ىلكىمدى جوبالار ىسكە استى

ءمجا وزىق تەحنولوگيالار مەن زاماناۋي ەمدەۋ ادىستەرىن ەنگىزۋ ءۇشىن بىرەگەي مۇمكىندىكتەر ۇسىنادى, بۇل كۇردەلى دەنساۋلىق ساقتاۋ سالالارى, اسىرەسە ونكولوگيا ءۇشىن وتە وزەكتى ماسەلە. جەكە سەكتوردى تارتۋ – جاڭا مەديتسينالىق مەكەمەلەردى قۇرۋ, جابدىقتاۋ ۇدەرىسىن جەدەلدەتۋگە, سونداي-اق مامانداردىڭ بىلىكتىلىگىن ارتتىرۋعا كومەكتەسىپ, پاتسيەنتتەردى ەمدەۋ ناتيجەلەرىنە تىكەلەي اسەر ەتەدى.

بۇعان قوسا, ءمجا ساپالى مەدي­تسي­نالىق كومەككە قول جەتكىزۋدەگى تەڭ­سىز­دىكتى ازايتا وتىرىپ, وڭىرلەردە دەن­ساۋ­لىق ساقتاۋ ينفراقۇرىلىمىن دامىتۋ­عا مۇمكىندىك بەرەدى جانە ورتالىق ەمحا­نالارعا جۇكتەمەنى ازايتادى.

ايتا كەتەيىك كەيىنگى 8 جىلدا ءمجا اياسىندا ونكولوگيالىق كومەك كورسەتۋ سالاسىندا زاماناۋي مەديتسينالىق وبەكتىلەردى, ونىڭ ىشىندە پەت/كت-ورتالىق­تارىن, الماتى, استانا وڭىرلەردە سالۋ جانە جاراقتاندىرۋ بويىنشا بىرقاتار جوبا ىسكە اسىرىلدى.

اتاپ ايتقاندا, 2019 جىلى Orhun Medical مەديتسينالىق كومپانياسىمەن مەملەكەت-جەكەمەنشىك ارىپتەستىك شەڭبەرىندە قازاق ونكولوگيا جانە راديولوگيا عزي-دا پەت/كت-ورتالىعى پايدالانۋعا بەرىلدى. 2022 جىلى شىمكەنت قالالىق ونكوورتالىعىندا ءمجا جوباسى اياسىندا پەت-اپپاراتى, سونداي-اق پاتسيەنتتەرگە جاڭا بۋىن ساۋلەلىك تەراپياسىن جۇرگىزۋگە زاماناۋي ساۋلەلىك ۇدەتكىش ورناتىلدى.

ال 2024 جىلدىڭ قىركۇيەگىندە ورال قالاسىندا ونكولوگيالىق اۋرۋ­­لاردى يننوۆاتسيالىق دياگنوستيكالاۋ ورتالىعى اشىلدى. سونداي-اق ءمجا اياسىندا, وڭىردە زاماناۋي كت-سيمۋلياتور مەن ساۋلەلىك ۇدەتكىشپەن جابدىقتالعان يادرولىق مەديتسينا ورتالىعى اشىلدى. جاڭا ورتا­لىقتا مەديتسينالىق كومەك بارلىق پاتسيەنت­تەرگە تەگىن مەديتسينالىق كومەكتىڭ كە­پىلدىك بەرىلگەن كولەمى (تمككك) شەڭ­بە­رىن­دە ورال قالاسى مەن باتىس قازاقستان وبلى­سىنىڭ تۇرعىندارىنا عانا ەمەس, رەسپۋبليكانىڭ بارلىق تۇرعىن­دا­رى­نا دا تەگىن كورسەتىلەدى.

قىركۇيەك ايىنىڭ ورتاسىندا الما­تىدا قازاق ونكولوگيا جانە راديو­لوگيا عىلىمي-زەرتتەۋ ينستيتۋتى بازاسىندا ونكولوگيالىق اۋرۋلاردى يننو­ۆا­تسيالىق دياگنوستيكالاۋدىڭ ەكىنشى ورتا­لىعى جۇمىس ىستەي باستايدى. اتالعان ورتالىقتار ونكولوگيالىق اۋرۋلاردى ەرتە انىقتاۋدى ايتارلىقتاي جاقسارتادى, بۇل پاتسيەنتتەردىڭ ءومىر ءسۇرۋىن ارتتىرۋ مۇمكىندىگىن ارتتىرادى.

بۇعان قوسا, «قازاقمىس» كورپوراتسيا­سىمەن تالدىقورعان قالاسىندا جاڭا ونكولوگيالىق ورتالىق سالۋ تۋرالى كەلىسىمگە قول جەتكىزىلدى. تالدىقورعاندا قازىرگى زامانعى ونكولوگيالىق ورتا­لىقتىڭ قۇرىلىسى جەتىسۋ حالقىنا عانا ەمەس, جاقىن ماڭداعى وڭىرلەر – الماتى, شىعىس قازاقستان, اباي وبلىستارىنا دا وزەكتى. جوبانى ىسكە اسىرۋ وبلىس اكىمدىگى جەتىسۋ, «Kazakhmys Holding» جشس جانە قازاقستان دەن­ساۋلىق ساقتاۋ مي­نيسترلىگى اراسىندا قول قويىلعان ۇش­جاقتى مامىلە ارقىلى جۇزەگە استى.

ديليارا قايداروۆا,

«قازاق ونكولوگيا جانە راديولوگيا عزي» اق باسقارما توراعاسى, ۇعا اكادەميگى