ورتالىق پرەزيدەنت جانىنداعى ۇلتتىق عىلىم اكادەمياسى مەن قازاقستان-نەمىس ۋنيۆەرسيتەتىنىڭ (قنۋ) سەرىكتەستىگى نەگىزىندە قۇرىلدى.
اشىلۋ رەسىمى پرەزيدەنت جانىنداعى ۇلتتىق عىلىم اكادەمياسىنىڭ پرەزيدەنتى, پروفەسسور, دوكتور اقىلبەك كۇرىشباەۆ پەن قازاقستان-نەمىس ۋنيۆەرسيتەتىنىڭ پرەزيدەنتى, پروفەسسور, دوكتور ۆولراد روممەلدىڭ قۇتتىقتاۋ سوزدەرىمەن باستالىپ, ورتالىقتىڭ ەكى ەل اراسىنداعى عىلىمي بايلانىستاردى كەڭەيتۋگە, بىرلەسكەن زەرتتەۋ جوبالارىن جۇزەگە اسىرۋعا جانە عىلىم مەن تەحنولوگيانىڭ ءتۇرلى سالالارىنا يننوۆاتسيالاردى ەنگىزۋگە ستراتەگيالىق ماڭىزدىلىعىن اتاپ ءوتتى.
اكادەميانىڭ جاڭارتىلعان عيماراتىندا جۇزەگە اسىرىلعان العاشقى حالىقارالىق جوبا رەتىندە KGRCC-ءتىڭ اشىلۋى اكادەميا تاريحىندا ەرەكشە ماڭىزعا يە بولماق.
راسىمگە قازاقستان مەن گەرمانيانىڭ عىلىمي جانە ءبىلىم بەرۋ سالالارىنىڭ جوعارى دارەجەلى وكىلدەرى, سونىڭ ىشىندە ۇلتتىق عىلىم اكادەمياسى مەن قازاقستان-نەمىس ۋنيۆەرسيتەتىنىڭ باسشىلىعى قاتىستى. ءىس-شارا نەمىس زەرتتەۋ قوعامىنىڭ (DFG) حالىقارالىق بايلانىستار ءبولىمىنىڭ جەتەكشىسى, دوكتور يورگ شنايدەر باستاعان دەلەگاتسيامەن جۇمىس كەزدەسۋىمەن جالعاستى. گەرمانيانىڭ عىلىمي ءوزىن-ءوزى باسقارۋ ۇيىمى رەتىندە تانىلعان DFG ۋنيۆەرسيتەتتەر مەن عىلىمي-زەرتتەۋ مەكەمەلەرىندەگى عىلىمي جوبالاردى قارجىلاندىرۋ ارقىلى عىلىمنىڭ بارلىق سالالارىنا قولداۋ كورسەتەدى. سونىمەن قاتار جاس عالىمداردى قولداۋ مەن عىلىمداعى گەندەرلىك تەڭدىكتى قامتاماسىز ەتۋگە ەرەكشە كوڭىل بولىنەدى.
كەزدەسۋ بارىسىندا قازاقستان مەن گەرمانيا اراسىنداعى عىلىمي ىنتىماقتاستىقتى كەڭەيتۋ پەرسپەكتيۆالارى, بىرلەسكەن زەرتتەۋ جوبالارىن قارجىلاندىرۋ جانە ەكى ەل عالىمدارى ءۇشىن جەلىلىك باستامالاردى قۇرۋ مۇمكىندىكتەرى تالقىلانىپ, قازاق-نەمىس عىلىمي-زەرتتەۋ ىنتىماقتاستىق ورتالىعىن (KGRCC) قۇرۋ تۋرالى رەسمي كەلىسىمگە قول قويىلدى.
KGRCC وزىق زەرتتەۋ جوبالارىن جۇزەگە اسىرۋعا, قازاقستان مەن گەرمانيا اراسىنداعى اكادەميالىق جانە عىلىمي بايلانىستاردى نىعايتۋعا, سونداي-اق ۇزاق مەرزىمدى حالىقارالىق عىلىمي ارىپتەستىكتەردى دامىتۋعا باعىتتالعان پلاتفورماعا اينالارى ءسوزسىز.
الماتى
