تۇركىستان ۇستازدارى حالىقارالىق وقىتۋ كۋرسىنا قاتىسا الادى

مۇعالىمدەرگە ارنالعان ەرەكشە كۋرسقا قالاي قاتىسۋعا بولادى؟ شەتەلدە وففلاين بىلىكتىلىكتى ارتتىرۋعا قاي مۇعالىمدەر بارا الادى؟ وسى جانە وزگە دە سۇراقتاردىڭ جاۋابى Bugin.kz سايتىندا كورسەتىلگەن.

بۇل قانداي كۋرس؟

ء«بىلىم بەرۋدەگى دامىعان ەلدەردىڭ وزىق ادىستەمەلەرى مەن تاجىريبەسىن مەڭگەرۋ» كۋرسى مۇعالىمدەرگە ارنالادى. ء«بىلىم بەرۋدى دامىتۋ ورتالىعى» كمم مەن «Daryn Teacher» ۇيىمداستىرعان جوبا تۇركىستان وبلىسىندا ىسكە اسىرىلادى. جالپى وقىتۋ كۋرسى 3 كەزەڭنەن تۇرادى. ءۇشىنشى كەزەڭگە وتكەن مۇعالىمدەر سينگاپۋر جانە مالايزيا مەملەكەتتەرىندە وتەتىن حالىقارالىق وقىتۋ كۋرستارىنا قاتىسا الادى.

پرەزيدەنت قاسىم-جومارت توقاەۆ «ادىلەتتى قازاقستان: زاڭ مەن ءتارتىپ, ەكونوميكالىق ءوسىم, قوعامدىق وپتيميزم» اتتى قازاقستان حالقىنا جولداۋىندا ەلدەگى مەكتەپتەردىڭ جۇمىسىن جاقسارتۋ شارالارىن قولعا الۋ كەرەگىن, سونىڭ ىشىندە مۇعالىمدەردىڭ بىلىكتىلىگىن دامىتۋ ماڭىزدى ەكەنىن قاداپ ايتقان.

بۇل كۋرس وسى جولداۋ مەن 2024-2025 جىلدارعا ارنالعان «بارشاعا قولجەتىمدى ساپالى ءبىلىم» ۇلتتىق بايانداماسى اياسىندا ۇيىمداستىرىلىپ وتىر.

حالىقارالىق وقىتۋ كۋرسىنىڭ مۇعالىمدەر ءۇشىن قانداي پايداسى بار؟

اتالعان كۋرسقا قاتىسۋعا نيەت بىلدىرگەن بارلىق ءپان مۇعالىمى الەم بويىنشا بىلىمنەن توپ جاراتىن جاپونيا, فينليانديا, سينگاپۋر, وڭتۇستىك كورەيا, كانادا جانە انگليا ەلدەرىنىڭ ءبىلىم بەرۋ سالاسىنداعى وزىق تاجىريبەلەرىمەن, ادىستەرىمەن تانىسادى.

سونداي-اق:

• پەداگوگيكالىق جولدى ەندى باستاعان جاس ماماندار قورجىنىن جاڭا بىلىممەن تولىقتىرادى, جاڭا تەحنولوگيا مەن ءادىس-تاسىلدەردى مەڭگەرەدى.
• كوپجىلدىق تاجىريبەسى بار ۇستازدار كۋرستان حالىقارالىق ستاندارتتارعا سايكەس وقىتۋ باعدارلاماسىن قۇرا الۋدى ۇيرەنەدى;
• سىنىپ جەتەكشىلەر بالا تاربيەسىنە قاتىستى تىڭ يدەيالار الادى;
• ءار مۇعالىم كوشباسشىلىق قابىلەتىن دامىتا الادى, جاڭا ورتامەن بايلانىس ورناتۋ ارقىلى وقىتۋ تاجىريبەسىمەن الماسادى.

ەڭ ماڭىزدىسى, مۇعالىمدەر شەتەلدەن ءبىلىم العان ۇزدىك پەدوگوگ ترەنەرلەردىڭ 10-15 جىلدىق تاجىريبەسىن سىڭىرە الادى. 

كۋرس نەشە كەزەڭنەن تۇرادى؟

جالپى وقىتۋ كۋرسى 3 كەزەڭنەن تۇرادى.

ءى كەزەڭ

حالىقارالىق وقىتۋ كۋرسىنىڭ العاشقى كەزەڭى ء«بىلىم بەرۋدەگى دامىعان ەلدەردىڭ وزىق ادىستەمەلەرى مەن تاجىريبەسىن مەڭگەرۋ» تاقىرىبىندا ونلاين فورماتتا وتەدى. ءى كەزەڭ ەكى رەت وتكىزىلەدى. ءبىرىنشىسى 16-22 قىركۇيەك اراسى, ال ەكىنشىسى 7-13 قازان ارالىعىندا وتەدى. ەكىنشى توپقا تىركەلۋ 30 قىركۇيەككە دەيىن جالعاسادى. كۋرس ۇزاقتىعى – 7 كۇن. اكادەميالىق ساعات سانى: 70-80 ساعات.
 كۋرس سينحروندى جانە اسينحروندى فورماتتا وتەدى.

