ادال ەڭبەك ءادىل باعالانۋعا ءتيىس

ەندى سولاردىڭ كەيبىرەۋ­لە­رىنە توقتالا كەتسەك. پرەزيدەنت: «مەملەكەت قار­جىسىنىڭ تۇراقتىلىعىن قامتاماسىز ەتۋدىڭ بىردەن-ءبىر جولى – كورپەگە قاراي كوسىلۋ. سوندىقتان بيۋدجەت قاراجاتىن ستراتەگيالىق ماڭىزى جوق, اسا شۇعىل ەمەس شارۋالارعا وڭدى-سولدى شاشۋدى دوعارۋ كەرەك», دەدى. تولىقتاي كەلىسەمىز. ماسەلەن, الماتى قالاسىندا ءبۇپ-ءبۇتىن تۇرعان اسفالت جولداردى, جيەكتاستاردى (بورديۋرلەر), بەتون ارىقتاردى قيراتىپ, قايتادان سالىپ جاتادى. جىلدا كورەتىنىمىز – وسى كورىنىس. ەسەسىنە ءدال قازىر الماتىنىڭ ىرگەسىندە, قالا شەكاراسىنان ءبىر شاقىرىم جەردەگى قاراساي اۋدانى جاڭاتۇرمىس اۋىلىندا جىلدار بويى جولدار اسفالتتالماي كەلەدى. اۋىل تۇرعىندارى وسى­نىڭ سەبەبى نەدە ەكەنىن تۇسىنە الماي دال.

سونىمەن قاتار مەملەكەت باسشىسىنىڭ ء«ىرى كاسىپ يەلەرى وسى ەلدىڭ ازاماتى رەتىندە ەل يگىلىگىنە جارايتىن مەكتەپ, اۋرۋحانا, ستاديون, مۋزەي جانە باسقا دا الەۋمەتتىك-مادەني نىساندار سالۋعا قوماقتى قارجى بولۋگە مىندەتتى. مۇنداي كاسىپكەرلەردىڭ ەسىمى جومارت جانداردىڭ «التىن تىزىمىنە» جازىلادى. ال ودان باس تارتقان نەمەسە سوزبۇيداعا سالعان كاسىپ­كەرلەرگە قاتىستى اڭگىمە باس­قاشا بولادى» دەگەن ءسوزى دە كوكەي­گە قوندى.

پرەزيدەنت اگروونەركاسىپ كەشەنىن دامىتۋعا بايلانىس­تى تىڭ ويلارىن ايتتى. ماسە­لەن, اۋىل شارۋاشىلىعىن دامى­تۋعا بولىنگەن سۋبسيديا­نى شىن مانىندە, دالا توسىندە ەڭبەكتەنىپ جاتقاندار ەمەس, شەنەۋنىكتەرمەن جەڭ ۇشى­نان جالعاسقان پىسىقاي دەلدال­داردىڭ الىپ كەتە­تىنى تۋرالى ەستىپ قالا­مىز. وسى تۇرعىدا ءبىزدىڭ كافەد­را­نىڭ عالىمدارى دا اۋىل شارۋا­شىلىعىن دامىتۋعا قاجەتتى, ماڭىزدى عىلىمي جوبا­لارمەن اينالىسىپ جات­قانىن ايتقىمىز  كەلەدى. اتاپ ايتقاندا, ءتۇرلى اۋىل شارۋا­شى­لىعى داقىلدارىنىڭ, وزگە دە وسىمدىكتەردىڭ (مىسالى, سەكسەۋىل) ۇرىقتارىن پوليمەر ۇلدىرمەن وراۋ ار­قىلى العاشقى ەگىلگەن كەزدە ولاردىڭ ءتۇرلى زيان­كەستەرگە, تابيعي سىناقتارعا توتەپ بەرۋىنە قول جەتكىزۋگە بو­لادى. ايتپەسە, بۇگىنگى تاڭدا دۇكەن­دەردە ساتىلاتىن كوكونىس ۇرىقتارىنىڭ بارلىعى دەر­لىك وزگە ەلدەردەن كەلگەن.

پرەزيدەنتتىڭ «اۋىل تۇر­­­­­­­­عىن­دارىنا ءوز ونىمدەرىن وڭدەۋ­­گە جانە ساتۋعا مۇمكىندىك بەرە­تىن ينفراقۇرىلىم قۇرۋ وتە ماڭىزدى» دەگەن ءسوزى دە كوڭىلدەن شىقتى. ويتكەنى استىق وندىرۋشىلەردىڭ كۇزدە ءوز ونىمدەرىن ساتا المايتىنى جونىندە ءجيى ەستيمىز. ال ءدال سول كەزدە جەردە ءبىر كۇن دە جۇمىس ىستەمەگەن, جەڭ ۇشىنان جال­عا­سىپ, مەملەكەتتەن شەتەلگە استىق ساتۋعا ليتسەنزيا العان­ پىسىقتار استىقتى ديقان­دار­دان بارىنشا ارزان باعاعا ساتىپ الىپ, سىرت مەملەكەتتەرگە ۇستەمە باعامەن ساتادى ەكەن. وسىدان كەيىن ماڭداي تەرى اقتالمايتىن قاراپايىم ەڭبەك ادامىنىڭ جۇمىس ىستەۋگە قايدان زاۋقى بولادى؟

مەملەكەت باسشىسى مۇناي-گاز-حيميا سالاسىن ودان ءارى دامىتۋ ماڭىزدى مىندەت ەكەنىنە توقتالدى. وسى تۇرعىدا, ءبىزدىڭ كافەدرادا بيوىدىرايتىن پوليمەر ۇلدىرلەر الۋ ءۇشىن عىلىمي ىزدەنىستەر, جۇمىستار جاسالىپ جاتقانىن ايتا كەتكەن ءجون. ءيا, مەملەكەت باسشىسىنىڭ ەكونوميكا, ەكولوگيالىق احۋال, دەن­ساۋ­لىق ساقتاۋ, ءبىلىم بەرۋ سالاسى, ەلدە زاڭ مەن ءتارتىپ­تىڭ ساقتالۋىنا قاتىستى ما­سە­لەلەرگە وراي ايتقان ويلا­رىنىڭ بارلىعى دا قۇپ­تار­لىق.

ەندەشە, ءبىز دە ءوز سالامىزدا ناتيجەلى ەڭبەك ەتىپ, ەل دامۋىنا ۇلەسىمىزدى قوسقانىمىز ابزال.

پەريزات ۇركىمباەۆا,

ءال-فارابي اتىنداعى قازۇۋ دوتسەنتى