س.وتەباەۆ اتىنداعى اتىراۋ مۇناي جانە گاز ۋنيۆەرسيتەتىندە وقىتۋشىلارمەن, وڭىردەگى جوعارى وقۋ ورىندارىنىڭ جاس عالىمدارىمەن كەزدەسۋ ۇيىمداستىرىلدى. شتاب مۇشەلەرى عىلىمدى دامىتۋ جانە عالىمدارعا الەۋمەتتىك قولداۋ كورسەتۋ ماسەلەسى مەملەكەت باسشىسىنىڭ نازارىندا ەكەنىن اتاپ ءوتتى. قازىر عىلىمي قوعامداستىقتىڭ الدىندا ونەركاسىپتىك وندىرىسكە يننوۆاتسيالىق تەحنولوگيالار مەن ازىرلەمەلەردى ەنگىزۋگە قاتىستى ۇلكەن مىندەت تۇر.
يادرولىق فيزيكا ينستيتۋتىنىڭ باس ديرەكتورى سايابەك ساحيەۆ اتاپ وتكەندەي, حالىق شتابىنىڭ وڭىرلەرگە ساپارىنىڭ باستى ماقساتى – تۇرعىندارمەن اشىق ءارى شىنايى اڭگىمەلەسۋ.
«الەم ءبىر ورىندا تۇرمايدى. ەلىمىز دە العا قادام باسىپ كەلەدى. ءبىز تۇرعىندارعا اتوم سالاسىندا, اتوم ەنەرگەتيكاسىندا قانداي جاڭالىقتار بار ەكەنىن ايتىپ, ەلىمىزدىڭ جەتكەن جەتىستىكتەرمەن بولىسكىمىز كەلەدى. الەمنىڭ اجىراماس بولىگى رەتىندە ءبىزدىڭ دە ايتۋعا, ماقتانۋعا جانە كورسەتۋگە تۇرارلىق جەتىستىكتەرىمىز بار. اتوم ەنەرگەتيكاسى تەك اتوم ەلەكتر ستانساسى عانا ەمەس, سونىمەن قاتار ول ەكونوميكانىڭ كەز كەلگەن سالاسىندا قولدانىلادى. بۇل تۋرالى اتىراۋ وبلىسىنىڭ تۇرعىندارىمەن سويلەستىك, ولاردىڭ پىكىرىن بىلدىك», دەدى س.ساحيەۆ.
اتىراۋ جەو ۇجىمىمەن كەزدەسۋدە شتاب مۇشەلەرى تكش جۇيەلەرىنىڭ قالىپتى جۇمىس ىستەۋىنە تۇراقتى ءارى سەنىمدى ەنەرگيا كوزى قاجەت ەكەنىن ايتتى. بۇگىندە اتىراۋ وبلىسى ەڭ جوعارى جۇكتەمەلەر كەزىندە كوپ جاعدايدا رەسەيدەن جەتكىزىلەتىن ەنەرگياعا تاۋەلدى. قىرۋار قارجىلىق شىعىننان بولەك, ەنەرگيا جەتىسپەۋشىلىگى وندىرىستىك مىندەتتەردى دە شەشۋگە مۇمكىندىك بەرمەيدى. جۋىردا ەلىمىزدىڭ باتىس وڭىرلەرىن بىرىڭعاي ەنەرگيا جۇيەسىنە قوسۋ جۇمىسى باستالادى.
پروپيلەن وندىرەتىن «Kazakhstan Petrochemical Industries Inc.» جشس زاۋىتىندا شتاب مۇشەلەرى مۇناي-گاز جانە حيميا ونەركاسىبى وكىلدەرىمەن جۇزدەستى. جوعارى تەحنولوگيالىق ونەركاسىپتىك ءوندىرىستى ودان ءارى دامىتۋدىڭ جانە پرەزيدەنتتىڭ 2029 جىلعا قاراي ەلدەگى ءىجو-ءنى ەكى ەسە ارتتىرۋ تۋرالى تاپسىرماسىن ورىنداۋدىڭ باستى فاكتورى – سەنىمدى ءارى تۇراقتى ەنەرگيا كوزى.
بۇدان سوڭ شتاب مۇشەلەرى «داۋلەت» يندۋستريالىق ايماعى كاسىپورىندارىنىڭ قىزمەتكەرلەرىمەن كەزدەستى. مۇندا كيىم تىگەتىن, نان, كونديتەرلىك, ماكارون ونىمدەرىن, ەت كونسەرۆىلەرىن, اۋىزسۋ, قۇرىلىس قوسپالارىن, تاعى دا باسقا زاتتاردى وندىرەتىن كومپانيالار جۇمىس ىستەيدى. وزگە وڭىرلەردەگى سەكىلدى مۇنداعى بيزنەس وكىلدەرى دە قازىرگى ەنەرگيا تاپشىلىعى جاڭا تەحنولوگيالاردى ىسكە قوسۋعا مۇمكىندىك بەرمەيتىنىن, ءوندىرىستىڭ دامۋىن تەجەيتىنىن جەتكىزدى. ولاردىڭ ايتۋىنشا, كوپتەگەن الەۋەتى زور جوبالاردىڭ ەلەكتر ەنەرگياسىنىڭ تاپشىلىعىنا بايلانىستى جۇزەگە اسىرىلۋى مۇمكىن بولماي كەلەدى.
