جاساندى زەردە جازعان العاشقى رومانداردىڭ ءبىرى – «The Day A Computer Writes A Novel». قازاقشالاساق, «كومپيۋتەر رومان جازعان كۇن». بۇل شىعارما 2016 جىلى جاپونياداعى حوشي سينيچي اتىنداعى ادەبي بايقاۋعا قاتىسىپ, ءبىرىنشى كەزەڭنەن وتكەن. روماندا ادامداردىڭ كومپيۋتەرمەن قارىم-قاتىناسى تۋرالى, سونداي-اق بولاشاقتا روبوتتاردىڭ ادام ومىرىنە قالاي اسەر ەتەتىنى تۋرالى باياندالعان.
ەڭ كىشكەنتاي كىتاپ
كاناداداعى «Simon Fraser» ۋنيۆەرسيتەتىنىڭ عالىمدارى جاساعان الەمدەگى ەڭ كىشكەنتاي كىتاپتىڭ اتاۋى – «Teeny Ted from Turnip Town».
گيننەسس رەكوردتار كىتابىنا ەنگەن بۇل ەرەكشە كىتاپ 2007 جىلى جارىق كوردى. ولشەمى 0,07 مم عانا بولعاندىقتان, ونى تەك ميكروسكوپپەن وقۋعا بولادى. شىعارماداعى ارىپتەردى نانوتەحنولوگيا كومەگىمەن كرەمني كريستالدارىنا ويىپ جازعان. البەتتە, شاعىن كىتاپتىڭ مازمۇنى دا بار. بالالارعا ارنالعان ەرتەگىدە تەد اتتى ءجاسوسپىرىمنىڭ ءومىرى باياندالادى. كىتاپ اۆتورى – مالكولم دۋگلاس چاپلين. ال باسپاگەر – روبەرت چاپلين.
ەڭ ۇلكەن كىتاپحانا
ۆاشينگتوندا ورنالاسقان كونگرەسس كىتاپحاناسى – الەمدەگى ەڭ ۇلكەن كىتاپحانا.
بۇگىندە كىتاپحانا قورىندا 470 تىلدەگى 38 ميلليوننان استام كىتاپ بار, ال سورەلەردىڭ جالپى ۇزىندىعى 1200 شاقىرىمعا جەتەدى. تاعى ءبىر تاڭعالارلىعى, مۇندا 3600 قىزمەتكەر جۇمىس ىستەيدى. بۇل مەكەمە تەك كىتاپتاردى عانا ەمەس باسقا دا قۇندى ماتەريالداردى ساقتايدى. وندا 3,6 ميلليون اۋديو, 14 ميلليون فوتوسۋرەت, 5,5 ميلليون گەوگرافيالىق كارتا, 8,1 ميلليون مۋزىكالىق جيناق, 70 ميلليون قولجازبا بار.
