سۋرەت: اشىق دەرەككوزدەن
قازىر ينفەكتسيالىق جۇقپالى ناۋقاستار بەلەڭ الاتىن ءولىارا شاق. وسىعان وراي پرەزيدەنت تاپسىرماسى قالاي ورىندالىپ جاتىر دەگەن ساۋالمەن وبلىستىق دەنساۋلىق ساقتاۋ باسقارماسى باستىعى قانىش بيجانوۆقا قايرىلعان ەدىك. «قازىرگى مىندەت جۇقپالى اۋرۋلاردىڭ الدىن الۋ بولسا, بۇعان قارسى ءبىرشاما شارا جاسالىپ جاتىر. پرەزيدەنت ايتقانداي, مەملەكەتتىك بيۋدجەت تاراپىنان قوماقتى قاراجات بولىنەدى. سونى تەك ءتيىمدى يگەرىپ, حالىقتىڭ دەنساۋلىعىن ساقتاۋ شارالارىن ارتتىرۋىمىز كەرەك. بيىل وبلىس بويىنشا ينفەكتسيالىق ناۋقاستاردى جاتقىزۋعا ارنالعان 181 جاڭا ەمدەۋ توسەكتىك ورنى اشىلدى. ونىڭ ىشىندە 113 ورىن بالالارعا, 68 ورىن ەرەسەكتەرگە ارنالعان. بۇگىنگى تاڭدا COVID-19 ناۋقاسىنا ۇشىراعان 4 پاتسيەنت ستاتسيونارلىق ەم الىپ جاتىر, ولاردىڭ ىشىندە 2 جۇكتى ايەل, سونداي-اق جرۆي-مەن ء(جىتى رەسپيراتورلىق ۆيرۋستىق ينفەكتسيا) 18 ادام ەمدەلۋدە جاتىر, ولاردىڭ 7-ءى ەرەسەك ادام, 11-ءى بالا», دەدى ول.
سوڭعى كۇندەرى وبلىس بويىنشا جرۆي ناۋقاسىمەن 689 ادام تىركەلگەن. ونىڭ ىشىندە 18 جاسقا دەيىنگى بالالار – 427, ەرەسەكتەر – 234, جۇكتى ايەلدەر – 28. بۇعان قاراعاندا, وبلىستاعى ينفەكتسيالىق ناۋقاستىڭ تارالۋى جيىلەپ بارا جاتقان سياقتى. سوندىقتان حالىقتى ۆاكتسيناتسيالاۋ جۇمىسىنا جەدەلدىك كەرەك. تاۋەكەل توبىنا جاتاتىن ادامداردى تەگىن يممۋنداۋ ءۇشىن تۇماۋعا قارسى ۆاكتسيناتسيا ەگۋ جۇمىستارى جاپپاي قولعا الىنعان. بۇگىنگە دەيىن رەسەيدە شىعارىلعان «گريپپول پليۋس» ۆاكتسيناسىنىڭ 60000 دوزاسى ساتىپ الىنىپتى. ۆاكتسيناتسيا ناۋقاستىڭ تىركەلگەن جەرى بويىنشا ەمحانالاردا جۇرگىزىلەدى. سونىمەن بىرگە 11 جاستاعى قىز بالالارعا اپۆ-عا (ادام پاپيلوماسىنىڭ ۆيرۋسى) قارسى ۆاكتسيناتسيا جوسپارلانعان. سولتۇستىك قازاقستان وبلىسىندا ۆاكتسيناتسيادان وتۋگە ءتيىستى 3638 قىز بار. بۇل ۆاكتسينانىڭ 7276 دوزاسىن بىرىڭعاي ديستريبيۋتور «سك–فارماتسيا» ساتىپ الادى. ونىڭ مالىمەتى بويىنشا, ۆاكتسينانى امەريكادان جەتكىزۋ جوسپارلانعان.
