سۋرەت: ru.freepik.com
ء«بىز بۇگىن جاڭا ەنەرگەتيكالىق كەزەڭنىڭ الدىندا تۇرمىز. اەس – تەك ەلەكتر قۋاتىن ءوندىرۋدىڭ سەنىمدى كوزى ەمەس, سونداي-اق ەلىمىزدىڭ ەكونوميكالىق دامۋىنىڭ قوزعاۋشى كۇشى. قازىر ءبىز ەلەكتر ەنەرگياسىنىڭ 70 پايىزىن كومىر ەلەكتر ستانسالارىنان الىپ وتىرمىز. الايدا ولاردىڭ ەكولوگيالىق تۇرعىدان ءتيىمسىز ەكەنى بەلگىلى. كومىردەن بولىنەتىن زياندى زاتتار اتموسفەراعا ايتارلىقتاي اسەر ەتەدى, ال ستانسالاردىڭ توزۋ دەڭگەيى 70 پايىزعا جەتكەن. اەس سالۋ – وسى ماسەلەلەردى شەشۋدىڭ بىردەن-ءبىر ءتيىمدى جولى. ءبىز زاماناۋي III جانە III+ بۋىن رەاكتورلارىن قولدانۋ ارقىلى قاۋىپسىزدىكتىڭ جوعارى دەڭگەيىن قامتاماسىز ەتەمىز. بۇل حالىقارالىق ستاندارتتارعا سايكەس كەلەتىن تەحنولوگيالار», دەدى ل.تۇرلاشوۆ.
كەزدەسۋ بارىسىندا «Nur kagazy» ءوندىرىس كومپانياسىنىڭ قىزمەتكەرى ءسابيت تاستەمىروۆ ەلەكتر قۋاتىنىڭ جەتىسپەۋشىلىگى, ونىڭ ءوندىرىس پەن بيزنەسكە تيگىزەتىن اسەرى تۋرالى وزىندىك ويىن ورتاعا سالدى.
«بۇگىندە ءوندىرىس ورىندارى ءۇشىن سەنىمدى ەلەكتر ەنەرگياسى اۋاداي قاجەت. 2023 جىلى ءبىز رەسەيدەن 2 ملرد كۆت/ساع ەلەكتر ەنەرگياسىن يمپورتتاۋعا ءماجبۇر بولدىق, بۇل قىرۋار قاراجاتتى قاجەت ەتتى. مۇنداي تاۋەلدىلىك ءبىزدى سىرتقى فاكتورلار الدىندا وسال ەتەدى جانە ەكونوميكامىزعا تەرىس اسەر تيگىزەدى. اەس سالۋ ارقىلى ءوزىمىزدى تۇراقتى ەنەرگيامەن قامتاماسىز ەتىپ قانا قويماي, ارتىق قۋاتتى شەتەلگە دە ساتا الامىز. بۇل ءبىزدىڭ ەكونوميكامىزدى كۇشەيتىپ, حالىقتىڭ ءومىر ءسۇرۋ ساپاسىن ارتتىرۋعا سەپتىگىن تيگىزەدى», دەدى ول.
سونىمەن قاتار ءوندىرىس مامانى اەس سالۋ ناتيجەسىندە جاڭا جۇمىس ورىندارى اشىلىپ, مەملەكەتىمىزدىڭ ەنەرگەتيكالىق ينفراقۇرىلىمى جاڭا دەڭگەيگە كوتەرىلەدى دەپ ۇمىتتەنەتىنىن ايتتى. ونىمەن قوسا ءاربىر ازاماتتى الداعى رەفەرەندۋمعا قاتىسىپ, ەلدىڭ ەنەرگەتيكالىق بولاشاعىنا ءوز ۇلەسىن قوسۋعا شاقىردى.
كەزدەسۋدە قاتىسۋشىلار ستانسا جوباسىنىڭ ەكونوميكالىق جانە ەكولوگيالىق تيىمدىلىگىن تالقىلادى. ۇجىم مۇشەلەرى اتوم ەنەرگەتيكاسىنىڭ ەل بولاشاعى ءۇشىن ماڭىزدىلىعىن ءتۇسىنىپ, ونى قولداۋعا دايىن ەكەندەرىن ءبىلدىردى.
ەلمەن ەمەن-جارقىن جۇزدەسىپ, پىكىرلەسكەن حالىق شتابى مۇشەلەرىنىڭ باستى ماقساتى – ازاماتتارعا اەس قۇرىلىسىنىڭ ماڭىزى مەن ونىڭ ەلگە اكەلەتىن پايداسى تۋرالى جان-جاقتى اقپارات بەرۋ. وسىلايشا, الداعى رەفەرەندۋمعا قاتىسۋعا جانە ەلدىڭ ەنەرگەتيكالىق بولاشاعىن انىقتاۋعا اتسالىسۋعا شاقىردى.
الماتى وبلىسى
