فوتو: «Amanat» تەلەگرام
«Amanat» پارتياسىنىڭ ءباسپاسوز قىزمەتى ءمالىم ەتكەندەي, اتالعان كەزدەسۋدە «اتوم ەلەكتر ستانتسياسىنىڭ قۇرىلىسى» يادرولىق مامانداردى جانە عالىمداردى عانا ەمەس, سونىمەن قاتار جۇمىسشىلاردى, قۇرىلىسشىلاردى, ءارتۇرلى تاۋارلار مەن قىزمەتتەردى جەتكىزۋشىلەردى تارتۋدى تالاپ ەتەتىندىگى تالقىلاندى. بۇل دەگەنىمىز – ساۋدا, قوعامدىق تاماقتانۋ, كولىك جانە تاعى باسقا سالالاردا قىزمەت كورسەتەتىن جەرگىلىكتى بيزنەستىڭ دامۋىنا وڭ اسەرىن تيگىزەتىنى ءسوزسىز.
سەنات توراعاسى ماۋلەن اشىمباەۆ باسەكەلىك ارتىقشىلىعىمىزدى پايدالانۋىمىز كەرەكتىگىن ايتتى.
«قازاقستان – ۋران ءوندىرىسى بويىنشا كوشباسشى مەملەكەت. ەلىمىزدە ءۇلبى مەتاللۋرگيا زاۋىتى, يادرولىق فيزيكا ينستيتۋتى, ۇلتتىق يادرولىق ورتالىق جۇمىس ىستەيدى. وندا تاجىريبەلى ماماندار ەڭبەك ەتەدى. ياعني, ەلىمىزدە بارلىق مۇمكىندىك پەن رەسۋرس بار. سوندىقتان, ەلدى تۇراقتى ەنەرگيامەن قامتاماسىز ەتۋ – وتە ماڭىزدى», دەدى م.اشىمباەۆ.
