قاراقابا قورىمى كاتونقاراعايدان مارقاكول وڭىرىنە اسا بەرىستەگى تاۋ باسىنداعى كەڭ جازيرا جازىقتا. جازىقتىڭ ءبىر بۇيىرىنەن قابا وزەنى جىلىستاپ, مارقاكولگە قۇيادى. تاۋ بيىگىندەگى جازىقپەن شىعىسقا تىكە تارتساڭ, قىتاي مەن رەسەيدىڭ شەكاراسىنا تىرەلەسىز. ماڭداي تۇسىڭىزدان حرۋستال شوقىسى جارقىرايدى. وسىدان باستاپ سارىمساقتى جوتاسىنا دەيىنگى اتىراپ تارباعاتاي دەپ اتالادى. بەرەل مۋزەيىندە تۇرعان بەلدىكتىڭ جاپسىرماسى تۋرا وسى تۇستاعى قازبا جۇمىستارىنان تابىلعان. اتاقتى ارحەولوگ زەينوللا ساماشەۆ جۇرگىزگەن قاراقابا قورىمىنان تابىلعان قۇندى جادىگەرلەر از ەمەس.
№9 قورعاندا جەرلەنگەندەردىڭ قورعانىش قۇرالدارىنىڭ بەلدىكتەرى ارنايى جاپسىرمالارمەن اشەكەيلەنىپتى. ادام باسى بەينەلەنگەن جاپسىرمانىڭ شەتتەرى دوڭگەلەنگەن, ۇلكەن ءتورتبۇرىشتى ساڭىلاۋلارى بار. كوزدىڭ, مۇرىننىڭ, قاستىڭ, اۋىزدىڭ, قۇلاقتىڭ ەرەكشەلىكتەرى ەگجەي-تەگجەيلى وڭدەلگەن. اشەكەي التىن جالاتىلعان كۇمىس مەتالدان جاسالىپتى.
بەرەل-قورىق مۋزەيىنىڭ قور ساقتاۋشى مامانى جانات ەرلانقىزىنىڭ ايتۋىنشا, بەلدىكتىڭ التىن ءتۇستى جاپسىرماسى تۇركى داۋىرىندەگى جاۋىنگەردىڭ بىرىنە تيەسىلى بولعان. ولشەمى – 2,5 سانتيمەتر. تاريحقا, ارحەولوگياعا قىزىققان وقىرمان بۇل جادىگەردىڭ تۇپنۇسقاسىن كاتونقاراعاي اۋدانى اۋماعىندا ورنالاسقان بەرەل-قورىق مۋزەيىنەن كورە الادى. بۇل جادىگەردەن باسقا دا مىڭداعان ارحەولوگيالىق ولجا بار.
