الماتى وبلىستىق ەنەرگەتيكا جانە تۇكش باسقارماسىنىڭ وكىلى ەرجان بەيبىت ۇلى وبلىس بويىنشا 43 قازاندىقتىڭ جوندەۋ جۇمىستارى اياقتالىپ, ولاردىڭ قۋاتتىلىعى مەن تيىمدىلىگى ارتقانىن العا تارتتى.
ىلە اۋدانىنىڭ بورالداي جانە بايكەن اۋىلدارىنداعى قازاندىقتاردى جاڭعىرتۋعا قوسىمشا قارجى ءبولىنىپ, جۇمىستاردىڭ 50 پايىزى اياقتالعان. اتالعان 5 قازاندىقتىڭ جۇمىسى قازان ايىندا تولىق اياقتالادى دەپ جوسپارلانعان.
«سونىمەن قاتار تۇرعىندارعا قاجەتتى 714 مىڭ توننا كومىر جەتكىزۋگە كەلىسىمشارتتار جاسالدى. قازىرگى ۋاقىتتا وڭىرگە 125,1 مىڭ توننا كومىر جەتكىزىلىپ, ورتاشا باعاسى تونناسىنا 18 500-23 000 تەڭگەنى قۇرايدى. كومىر ساپاسى مەن قولجەتىمدىلىگىن قامتاماسىز ەتۋ ماقساتىندا بارلىق وپەراتور قاتاڭ قاداعالانادى», دەدى ەرجان بەيبىت ۇلى.
سونداي-اق وڭىردە ەلەكترمەن جابدىقتاۋ جەلىلەرىن جاڭارتۋ دا بەلسەندى تۇردە جۇزەگە اسىرىلىپ جاتىر. 1185 كم ەلەكتر جەلىسىن جوندەۋ جوسپارلانىپ, ونىڭ ىشىندە كۇردەلى جوندەۋدىڭ 85 پايىزى, اعىمداعى جوندەۋدىڭ 75 پايىزى اياقتالعان. بۇل شارالار جەلىلەردىڭ توزۋىن 5 پايىزعا تومەندەتۋگە, تۇرعىنداردى تۇراقتى ەلەكتر قۋاتىمەن قامتاماسىز ەتۋگە باعىتتالعان.
ال وبلىستىق توتەنشە جاعدايلار دەپارتامەنتىنىڭ مەملەكەتتىك ءورت باقىلاۋ باسقارماسىنىڭ باس مامانى ميراس نۇرباي ۇلىنىڭ سوزىنشە, ءورت قاۋىپسىزدىگىن كۇشەيتۋ ماقساتىندا الەۋمەتتىك وسال توپتاردىڭ ۇيلەرىنە كومىرتەگى توتىعىن انىقتايتىن 787 داتچيك ورناتۋ جۇمىستارى جۇرگىزىلىپ جاتىر.
«بۇل شارالار تۇرعىنداردىڭ قاۋىپسىزدىگىن ارتتىرۋعا جانە جىلىتۋ ماۋسىمىنىڭ كەدەرگىسىز وتۋىنە باعىتتالعان. داتچيكتەر الەۋمەتتىك وسال توپتاردىڭ ۇيلەرىنە تەگىن ورناتىلادى. سونىمەن قاتار تۇرعىندارعا ءورت قاۋىپسىزدىگى بويىنشا ءتۇسىندىرۋ جۇمىستارى جۇرگىزىلىپ جاتىر», دەيدى توتەنشەلىك مامان.
ايتا كەتۋ كەرەك, وڭىردە قازاندىقتاردىڭ تيىمدىلىگىن ارتتىرۋ مەن تۇرعىنداردىڭ قاۋىپسىزدىگىن قامتاماسىز ەتۋگە باعىتتالعان بۇل شارالار قىسقى ماۋسىمنىڭ قيىندىقسىز ءارى كەدەرگىسىز وتۋىنە سەپتىگىن تيگىزبەك.
الماتى وبلىسى
