جۇمىس ۇدەرىسى تۇگەل اۆتوماتتاندىرىلعان
جىل وتكەن سايىن شەبەرلىگىن شىڭداپ, وتاندىق كاسىپكەرلىكتىڭ دامۋىنا سۇبەلى ۇلەس قوسىپ كەلەدى. تالعار قالاسىندا ورنالاسقان ءىرى تىگىن فابريكاسى 10 مىڭ شارشى مەتر اۋماقتى الىپ جاتىر. نەگىزگى 4 ءوندىرىس جەلىسىنەن (پيدجاك, شالبار, جەيدە جانە توقىلعان بۇيىمدار) تۇراتىن وتاندىق فابريكادا 250 جۇمىسشى بار. ون ساۋساعى ىسكە يكەمدى شەبەرلەر تاۋلىگىنە 2 مىڭنىڭ ماڭايىندا كيىم تىگىپ, ساۋدا سورەسىنە دايىنداپ شىعارادى.
تالعار تۇرعىندارىن تۇراقتى ەڭبەكپەن قامتىپ وتىرعان كاسىپورىننىڭ مەكتەپ وقۋشىلارىنا ارناپ تىككەن فورماسى جوعارى ساپاسىمەن سۇرانىسقا يە. سونىمەن قاتار اۋە كومپانيالارى مەن ۇلتتىق كومپانيالار, كوممەرتسيالىق نىساندار, بانكتەر مەن مەيرامحانا, كۇزەت قۇرىلىمدارى قىزمەتكەرلەرىنە ارنايى تىگىلگەن ۋنيفورمالارىنا ەلىمىزدىڭ ءار تۇكپىرىنەن تاپسىرىس تۇسەدى. فابريكا ونىمدەرى ەلدىڭ بارلىق ايماعىن قامتيتىن 41 فيرمالىق دۇكەندە ساۋدالانادى.
«كومپانيا ەڭبەككەرلەرىن ءوز ءىسىنىڭ شەبەرلەرى دەپ ايتۋعا نەگىز بار. ونىمدىلىك ارتىپ كەلەدى. جۇمىس ءتارتىبى مەن رەتى كۇندەلىكتى قاداعالانىپ وتىرادى. وزىق تەحنولوگيا ەنگىزىلگەن كاسىپورىن تولىعىمەن اۆتوماتتاندىرىلعان. وتكەن جىلى 41 مىڭنان استام كيىم تىگىلىپ, دۇكەن سورەلەرىنە جونەلتىلدى. وسى جىلدىڭ جوسپارى بويىنشا 120 مىڭ بىرلىك كيىم تىگۋ كوزدەلگەن. قىركۇيەك ايىندا فابريكا تىگىنشىلەرى 7 مىڭ بىرلىك كيىم تىگىپ شىعاردى. دەگەنمەن ءوندىرىستى وركەندەتۋدە شيكىزات ماسەلەسى قولبايلاۋ ەكەنى بەلگىلى. كيىم تىگۋگە قاجەت ماتالار مەن جىپتەر تۇركيا, قىتاي, ەۋروپا ەلدەرىنەن ساتىپ الىنادى», دەيدى «Glasman» جشس ديرەكتورى انۆار حيلاجەۆ.
وتاندىق جەڭىل ونەركاسىپتىڭ تاسىن ورگە دومالاتىپ وتىرعان فابريكادا جۇمىس ۇدەرىسى تولىقتاي اۆتوماتتاندىرىلعان. وزىق تەحنولوگيالاردى پايدالانۋ ارقىلى ەڭبەك ونىمدىلىگى ارتىپ قانا قويعان جوق, سونىمەن قاتار جوعارى ساپاعا قول جەتكىزۋ مۇمكىندىگى دە تۋدى. فابريكا ءونىمى ءساندى دە ساپالى بولىپ شىعۋى ءۇشىن بىرنەشە ساتىدان وتەدى. ايتالىق, كيىمگە قاجەت ماتا الدىمەن جوعارى تەمپەراتۋرادا وڭدەلىپ, ەكى تاۋلىك قوزعالىسسىز ساقتالادى. ودان سوڭ باقىلاۋشى ماماندار ماتادا اقاۋدىڭ بار-جوعىن تەكسەرىستەن وتكىزەدى. ماتانىڭ ءار ورامىنا شتريح-كود بەرىلىپ, مالىمەتتەر بازاعا جۇكتەلگەننەن كەيىن عانا ديزاينەر ەلەكتروندى تۇردە ماتاعا ورنەك سالۋدى باستايدى.
