فوتو: ءماجىلىستىڭ ءباسپاسوز قىزمەتى
نارتاي ارالباي ۇلى بەيبىت كۇندە قازاق ساربازدارى ءتۇرلى دەنە جاراقاتىن الىپ, ءتىپتى كەيبىرەۋى قايتىس بولىپ جاتقانىن تىلگە تيەك ەتتى.
«بۇل ءبىر ەمەس, بىرنەشە رەت قايتالانىپ جاتقان جاعداي. وسىنىڭ سالدارىنان ايىپپۇل سالماق تۇگىلى ايىپ تاقساڭ دا ەشكىم باۋىر ەتى بالاسىن جاستار جان تاپسىرعان ورتا – اسكەر قاتارىنا جىبەرگىسى كەلمەيدى», دەپ ءسوزىن باستادى دەپۋتات.
ماجىلىسمەن كەلتىرگەن ساندىق دەرەكتەرگە زەر سالساق, سوڭعى ءۇش جىلدا قازاقستاندا 270 اسكەري قىزمەتكەر قايتىس بولعان, ال سوڭعى ءتورت جىلدا اسكەردە 86 سۋيتسيد تىركەلگەن. تاعى 20 اسكەري ادام سۋيتسيدكە وقتالعان.
«2023 جىلعى تامىزدا اسكەري بولىمشەلەردىڭ بىرىندە كوماندير اسكەرگە جاڭادان كەلگەن ساربازدى ورىندىقپەن ۇرىپ, سوققىعا جىققان. ال 2024 جىلدىڭ ماۋسىم ايىندا جامبىل وبلىسىنىڭ ءبىر اسكەري بولىمشەسىندە اسكەردە جۇرگەنىنە 1-اق اي بولعان سارباز ەس-ءتۇسسىز جانساقتاۋ بولىمىنە تۇسكەن. تاياۋدا بولعان جاعداي بۇكىل وتانداسىمىزدىڭ اشۋ-ىزاسىن تۋعىزعانى حاق. ۇلتتىق ۇلان جاۋىنگەرى ەربايان مۇحتار باسىنان العان جاراقاتتان بەس اي بويى ەس-ءتۇسسىز جاتىر. جاۋاپتىلار بولسا جاۋاپكەرشىلىكتەن جالتارىپ, «ەربايان دارەتحاناعا قۇلاپ, جاراقاتتاندى» دەيدى. بۇعان كىم سەنەدى؟ جاراقاتتىڭ سالدارىنان ساربازدىڭ باسىنىڭ جارتىسىن الىپ تاستاۋعا تۋرا كەلگەن. ەندى وعان تۇراقتى كۇتىم قاجەت», دەپ كۇرسىندى نارتاي ارالباي ۇلى.
ول 7 قىركۇيەك كۇنى اقتاۋداعى گورنيزوندا مارات بارقۇلوۆ ەسىمدى سارباز كوز جۇمعانىن ەسكە سالدى. ونى وفيتسەر اتىپ تاستاعان. بىراق بۇل قاساقانا جاسالعان ارەكەت پە, الدە جازاتايىم وقيعا ما؟ اتالعان سۇراقتىڭ جاۋابىن تەرگەۋ ورىندارى ءالى بەوگەن جوق.
«مەملەكەت باسشىسى بيىلعى جولداۋىندا: ء«ار اتا-انا اسكەرگە كەتكەن بالاسىن مەملەكەتكە سەنىپ تاپسىرادى. سوندىقتان ساربازداردىڭ دەنساۋلىعى مەن قاۋىپسىزدىگىنە, ەڭ الدىمەن, ارميا باسشىلىعى جانە قۇقىق قورعاۋ مەكەمەلەرىنىڭ باسشىلارى جاۋاپتى», دەگەن ەدى. وكىنىشكە قاراي, ارمياداعى جاعداي بۇعان مۇلدەم كەرەعار بولىپ تۇر. بىلتىر قورعانىس مينيسترلىگى اسكەري بولىمدەردە 50 مىڭنان استام بەينەكامەرا ورناتىلعانىن حابارلادى. ونداعى جازبالار قايدا؟ الدە ەربايان سەكىلدى باۋىرلارىمىز جاراقات الىپ جاتقاندا الگى كامەرالار تەرىس قاراپ قالدى ما؟», دەدى دەپۋتات.
ايتا كەتەيىك, «Amanat» پارتياسى اسكەردەگى الىمجەتتىك ماسەلەسىن 2022 جىلى كوتەرگەن ەدى. الايدا جاعداي تۇزەلمەك تۇگىلى, ۋشىعىپ كەتتى دەسە دە بولادى. ساربازداردىڭ اسكەردە جاراقات الىپ, قايتىس بولۋ فاكتىلەرى تەك ارتىپ وتىر.
نارتاي ارالباي ۇلىنىڭ پىكىرىنشە, بۇگىندە اسكەري قىزمەتكەرلەردىڭ الەۋمەتتىك جاعدايى تومەن, ال بۇل جاعدايدى تۇزەتۋ كەزەك كۇتتىرمەيتىن ماسەلە.
وسى تۇستا ماجىلىسمەن رۋسلان جاقسىلىقوۆتى ماڭىزدى ءارى ءتيىمدى شاپرالاردى قولعا الۋدى سۇرادى.
«قورىتا كەلە, سىزدەن كەلەسى شارالاردى قولعا الۋدى ۇسىنامىن. ەلىمىزدىڭ ارمياسىنداعى اتالعان كەلەڭسىزدىكتى تىيۋ جانە ونىڭ الدىن الۋ بويىنشا ناقتى شارالار قابىلداۋ قاجەت. سونداي-اق اسكەريلەردىڭ الەۋمەتتىك جاعدايىن جاقسارتۋعا باعىتتالعان ءىس-ارەكەتتەردى كۇشەيتۋ كەرەك», دەپ ءسوزىن اياقتادى دەپۋتات.
