اۋىل شارۋاشىلىعى باسقارماسىنىڭ دەرەكتەرىنە قاراعاندا, 2,4 ملن گەكتار القاپتىڭ ءداندى داقىلدارى باستىرىلىپ الىنعان. قازىر كۇزگى دالا جۇمىستارى ورمەك جۇزىنەن اۋىپ كەتتى. وڭىردەگى گەكتار بەرەكەسى 13 تسەنتنەردەن اينالىپ جاتىر. 3,1 ملن توننا استىق جينالدى.
كەيىنگى بىرنەشە جىل بويى اۋا رايىنىڭ قولايسىزدىعىنان ديقاندار قانشا تەر توككەنىمەن, تولىمدى تابىسقا قول جەتكىزە الماي, جىگەرلەرى قۇم بولىپ ءجۇر ەدى. بيىل كوكتەن ءيىپ, جەردەن بەردى.
«كوكتەمدە 11 مىڭ گەكتار القاپقا ءداندى داقىلدار تۇقىمىن سەپتىك, – دەيدى «Namys group» سەرىكتەستىگىنىڭ ديرەكتورى ەردەن ەلەۋوۆ. – ونىڭ 5 مىڭ گەكتارى ءداندى داقىلدار بولسا, مايلى داقىلدار مەن بۇرشاق 4 مىڭ گەكتار القاپقا ەگىلدى. بيداي بىتىك شىقتى. كۇزگى وراققا الىمدىلىعى جوعارى 12 كومباين قاتىستىرىلىپ جاتىر».
ماساقتارى كەرە قارىس اقىق ءدان تۇنعان القاپ ءلۇپ ەتكەن سامال جەلمەن تەڭىزدەي تۋلايدى. ارامشوپتەن ادا.
«مۇنداي بىتىك وسكەن ەگىن كوپتەن بەرى ىرىزدىق بولىپ ۇيىرىلە قويماپ ەدى, – دەيدى مەحانيزاتور بەسلان مۋسيەۆ. – ءونىم جوعارى بولعان سوڭ, مەحانيزاتورلاردىڭ دا كوڭىلى كوتەرىڭكى. تاۋلىگىنە 150 توننا استىق باستىرامىز. بەس جىلدان بەرى كومباينشى بولىپ جۇمىس ىستەپ كەلەمىن. بيىلعى ەڭ ۇلكەن تابىس ارپا القاپتارىنان بۇيىردى. گەكتار بەرەكەسى 60 تسەنتنەردەن اينالدى. مەملەكەتتىڭ قولداۋىنىڭ ارقاسىندا جانار-جاعارمايدان تاپشىلىق جوق».
قازىر وسى اۋدانداعى «ديقان پليۋس» سەرىكتەستىگىندە 200-دەن اسا ادام قاۋىرت جۇمىسقا كىرىسكەن. كوكتەمدە 23 مىڭ گەكتار القاپقا ەگىن ەگىلىپتى. ونىڭ 12 مىڭ گەكتارى – بيداي. قالعانى – مايلى داقىلدار. ىرىسى مول جىلى گەكتار بەرەكەسى 30 تسەنتنەردەن اينالۋدا.
«بارلىق جۇمىس مەحانيكالاندىرىلعان. بۇرىنعىداي ەمەس, قازىر ەگىستىك القاپتاردىڭ جاي-كۇيىن, وڭدەۋدەن قاشان جانە قالاي وتكەنىن, الدىڭعى جىلدارداعى گەكتار بەرەكەسىن كورىپ, تالداي الامىز, – دەيدى سەرىكتەستىك ديرەكتورى دەنيس شۆايبوۆيچ. – ءاربىر كومبايننىڭ باستىرعان استىعىنىڭ ساپاسى مەن ەسەبى جۇرگىزىلەدى. كورسەتكىشتەردى ەسەپتەيتىن اۆتوماتتاندىرىلعان جۇيە قىرماندارعا دا قويىلعان».
ديقاندارمەن ديدارلاسقان وبلىس اكىمى مارات احمەتجانوۆتىڭ ايتۋىنشا, وڭىردەگى اگروونەركاسىپ كەشەنىن قولداۋعا شامامەن 130 ملرد تەڭگە قاراجات بولىنگەن. سۋبسيديا مولشەرى – 46,5 ملرد تەڭگە. ماسەلەلەردى جەدەل شەشۋ ءۇشىن وبلىستىق اكىمدىكتە كۇزگى دالا جۇمىستارىن ۇيلەستىرۋ جونىندە جەدەل شتاب قۇرىلعان.
«باستى مىندەت – كۇزگى دالا جۇمىستارىن ۇيلەسىمدى ۇيىمداستىرىپ, جەردە ونگەندى جەردە قالدىرماۋ, – دەيدى وبلىس اكىمى مارات احمەتجانوۆ. – قىرمانعا جەتكىزىلگەن قىزىل ءدان – ەل ىرىسى».
مەملەكەتتىك قولداۋدىڭ ارقاسىندا كوسەگەسى كوگەرىپ كەلە جاتقان دالا ەرلەرىنىڭ جالعىز-اق الاڭدايتىن تۇسى – اۋا رايى. ەندى ءبىر-ەكى اپتا اشىق بولسا, ىرىزدىقتىڭ مول بولارى داۋسىز.
اقمولا وبلىسى,
زەرەندى اۋدانى