7 كۇندىك وقۋ باعدارلاماسى مۇعالىمدەرگە قۇرمەت جانە قولداۋ كورسەتۋ, مورالدىق تاربيە, سىني ويلاۋ, فەنومەنگە نەگىزدەلگەن وقىتۋ, الەۋمەتتىك-ەموتسيونالدىق وقىتۋ, جان-جاقتى ءبىلىم بەرۋ, وقىتۋدىڭ جەكە تراەكتورياسى, پاندىك ينتەگراتسيا جانە جوبالىق وقىتۋ جانە وقۋشىلاردىڭ پسيحيكالىق, ەموتسيونالدىق دەنساۋلىعىن قولداۋعا باعىتتالعان تاقىرىپتار قامتىلادى.

II كەزەڭگە I كەزەڭنەن ىرىكتەلگەن پەداگوگتار عانا قاتىسا الادى. ونلاين كۋرستا ءار كۇنى وتىلگەن تاقىرىپ بويىنشا 25 تەست تاپسىرماسى ورىندالادى. جيناعان بالل ورتاق ناتيجەگە قوسىلىپ وتىرادى. كۋرس سوڭىندا ءار مۇعالىمنىڭ بارلىق كۇن بويىنشا جالپى بالى ەسەپتەلەدى. ەڭ جوعارى بالل جيناعان ءار توپتان 25 مۇعالىمنەن, بارلىعى 50 مۇعالىم ەكىنشى كەزەڭگە وتەدى. 

ءىى كەزەڭ

ءىى كەزەڭ 28 قازان مەن 3 قاراشا ارالىعىندا «پەداگوگتەردىڭ كوشباسشىلىق قابىلەتىن دامىتۋ» تاقىرىبىندا الماتى قالاسىندا وتەدى. ءى كەزەڭنەن وتكەن قاتىسۋشىلار 14-18 قازان ارالىعىندا تىركەلۋگە تيىس. وففلاين كۋرس 5 كۇندى قامتيدى. اكادەميالىق ساعات سانى: 50-60 ساعات. ەكىنشى كەزەڭگە 50 مۇعالىم عانا ىرىكتەلىپ الىنادى.

الماتىدا وتەتىن وففلاين كۋرس كەزىندە ۇستازدار قالانىڭ بەلدى مەكتەپتەرىنىڭ مۇعالىمدەرىمەن تاجىريبە الماسۋعا مۇمكىندىك الادى. ءارتۇرلى مادەني ءىس-شاراعا قاتىسىپ, قالانىڭ مادەني وشاقتارى – تەاتر, كينوستۋديا, ونەر مۇراجايلارىنا ەكسكۋرسيالار جاسايدى. ءۇشىنشى كەزەڭگە ءوتۋ ءۇشىن مۇعالىمدەر ءارتۇرلى تاپسىرمالار ورىندايدى. قازىلار القاسى مۇعالىمدەردىڭ جۇمىسىنا 1-دەن 10-عا دەيىنگى بالل بەرىپ,  ەڭ جوعارعى بالل جيناعان 10 ۇستازدى 3-ءشى كەزەڭگە وتكىزەدى. 

ءىىى كەزەڭ

ءۇشىنشى كەزەڭ 25-30 قاراشا ارالىعىندا سينگاپۋر جانە مالايزيا مەملەكەتتەرىندە وتەدى. باعدارلاما تاقىرىبى – «مۇعالىمدەردىڭ زاماناۋي جانە بولاشاقتاعى ءبىلىم بەرۋ ساپاسىن ارتتىرۋ». ىرىكتەلىپ الىنعان 10 مۇعالىم 7 كۇن بويى شەتەلدە وففلاين تۇردە ءبىلىمىن جەتىلدىرەدى. بىلىكتىلىكتى جەتىلدىرۋمەن قاتار ۇستازدارىمىز ادەمى اتموسفەرادا ءتيىمدى ۋاقىت وتكىزەدى. ءار كۇن سايىن ەكى ەلدىڭ بەلدى مەكتەپتەرى مەن ۋنيۆەرسيتتەرىنە بارىپ, ونداعى وقىتۋشىلاردىڭ وقۋ-ءبىلىم بويىنشا كاسىبي باعدارىمەن تانىسادى. سينگاپۋر مەن مالايزيانىڭ مادەني ورتالىقتارىنا ەكسكۋرسيا جاساپ, تانىمىن كەڭەيتەدى. بۇل مۇعالىمدەر ءۇشىن جاڭا تىنىس بولادى.

اعارتۋشىلىق ءارى تانىمدىق باعىتتاعى حالىقارالىق وقىتۋ كۋرسىنىڭ ءاربىر كەزەڭىنىڭ سوڭىندا باعدارلامانى تولىق اياقتاعان پەداگوگتەرگە سەرتيفيكات تابىستالادى.