورتالىقتاردىڭ مەديتسينا عىلىمدارىنىڭ 26 كانديداتى, پروفەسسورلارى مەن ساراپشىلارى بايانداما جاسايدى.
الماتى