فابريكا تىگىنشىلەرى ماتانى قولمەن كەسۋ دەگەندى ۇمىتقالى قاشان؟! زاماناۋي قۇرىلعى دايىندالعان ۇلگىلەردى اۆتوماتتى تۇردە ازىرلەيدى. سونىڭ ناتيجەسىندە كەمشىلىكتەر مەن قاتەلىكتەرگە جول بەرۋ ازايعان. الايدا ماماندار دايىن ۇلگىنى تاعى ءبىر تەكسەرىستەن وتكىزۋدى ۇمىتپايدى. وسىدان كەيىن عانا كەسىلگەن ماتا ۇلگىلەرى تىگىن تسەحىنا جىبەرىلەدى. مۇندا ۇلگىلەر جەكە بولىكتەرگە ءبولىنىپ, قالتاسى, اكسەسسۋارى, بەلبەۋى مەن تۇيمەسىن تاعۋ جۇمىستارى جۇزەگە اسادى. ءسويتىپ, كيىم تىگۋ ۇدەرىسى دايىن ءونىمدى ۇتىكتەۋمەن اياقتالادى.
«وتاندىق بيزنەسكە قولداۋ اۋاداي قاجەت. تەحنولوگيالىق ۇدەرىستەردى اۆتوماتتاندىرۋعا جۇمساعان شىعىندارىمىزدىڭ ءبىر بولىگىن وتەۋ ءۇشىن «Qazlndustry» اق-عا ءوتىنىم بەرىپ, قولداۋعا يە بولدىق», دەيدى كاسىپورىن باسشىسى.
«ادال ازامات» قاعيداتىنا ساي كەلەدى
ۇجىم باسشىلىعىنىڭ كاسىبي مامان تاپشىلىعىن جويۋ جانە جەرگىلىكتى كوللەدج تۇلەكتەرىن وندىرىستىك پراكتيكادان وتكىزۋ, ولاردىڭ جۇمىسپەن قامتىلۋىنا قولۇشىن بەرۋدە بەلسەندىلىك تانىتىپ وتىرعانىن دا اتاپ ايتۋعا تۇرارلىق. «Glasman» فابريكاسىمەن تالعار پوليتەحنيكالىق كوللەدجى 2017 جىلدان باستاپ تىگىنشى ماماندىعى بويىنشا دۋالدى وقىتۋعا كەلىسىمشارت جاساسقان.
«دۋالدى وقىتۋ اياسىندا جالپى وقۋ سانىنىڭ 60 پايىزى مەكەمەدە وتكىزىلەدى. ءبىلىم الۋشىلاردى ءبىرىنشى كۋرستان وسى فابريكاعا جۇمىسقا ورنالاستىرۋعا باعىتتايمىز. بۇل ماقساتتا ەكسكۋرسيا وتكىزىپ, تانىستىرامىز. ەكىنشى كۋرستان وندىرىستىك پراكتيكاعا بارادى. ارينە, بارلىق 25 ءبىلىم الۋشى «Glasman» تىگىن فابريكاسىنا ورنالاستىرىلمايدى, توپتىڭ 40-50 پايىز ستۋدەنتى پراكتيكانى تىگىن فابريكاسىندا وتەدى. كەيبىر جاقسى ءبىلىم الۋشىلارعا اقىلى تولەم جاسالادى. ءۇشىنشى كۋرستا تولىق كاسىپتىك پراكتيكا وندىرىستە وتكىزىلەدى, وندا دا «Glasman» فابريكاسى جاقسى كومەك كورسەتىپ, پراكتيكاعا قابىلدايدى. ناتيجەسىندە, ءبىلىم الۋشىلار زاماناۋي جابدىقتارمەن, وزىق تەحنولوگيامەن تانىسادى جانە جۇمىس بارىسىن جەتە تۇسىنەدى», دەيدى تالعار پوليتەحنيكالىق كوللەدجىنىڭ كاسىپتىك وقىتۋ شەبەرى ايسالقىن تەمىرجانقىزى.
بيىل وقۋ ورنىن تامامداعان تۇلەكتەردىڭ ىشىنەن ۇلجان اسانوۆا مەن تاحمينام سادىروۆا فابريكادا تۇراقتى جۇمىسقا ورنالاسىپ, تابىس تاۋىپ ءارى شەبەرلىكتەرىن شىڭداپ كەلەدى.
مەملەكەت باسشىسى 2025 جىلدى جۇمىسشى ماماندىقتارى جىلى دەپ جاريالاعان ەدى. «ادال ءارى تاباندى ەڭبەگىمەن تابىسقا جەتكەن ادامدار قاشاندا قۇرمەتتى, سىيلى بولۋى كەرەك. بۇل ءبىز ۇسىنىپ وتىرعان «ادال ازامات – ادال ەڭبەك – ادال تابىس» قاعيداتىنا تولىق ساي كەلەدى» دەگەن پرەزيدەنت سەنىمىنە لايىق ازاماتتاردىڭ ءبىرى ءارى بىرەگەيى «Glasman» جشس ديرەكتورى انۆار حيلاجەۆ دەسەك, ارتىق ايتقاندىق ەمەس. ول باستاعان ۇجىمنىڭ شيرەك عاسىردان بەرى جوعارى ساپاعا يە برەندتىك ونىمدەرى تۇتىنۋشىلار كوڭىلىنەن شىعىپ قانا قويماي, يمپورتقا تاۋەلدىلىكتى تومەندەتىپ كەلەدى.
الماتى وبلىسى