سولتۇستىك قازاقستان وبلىسىنىڭ سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى اسەت جۇماتاەۆ وڭىردەگى جۇقپالى ناۋقاس جايىن تولىقتىردى. «قازىر مونيتورينگ كورسەتكەنىندەي, ەلدە رەسپيراتورلىق ۆيرۋستار, سونىڭ ىشىندە كۆي اينالىمى بايقالادى. اعىمداعى جىلدىڭ باسىنان بەرى كوروناۆيرۋستىق ينفەكتسيانىڭ 54 جاعدايى تىركەلدى. قايتىس بولعاندار جوق. بۇل رەتتە جرۆي, ۆيرۋستىق پنەۆمونيا جانە كۆي-مەن ەمدەۋگە جاتقىزۋدىڭ سانى بىلتىرعىمەن سالىستىرعاندا وسكەن جوق. بۇل كۆي اعىمى كوپ جاعدايدا جەڭىل تۇردە ءوتىپ جاتقاندىعىن كورسەتىپ وتىر. الايدا سەكۆەنيرلەۋدىڭ سوڭعى دەرەكتەرى بويىنشا, ەلىمىزدە بۇكىل الەمدەگىدەي, وميكرون شتامىنىڭ ءارتۇرلى نۇسقاسى تارالىپ جاتقاندىعى راستالعان», دەدى ول.
بيىل باس مەملەكەتتىك سانيتارلىق دارىگەردىڭ مىندەتىن اتقارۋشى «2024-2025 جىلداردىڭ ەپيدەميالىق ماۋسىمىنا ارنالعان تۇماۋ, ءجىتى رەسپيراتورلىق ۆيرۋستىق ينفەكتسيالار (جرۆي) جانە كوروناۆيرۋس ينفەكتسياسى (COVID-19) بويىنشا سانيتارلىق-پروفيلاكتيكالىق, سانيتارلىق-ەپيدەمياعا قارسى ءىس-شارالار وتكىزۋ تۋرالى» 2024 جىلى 16 تامىزدا قاۋلىعا قول قويدى. بۇل قاۋلى جرۆي, تۇماۋ جانە COVID-19 بويىنشا ەپيدەميالىق ماۋسىم كەزەڭىندە پروفيلاكتيكالىق جانە ەپيدەمياعا قارسى ءىس-شارالاردى وتكىزۋدى كوزدەيدى, ونىڭ ىشىندە:
– مەديتسينالىق ۇيىمداردا: كىرە بەرىسىندە «سۇزگىلەردىڭ» جۇمىسىن قامتاماسىز ەتۋ, بەتپەردەلەردى پايدالانۋ, انتيسەپتيكتەردىڭ بولۋى;
– جرۆي, تۇماۋ بەلگىلەرىمەن جۇكتى ايەلدەر مەن ءبىر جاسقا دەيىنگى بالالاردى ۇيگە شاقىرۋ كەلىپ تۇسكەن جاعدايدا ءبىرىنشى كەزەكتە قىزمەت كورسەتۋ;
– 2024 جىلعى 15 قىركۇيەكتەن باستاپ تۇماۋعا قارسى ۆاكتسيناتسيا جۇرگىزۋ.
تەگىن نەگىزدە ۆاكتسيناتسيا تاۋەكەل توبىنا جاتاتىن ادامدارعا: مەديتسينا قىزمەتكەرلەرى, مەديتسينالىق ۇيىمدا ديسپانسەرلىك ەسەپتە تۇرعان بالالار, سابيلەر ۇيلەرىنىڭ بوبەكتەرى, قارتتار ۇيلەرىنىڭ كونتينگەنتى, ەپيدەميولوگيالىق كورسەتكىشتەر بويىنشا (2-3 تريمەستردەگى جۇكتى ايەلدەر, سوزىلمالى اۋرۋلارى بار ادامدار, 65 جاستان اسقان ادامدار جانە ت.ب.) تىركەلگەن جەرى بويىنشا ەمحانادا جۇرگىزىلەتىن بولادى.
جالپى تەگىن نەگىزدە 60 مىڭ ادامدى ەگۋ جوسپارلانعان. قازىر وبلىستىڭ دەنساۋلىق ساقتاۋ باسقارماسى مەن سانيتارلىق-ەپيدەميولوگيالىق قىزمەتتەرى ينفەكتسيالىق اۋرۋلارعا قارسى ەگۋ جۇمىستارىن جاساۋعا دايىن.
سولتۇستىك قازاقستان وبلىسى
