جوبانى سەرىكتەس تاراپتارمەن بىرلەسە وتىرىپ, «سامۇرىق-قازىنا» اق كومپانيالار توبىنىڭ بىرىڭعاي قايىرىمدىلىق وپەراتورى – «Samruk-Kazyna Trust» قورى قارجىلاندىردى. استانادا باستاۋ العان يگىلىكتى ءىس بۇكىل ەلگە تارالىپ, بىرىڭعاي ۇيلەستىرۋ ورتالىعى سالاداعى تۇيتكىلدى ماسەلەلەردى شەشۋگە سەپتىگىن تيگىزبەك. وسىلايشا, تۇرعىندارعا قىزمەت كورسەتەتىن ۇيىمدار مەن اكىمدىكتەردىڭ جۇمىس تيىمدىلىگىن باعالاپ, بەكىتەتىن ادىستەر مەن قۇرالدار ەنگىزىلەدى. ءتيىستى شارالار اياسىندا قۇزىرلى ورگاندارمەن وقۋ باعدارلامالارى كەلىسىلىپ جاتىر. بولاشاقتا نىسانداردىڭ قولجەتىمدىلىگىن باعالاۋعا وكىلەتتى ساراپشىلار مەن تەكسەرىستەن وتكەن نىسان-قىزمەتتەر ءتىزىلىمى (رەەستر) تۇزىلمەك.
«بۇل تىرناقالدى قادامنىڭ ماڭىزى بار دەپ ويلايمىن. سەبەبى قولاربادا وتىراتىن ازاماتتارعا جاسالعان جاعداي بارىسىندا كوزى كورمەيتىن, قۇلاعى ناشار ەستيتىن جانداردىڭ قۇقىعى ەسكەرىلمەۋى مۇمكىن. سونىمەن قاتار ينكليۋزيا پاندۋس ورناتۋ عانا ەمەس, قوعام قارىم-قاتىناسىنىڭ وزگەرۋى دەپ تۇسىنگەن ءجون. ال رەسۋرس ورتالىعىندا مۇگەدەكتىگى بار ادامدار قاتارىنان ارنايى ساراپشىلار دايارلانىپ, ولاردى تولىققاندى تابىسپەن قامتۋعا دا مۇمكىندىك تۋىنداماق. مۇنىڭ ءبارى قور باسشىلىعىنىڭ ينكليۋزيانى, تەڭ قوعامدى دامىتۋداعى كەشەندى كوزقاراسىنىڭ ناتيجەسى بولادى دەپ ۇمىتتەنەمىز», دەپ اتاپ ءوتتى «Samruk-Kazyna Trust» الەۋمەتتىك جوبالاردى دامىتۋ قورىنىڭ باس ديرەكتورى الفيا اديەۆا.
وسى ورايدا قايىرىمدىلىق وپەراتورى جوبانى جۇزەگە اسىرۋ جاۋاپكەرشىلىگىن موينىنا العان «ەۋرازيالىق ينكليۋزيۆتى قوعامدى دامىتۋ قاۋىمداستىعى» زتب سىندى ۇكىمەتتىك ەمەس ۇيىمدارمەن جەمىستى ىنتىماقتاستىق ورناتقان. ناتيجەسىندە, كەلەسى 2025 جىلدىڭ ءساۋىر ايىنا دەيىن قاجەت كەزدە دەرەۋ كاسىبي كومەك كورسەتەتىن 100 ساراپشى-نۇسقاۋشى دايارلانىپ, سايكەسىنشە باستاپقى ساتتە 100 نىساندى قولجەتىمدىلىككە باعالاۋ ءىس-قيمىلىمەن قامتۋ جوسپارلانادى. بۇعان دەيىن, مامىر ايىندا وتكەن سەمينارلاردا حالىقارالىق ستاندارتتار تانىستىرىلىپ, مۇگەدەكتىگى بار ادامدارمەن تىلدەسۋ ادەبى, قالالىق ورتا مەن مەكەمەلەردىڭ قولجەتىمدىلىگى, ۇجىمدىق پسيحولوگيا سياقتى باعىتتاردا مينيسترلىكتەر, استانا قالاسى مەن اۋداندارىنىڭ اكىمدىكتەرى قىزمەتكەرلەرى, دەپۋتاتتار مەن قوعامدىق ۇيىمدار وكىلدەرى, «سامۇرىق-قازىنا» اق كومپانيالار توبىنىڭ قىزمەتكەرلەرى وقىتىلدى.
ەسكە سالا كەتسەك, قور بيىلعى جاڭا وقۋ جىلىندا استانانىڭ 5 مەكتەبىندە وزىندىك ۇلگىدەگى ينكليۋزيانى قولداۋ كابينەتتەرىن اشىپ, ەرەكشە ءبىلىم بەرۋدى قاجەت ەتەتىن 150-دەن استام بالا باسقا قاتارلاستارىمەن بىرگە وقي الاتىن بولدى.
جالپى, «سامۇرىق-قازىنا» اق كورپوراتيۆتىك الەۋمەتتىك جاۋاپكەرشىلىك اياسىندا ەرەكشە قاجەتتىلىكتەرى بار ادامداردى كەشەندى تۇردە قولداپ كەلەدى. وعان دالەل, ەلىمىز وڭىرلەرىندە 42 وڭالتۋ ورتالىعى, 10 سپورت كەشەنى ىسكە قوسىلدى. 23 قالا مەن ەلدى مەكەندە 1000-نان استام بالا قاتىساتىن بەيىمدەلگەن سپورت سەكتسيالارى جۇمىس ىستەپ تۇر. مۇگەدەكتىگى بار جاستار تسيفرلىق كاسىپتەرگە وقىتىلىپ جاتىر. وسىلايشا, ادامدارعا تۋعانىنان باستاپ جاردەم جاسالىپ, ولاردىڭ قوعامعا الەۋمەتتەنۋىنە بارلىق جاعىنان ىقپال ەتىلەدى.
الدابەرگەن كەمپىرباي
