وڭىرىمىزدە سيرەك كەزدەسەتىن ەتىكشىلىك ءىسىن ول «اۋىل اماناتى» جوباسى اياسىندا قولعا الدى. باعدارلاما ارقىلى 7 ملن 300 مىڭ تەڭگە نەسيە راسىمدەپ, ەتىك تىگۋگە قاجەتتى تىگىن ماشينالارىن, وزگە دە قۇرال-جابدىقتارىن ساتىپ الىپ, ءتۇرلى ولشەمدەگى اياقكيىم قالىپتارىن جاساتتى. جەكە تۇرعىن ءۇيىنىڭ جانىنداعى ەتىك تىگۋ شەبەرحاناسىندا قازىر ءۇش ادام جۇمىس ىستەيدى. تسەحتىڭ زاماناۋي تىگىن ماشينالارىمەن ايىنا 200 سىڭار قىسقى ەتىك دايىنداۋعا مۇمكىندىگى بار.
«ەتىكشىلىك اتا-بابامىزدان ميراس بولعان كاسىپتىڭ ءبىر ءتۇرى. ءونىمىڭ ساپالى بولسا جەردە قالمايدى. ازىرگە ەرەسەكتەردىڭ قىسقى ەتىكتەرىن تىگەمىز. ونىڭ ىشىندە ءتۇرلى ولشەمدەگى قونىشتى اياقكيىممەن قاتار تۇزدەگى شارۋاشىلىققا ارنالعان ساپتاما ەتىكتەر بار. پايدالانىلاتىن بىلعارىنىڭ بارلىعى وڭتۇستىك وڭىرلەردەگى تسەحتاردا مال تەرىسىنەن وڭدەپ جاسالعان. قاجەتتى شيكىزاتتىڭ العاشقى توپتاماسىن شىمكەنت, الماتى, تاراز قالالارىنان, تابانىنا قولدانىلاتىن ماتەريالدى رەسەي ەلىنەن تاپسىرىسپەن الدىرتتىق. ءبىزدىڭ قولىمىزدان شىققان ەتىكتەر قىستا جىلى ءارى تولىعىمەن تابيعي ونىمنەن جاسالعان دەپ نىق سەنىممەن ايتا الامىز», دەيدى كاسىپ يەسى.
«De shoes» دەپ اتالاتىن اياقكيىم جاساۋ تسەحىنىڭ العا قويعان بىرنەشە جوسپارى بار. سونىڭ ءبىرى – بالالار اياقكيىمىن كوبىرەك جاساۋ جانە ونى تۇتىنۋشىعا قولايلى باعادا ۇسىنۋ. قازىر مۇندا دايىندالعان cاپتاما ەتىكتىڭ باعاسى – 20 مىڭ, قونىشتى اياقكيىمدەر 30 مىڭ تەڭگەنىڭ شاماسىنا باعالانىپ وتىر. تىڭ كاسىپكە دەن قويعان ەربولاتتىڭ بۇل ىستە اقىلشىسى جانە شەبەرحانا جۇمىسىن ۇيلەستىرۋشىسى – ەتىك شەبەرى دوسبول ابدىباەۆ ەسىمدى ازامات. كاسىپ يەسىنە اعايىن بولىپ كەلەتىن دوسبولدىڭ تەرى وڭدەۋ جۇمىسىنان باستاپ, اياقكيىم تىگۋ ىسىندە جيناقتاعان تاجىريبيەسى 20 جىلدان اسادى.
«جانىمىزدا قىتاي سياقتى الىپ مەملەكەت تۇرعاندا جازعى اياقكيىم تىگىپ باستەسۋىمىز ازىرگە قيىنداۋ. بىراق ولار دا وسىنداي شاعىن تسەحتاردا وندىرىلگەن ونىمدەرىمەن الەم نارىعىنا شىعىپ وتىر. بۇل جەردە تاۋەكەل مەن قولداۋ كەرەك دەپ ەسەپتەيمىن. ساپالى بولسا, قىسقى اياقكيىمگە سۇرانىس بولادى. ەلىمىزدە مال تەرىسى تەگىن بولعانىمەن, بىلعارى ماتەريالى تىم قىمبات. وعان سەبەپ – تەرى وڭدەۋ شارۋاشىلىعىنىڭ كەنجەلەپ تۇرعانى. وسىنى ءار وڭىردە جانداندىراتىن ۋاقىت كەلدى», دەيدى دوسبول.
رەسمي دەرەكتەرگە سۇيەنسەك, مەملەكەتىمىزدە اياقكيىم وندىرەتىن 70 شاقتى شاعىن جانە ورتا كاسىپورىن بار. الايدا ولار ىشكى نارىقتىڭ 5 پايىزىن عانا قامتاماسىز ەتە الادى. ساۋدالاناتىن اياقكيىمنىڭ 95 پايىزى – يمپورتتىق ونىمدەر.
وتباسىلىق كاسىپ رەتىندە باستالعان ەربولات مارات ۇلىنىڭ ەتىك تىگۋ تسەحى وتاندىق اياقكيىم وندىرىسىنە تامشىداي بولسا دا ءوز ۇلەسىن قوسارىنا سەنەمىز.
مۇحتار مىرزالين
اقتوبە وبلىسى,
شالقار قالاسى
