بىرىڭعاي اقپاراتتىق جۇيەنىڭ ماڭىزى زور

باعدارلامالىق قۇجات كەزەكتى كەزەڭدە ەلىمىزدىڭ دامۋ كەلەشەگىن ايقىندايدى. وندا تەك تاپسىرمالار عانا ەمەس, جولداۋدىڭ ناقتى باعىتتارىن ىسكە اسىرۋ قادامدارى مەن ءىس-قيمىل الگوريتمدەرى دە ءتۇسىندىرىلدى. سونىڭ ىشىندە بىزگە ەتەنە جاقىنى – دەنساۋلىق ساقتاۋ سالاسىنداعى وزەكتى احۋالدىڭ كوتەرىلگەنى. سولاردىڭ ءبىرى – تسيفر­لاندىرۋدى ودان ءارى دامىتۋ.

ارىپتەستەرىمىزبەن بىرگە مەم­لە­كەت باسشىسىنىڭ ونداعان باعدارلاما مەن اقپاراتتار با­زا­­سىنىڭ ورنىنا بىرىڭعاي مەم­لەكەتتىك مەدي­تسي­نالىق اقپا­رات جۇيەسىن جاساۋ كەرەك دەگەن تاپسىرماسىن ۇلكەن ىقىلاسپەن قابىلدادىق. ماسەلەن, دسم قازاق دەرماتولوگيا جانە ينفەكتسيالىق اۋرۋلار عىلىمي ورتالىعى (قدياعو) ەپيدەميولوگيالىق مونيتورينگ ءبولىمىنىڭ مەڭگەرۋشىسى رەتىندە پروفيلاكتيكالىق جانە ەپيدەمياعا قارسى ءىس-شارالاردىڭ جۇيەلى مونيتورينگى جۇقپالى اۋرۋ­لارمەن سىرقاتتانۋدى باقى­لاۋ­دا ۇستاۋعا, ءتۇرلى كەسەلدەردىڭ, اسىرەسە, بالالار اراسىندا جاڭا اۋرۋلاردىڭ الدىن الۋعا مۇمكىندىك بەرەدى دەپ سەنىممەن ايتا الامىن.

دەنى ساۋ بالالاردىڭ تۋىن قالاي قامتاماسىز ەتۋگە بولادى, جاڭا تۋعان نارەستەلەر اراسىندا ايتۆ-ينفەكتسياسى نەمەسە ءتۋابىتتى مەرەز وقيعالارىنىڭ قالاي الدىن الۋعا بولادى؟ جۇكتى ايەلدەردى ايتۆ-عا جانە مەرەزگە ۋاقتىلى تەستىلەۋدەن وتكىزۋ ماڭىزدى. ەگەر بۇل دەرت دەر كەزىندە انىقتالسا, دەرەۋ ارادا ەم-دومىن جۇرگىزىپ, بالانىڭ دەنى ساۋ بولىپ تۋىنا مۇمكىندىك جاساۋ قاجەت. بۇگىندە جۇكتى ايەل­دەردى ينفەكتسيالارعا ۋاقتىلى تەستىلەۋدى باقىلاۋ بويىنشا وسى تاپسىرمانى ورىنداۋعا ەپيدەميو­لوگ دارىگەر ءارتۇرلى اقپاراتتىق جۇيەلەر مەن ەلەكتروندىق بازالاردان مىنا دەرەكتەردى قولمەن جيناۋعا جانە سالىستىرىپ قاراۋعا ءماجبۇر. ەسەپتى كەزەڭدە تىركەلگەن جۇكتى ايەلدەردىڭ ءتىزىمى, تەكسەرۋ تۋرالى مالىمەتتەر, جۇكتى ايەلدىڭ تەكسەرىلمەي قالعان سەبەپتەرىن انىقتاۋ ءۇشىن تەكسەرىلمەگەن ءتىزىم. ءارى قاراي ينفەكتسيانىڭ بارلىق انىقتالعان جاعدايىن سوڭعى دياگ­نوزداردى تىركەيتىن مەديتسينالىق جۇيەمەن سالىستىرىپ قاراۋ, تا­عايىن­دالعان ەمدەۋدى قاداعالاۋ دەگەندەي كەتە بەرەدى. دەرەكتەردى جيناۋ جانە تالداۋ مامانعا كوپ ۋاقىتتى قاجەت ەتەدى.

بىرىڭعاي اقپاراتتىق جۇيە حالىققا مەديتسينالىق كومەك كورسەتۋدىڭ ساپاسىن ارتتىرۋعا, ءاربىر پاتسيەنتتىڭ احۋالىن قادا­عالاپ, پرەۆەنتيۆتى ەمدەۋدى ۋاق­تىلى تاعايىنداۋعا, الەۋمەتتىك ءمانى بار اۋرۋلاردىڭ تارالۋىن باقى­لاۋدا ۇستاۋعا مۇمكىندىك بەرەدى. ساراپتامالىق جۇمىس ناۋقاستار تۋرالى جالپى دەرەكتەردى الۋدى جەڭىلدەتە وتىرىپ, قوعامدىق دەنساۋلىق ساقتاۋ سالاسىن ودان ءارى دامىتۋعا مىقتى سەرپىن قوسادى.

گۇلجاحان احمەتوۆا,

قدياعو ەپيدەميولوگيالىق مونيتورينگ ءبولىمىنىڭ مەڭگەرۋشىسى, ينفەكتسيونيست دارىگەر

الماتى