ۆيدەودان الىنعان كادر
جەلىدە جول-كولىك وقيعاسى ورنىنان ۆيدەو تارادى. پوليتسيا جۇمىسشىنى قاققان جۇرگىزۋشى ۋاقىتشا ۇستاۋ يزولياتورىنا قامالعانىن مالىمدەدى. قىلمىستىق ءىس قوزعالدى.
- بيىل 14 قىركۇيەكتە ساعات 13:30 شاماسىندا Lada ماركالى اۆتوكولىكتىڭ جۇرگىزۋشىسى ءوندىرىس كوشەسىمەن اقبيداي كوشەسىنە قاراي ءجۇرىپ, جول بولىگىندە جول جۇمىستارىن جۇرگىزگەن جۇمىسشىنى قاعىپ كەتتى. وسىدان كەيىن جۇرگىزۋشى قارسى باعىتتا كەلە جاتقان KIA Sportage ماركالى اۆتوكولىكپەن سوقتىعىسۋعا جول بەردى. اپات سالدارىنان جۇمىسشى العان جاراقاتتارىنان وقيعا ورنىندا قايتىس بولدى. KIA Sportage اۆتوكولىگىنىڭ جۇرگىزۋشىسى مەن جولاۋشىلارى اۋرۋحاناعا جەتكىزىلىپ, تەكسەرۋدەن كەيىن ۇيلەرىنە جىبەرىلدى. وسى دەرەك بويىنشا قىلمىستىق ءىس قوزعالدى. جۇرگىزۋشى استانا قالاسى پد ۋاقىتشا ۇستاۋ يزولياتورىنا قامالدى. تەرگەۋ جۇرگىزىلىپ جاتىر, - دەلىنگەن حابارلامادا.
