جاڭا وقۋ جىلىنان باستاپ تسەلينوگراد اۋدانىندا ءۇشىنشى جايلى مەكتەپ اشىلىپ, اتا-انالاردى قۋانىشقا بولەپ وتىر. ءبىلىم وشاعى زامان تالابىنا ساي جابدىقتالعان. قوسىمشا ءبىلىم بەرۋ ساباقتارىن وتكىزۋگە ارنالعان كابينەتتەر, حورەوگرافيادان روبوتتەحنيكاعا دەيىنگى ءارتۇرلى ۇيىرمە جۇمىس ىستەيدى. قاۋىپسىزدىك كامەرالارى مەن دابىل تۇيمەلەرى ورناتىلعان.
وبلىس اكىمى مارات احمەتجانوۆ قاراوتكەلگە ارنايى كەلىپ, مەكتەپ وقۋشىلارىن ءبىلىم وشاعىنىڭ اشىلۋىمەن قۇتتىقتادى.
– «جايلى مەكتەپ» جوباسى مەكتەپتەردە ورىن تاپشىلىعى ماسەلەسىن شەشەدى, – دەدى وبلىس اكىمى, – قالا مەن اۋىل مەكتەپتەرى اراسىنداعى الشاقتىقتى ازايتادى. وسكەلەڭ ۇرپاقتىڭ ۇيلەسىمدى جانە باقىتتى بالالىق شاعى – جالپىۇلتتىق مىندەت.
وسى ۋاقىتقا دەيىن مەكتەپتەگى ورىن تاپشىلىعىن سەزىنىپ كەلگەن اۋىل تۇرعىندارى دا اق تۇيەنىڭ قارنى جارىلعان ادەمى وقيعاعا رازى.
– ءبىز اۋىلدا ەلوردا مەكتەپتەرىنەن سىنىق سۇيەم كەم تۇسپەيتىن وسىنداي زاماناۋي ءارى ادەمى مەكتەپ اشىلادى دەپ ويلاماعان ەدىك. ەل پرەزيدەنتىنىڭ بولاشاق قامىن ويلاپ, جاساپ جاتقان قامقورلىعىنا شىن جۇرەكتەن ريزامىز, – دەيدى اۋىل تۇرعىنى گۇلنۇر امانوۆا.
ءبىلىم وشاعىندا جاس جول ينسپەكتورلارىنىڭ كابينەتى, سونداي-اق كامەلەتكە تولماعاندار اراسىنداعى قۇقىق بۇزۋشىلىقتاردىڭ الدىن الۋ بويىنشا ۆەدومستۆوارالىق ءوزارا ءىس-قيمىل جانە ء«بىرتۇتاس تاربيە» بىرىڭعاي تاربيە باعدارلاماسى اياسىندا اشىلعان «سكۋد», «Alaqan» مەكتەپتەرىنىڭ قاۋىپسىزدىك جۇيەلەرى تانىستىرىلدى. مۇنداي سىنىپتىڭ اشىلۋى, ەڭ الدىمەن, پاتريوتيزم مەن وتانعا دەگەن سۇيىسپەنشىلىكتى تاربيەلەۋگە, مەكتەپ ورتاسىندا قۇقىق بۇزۋشىلىقتاردىڭ الدىن الۋعا, وعان قوسا ماماندىق تاڭداۋعا كومەكتەسۋگە باعىتتالعان.
جىل سوڭىنا دەيىن وڭىردە 10 مەكتەپ پايدالانۋعا بەرىلمەك. ونىڭ التاۋى جايلى مەكتەپ ساناتىندا.
اقمولا وبلىسى,
تسەلينوگراد اۋدانى
