سۋرەتتى تۇسىرگەن – ءالي عالىم
ءىس-شارانى اشقان ەرلان قوشانوۆ مەملەكەت باسشىسى قاسىم-جومارت توقاەۆ ايەلدەر قوعام ومىرىنە جانە ەلدىڭ جان-جاقتى دامۋىنا زور ۇلەس قوساتىنىن ءاردايىم ايتىپ كەلە جاتقانىن اتاپ ءوتتى. گەندەرلىك تەڭدىكتى قامتاماسىز ەتۋ, ايەلدەردىڭ قۇقىعىن قورعاۋ جانە وتباسى قۇندىلىقتارىن نىعايتۋ – پرەزيدەنت پەن «Amanat» پارتياسىنىڭ باستى نازارىندا.
پارتيا توراعاسى ايەلدەر قاناتى ءبىر جارىم جىلدا «Amanat»-تىڭ قوزعاۋشى كۇشتەرىنىڭ بىرىنە اينالعانىن اتاپ ءوتتى. ماسەلەن, ايەلدەر قاناتىنىڭ العاشقى فورۋمىندا وتباسىلىق-تۇرمىستىق زورلىق-زومبىلىق ماسەلەسى تالقىلاندى. پارلامەنت ءتيىستى زاڭ قابىلداپ, جاقىندا كۇشىنە ەندى. سونىمەن قاتار حالىقتىڭ قارىز جۇكتەمەسىن ازايتۋ, قۇمار ويىندارعا قارسى كۇرەس تۋرالى جاڭا زاڭدارداعى ماسەلەلەر دە ايەلدەر قاناتى مۇشەلەرىنىڭ باستاماسىمەن كوتەرىلدى.
كەزدەسۋگە قاتىسۋشىلار ەلىمىزدەگى ەڭ ماڭىزدى وقيعالاردىڭ ءبىرى – مەملەكەت باسشىسىنىڭ جولداۋىن دا تالقىلادى. ە.قوشانوۆ ءار جولداۋ حالىقتىڭ قاجەتتىلىگى مەن سۇرانىسىنا نەگىزدەلگەن ناقتى ءىس-قيمىل جيىنتىعى ەكەنىن مالىمدەدى. سونىڭ ءبىرى – كەيىنگى جىلدارى حالىق پەن بيزنەس قاتتى سەزىنىپ وتىرعان ەنەرگيا تاپشىلىعى ماسەلەسى. وسىعان بايلانىستى پرەزيدەنت اەس سالۋ يدەياسىن ۇسىندى. قازىرگى ۋاقىتتا اەس سالۋدى قولداۋ جونىندەگى حالىق شتابى مۇشەلەرى وڭىرلەرگە بارىپ, كوپشىلىككە بەيبىت اتوم جۇمىسىنىڭ اسپەكتىلەرىن ءتۇسىندىرىپ, تۇرعىنداردى تولعاندىرعان ءتۇرلى سۇراق-ساۋالعا جاۋاپ بەرىپ ءجۇر.
«بۇگىندە ءبىز ەلدىڭ ودان ءارى دامۋىنا اسەر ەتەتىن بارلىق ماڭىزدى شەشىم حالىقپەن بىرگە قابىلدانىپ جاتقانىن كورىپ وتىرمىز. جاڭا ساياسي مادەنيەتتىڭ ءمانى – وسىندا. ءبىز بارلىعىمىز بىرگە جاڭارتىلعان كونستيتۋتسيا ءۇشىن داۋىس بەردىك. قازىر حالىق قابىلداعان شەشىمنىڭ دۇرىس بولعانىن كورىپ وتىرمىز. بۇل جولى دا حالىق ءوز تاڭداۋىن جاساپ, ەلىمىزدە اەس سالۋ-سالماۋ تۋرالى شەشىم قابىلداۋى كەرەك», دەدى ە.قوشانوۆ.
ءوز كەزەگىندە يادرولىق فيزيكا ينستيتۋتىنىڭ عىلىمي حاتشىسى قارلىعاش مۇناسباەۆا, يادرولىق فيزيكا ينستيتۋتىنىڭ يادرولىق جانە فيزيكالىق قاۋىپسىزدىك وقۋ ورتالىعىنىڭ باستىعى ناتاليا يزمايلوۆا ءسوز سويلەدى. ال جەتىسۋ وبلىسى سارقان اۋىلىنان كەلگەن كاسىپكەر كەنجەتاي تازابەكوۆا اەس قۇرىلىسى بويىنشا رەفەرەندۋم وتكىزۋ «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋدىڭ ايقىن كورىنىسى ەكەنىن اتاپ ءوتتى.
پارتيا توراعاسى قازىر كاسىبي مامانداردىڭ دالەلدى سوزدەرى كۇمانشىل ادامدار مەن سىنشىلاردىڭ پىكىرىنەن باسىم ءتۇسىپ, اتوم ەنەرگياسىنا قاتىستى حالىقتىڭ قورقىنىشى مەن ۇرەيىن سەيىلتۋى وتە ماڭىزدى ەكەنىن اتاپ ءوتتى. قوعام اەس قۇرىلىسىن وي تارازىسىنان وتكىزىپ, دۇرىس شەشىم قابىلداۋى كەرەك.
