بۇل تەحنيكا 15-20 ادامنىڭ جۇمىسىن اتقارادى. تەحنيكا اسكەري تانك ۇلگىسىندە جاسالعان. جاڭالىققا جانى قۇمار جىگىتتە قىتايدا شىعارىلعان تەحنيكانىڭ ەكەۋى بار.
«بىرنەشە جىلدان بەرى جەكە كاسىپپەن اينالىسىپ ءجۇرمىن. بيىل اتىراۋ قالاسىنىڭ ماڭىنداعى كەڭوزەك, العاباس ەلدى مەكەنىنىڭ كوشەسىندە وسكەن ارام ءشوپتى شابۋ كونكۋرسىنا قاتىسقان ەدىم. بۇل ءىستى اتقارۋ ءۇشىن بىرنەشە ادامدى جۇمىسقا تارتتىم. جۇمىسشىلار ءارامشوپتى تريممەر اپپاراتىمەن شاپتى. بىراق اپتاپ ىستىقتا ءارامشوپتى شابۋ وڭاي ەمەس. وعان قوسا تۇراقتى ىستەيتىن جۇمىسشىلاردى تابۋ قيىن. وسىنداي سەبەپپەن, ينتەرنەتتەن ءشوپ شاباتىن تەحنيكانى ىزدەستىردىم. سونداي ەكى تەحنيكانى قىتايعا بارىپ, ساتىپ الىپ كەلدىم», دەيدى باعىتجان دوسانوۆ.
ونىڭ ايتۋىنا قاراعاندا, «تانكتە» 200 اتتىڭ كۇشى بار. ال سالماعى – 400 كيلو.
«بۇل تەحنيكامەن كەز كەلگەن ءشوپتى شابۋعا بولادى. تەحنيكا پۋلتپەن باسقارىلادى. سول سەبەپتەن, 50-60 مەتر قاشىقتان باسقارۋ مۇمكىندىگى بار. شىنجىر تاباندى «تانك» جول تالعامايدى. سۋ ايدىندارىنىڭ جاعاسىنان دا, باتپاقتا جەردەن دە ءشوپ شابۋعا بولادى. تەحنيكانىڭ بارلىق ارەكەتى پۋلتپەن رەتتەلەدى», دەيدى ول.
ءبىر ەرەكشەلىگى, «تانك» شابىلعان ءشوپتى ۋاتىپ جىبەرەدى. ال قىستا جاياۋ ادامعا ارنالعان جولدىڭ قارىن كۇرەۋگە بولادى. ءشوپ شاپقاندا, نە قار كۇرەگەندە بەنزين قۇيادى. ءبىر كوشەدەن ەكىنشىسىنە جەتكىزۋ ءۇشىن اككۋمۋلياتور قولدانادى. الداعى ۋاقىتتا جۇمىس اۋقىمى كوبەيسە, تاعى وسىنداي تەحنيكانىڭ بىرنەشەۋىن ساتىپ اكەلۋدى كوزدەپ وتىر.
اتىراۋ وبلىسى
