جيىنعا ارنايى قاتىسقان حالىقارالىق ەڭبەك ۇيىمىنىڭ باسشىسى جيلبەر ۋنگبو ايتۋلى وقيعانىڭ ماڭىزدىلىعىن اتاپ ءوتىپ, قوردىڭ قاراپايىم جۇمىسشىلارعا الەۋمەتتىك باعىتتا جاساپ جاتقان جۇمىستارىنا وڭ باعا بەردى.
«Paryz» بەن «سامۇرىق-قازىنا» قورى اراسىنداعى ماڭىزدى مەموراندۋمعا قول قويىلۋ راسىمىنە كۋا بولدىق. بۇل كەلىسىم – جۇمىس بەرۋشىلەردىڭ ەلدىڭ الەۋمەتتىك-ەكونوميكالىق دامۋىنداعى ءرولىن كۇشەيتۋگە نەگىز بولادى. ال تۇيتكىلدى ماسەلەلەردى الەۋمەتتىك سۇحبات ارقىلى شەشۋگە بولادى», دەپ اتاپ ءوتتى جيلبەر ۋنگبو.
جۇمابەك جانىقۇلوۆ كونفەدەراتسياعا قولداۋ بىلدىرگەن «سامۇرىق-قازىنا» اق باسقارما توراعاسى نۇرلان جاقىپوۆ باستاعان قور باسشىلىعىنا العىسىن جەتكىزدى.
عيبرات اۋعانوۆ بۇگىندە قوردىڭ كومپانيالار توبىندا 250 مىڭنان استام ادام قىزمەت ەتسە, ولاردىڭ 230 مىڭى ءوندىرىس سالاسىنىڭ جۇمىسشىلارى ەكەنىن اتاپ ءوتتى. قوردىڭ كورپوراتيۆتىك باسقارۋ مەحانيزمى ۇزدىك حالىقارالىق تاجىريبەلەرگە, ونىڭ ىشىندە ەكونوميكالىق ىنتىماقتاستىق جانە دامۋ ۇيىمىنىڭ قاعيدالارىنا, ۇلىبريتانيا كودەكسىنىڭ ەرەجەلەرىنە ساي كەلەدى.
باسقارۋشى ديرەكتور قوردىڭ كادرلىق ساياساتىنىڭ نەگىزگى باسىمدىعى قىزمەتكەرلەر جانە ولاردىڭ الەۋەتىن ارتتىرۋ ەكەنىنە ايرىقشا توقتالدى. قورعا قاراستى كومپانيالاردىڭ بارىندە جۇمىسقا ادام ىرىكتەۋ ءىسى تولىقتاي اۆتوماتتاندىرىلعان جانە «Qsamruk.kz» ورتالىقتاندىرىلعان پلاتفورماسى ارقىلى جۇزەگە اسىرىلادى. مۇندا 550-دەن استام كومپانيا, 247 مىڭنان استام ىزدەنۋشى تىركەلگەن بولسا, سايتتا بارلىعى 50 مىڭنان استام بوس جۇمىس ورنى جاريالانعان.
«سامۇرىق-قازىنا» توبىندا باسقارۋشى جانە اتقارۋشى ورگاندار قۇرامىنداعى ايەلدەردىڭ ۇلەسىن ارتتىرۋ باعىتىندا دا جان-جاقتى جۇمىس جۇرگىزىلىپ جاتىر. قازىرگى تاڭدا قور توبىنىڭ جوعارى باسشىلىعىندا ايەلدەر ۇلەسى 17 پايىزدى قۇراسا, بۇل كورسەتكىشتى 2030 جىلعا قاراي 30 پايىزعا دەيىن ارتتىرۋ مەجەسى بار.
ء«بىز جاستاردى قولداۋعا دا ەرەكشە كوڭىل بولەمىز. بۇگىندە «سامۇرىق-قازىنا» كومپانيالار توبىندا 84 مىڭنان استام جاس مامان جۇمىس ىستەيدى. 2022 جىلدان بەرى قوردىڭ باستاماسىمەن 18 وڭىردە 216 جاستار كەڭەسى قۇرىلدى. جاس ماماندار «تازا قازاقستان» ەكولوگيالىق اكتسياسى اياسىندا سۋ تاسقىنىنىڭ سالدارلارىن جويۋ جۇمىستارىنا بەلسەندى قاتىستى. پرەزيدەنت باستاماسىمەن قولعا الىنعان بۇل جۇمىس ءالى دە جالعاسىن تابادى. جاس ماماندارعا ارنالعان «جەتى قادام» ارنايى كوشباسشىلىق باعدارلاماسى ىسكە قوسىلدى. ونىڭ قاتىسۋشىلارى كاسىپورىندار قىزمەتىن جاقسارتۋ بويىنشا تىڭ باستامالار كوتەرىپ ءجۇر», دەپ اتاپ ءوتتى قوردىڭ باسقارۋشى ديرەكتورى.
«سامۇرىق-قازىنا» قورىندا الەۋمەتتىك ساياساتتى جۇرگىزۋ اياسىندا جۇمىسشىلارمەن ءادىل سۇحبات قۇرۋ جولعا قويىلعان. جىلىنا ەكى مارتە 250 مىڭ قىزمەتكەر اراسىندا «Samruk Research Services» الەۋمەتتىك زەرتتەۋى جۇرگىزىلىپ, جۇمىسشىلاردىڭ ەسەندىگى, ولاردى الاڭداتاتىن ماسەلەلەر زەرتتەلەدى. سونداي-اق جۇمىسشىلاردىڭ قورعا ءوزىن مازالايتىن سۇراق بويىنشا تىكەلەي حابارلاسۋىنا مۇمكىندىك بەرەتىن كەرى بايلانىس بار.
وندىرىستىك قاۋىپسىزدىك سالاسىندا دا ىلكىمدى ىستەر جەتەرلىك. بيىل قور وندىرىستىك قاۋىپسىزدىكتى باسقارۋدىڭ 2028 جىلعا دەيىنگى دامۋ ستراتەگياسىن بەكىتتى. بۇل قۇجاتتا زاڭناما تالاپتارى مەن ۇزدىك الەمدىك تاجىريبەلەر قامتىلعان. كومپانيالار توبى 2022 جىلى «Vision Zero» الەمدىك تۇجىرىمداماسىنا قوسىلىپ, قازىر ونىڭ 7 التىن ەرەجەسى ەنگىزىلىپ جاتىر.
سوڭعى 3 جىلدا قوردىڭ ەڭبەكتى قورعاۋدى باسقارۋ جۇيەسىندە كوپتەگەن جۇمىس اتقارىلىپ, بۇل جاراقاتتانۋ كورسەتكىشتەرىنىڭ تومەندەۋىنە اكەلدى. 2021 جىلمەن سالىستىرعاندا 2023 جىلى جاراقات العانداردىڭ سانى 10%-عا ازايدى. ادام ولىمىنە سوقتىرعان قايعىلى وقيعالار سانى 22%-عا تومەندەدى.
پرەزيدەنت قاسىم-جومارت توقاەۆ قازاقستان حالقىنا ارناعان جولداۋىندا كەلەسى 2025 جىلدى «جۇمىسشى ماماندىقتار جىلى» دەپ جاريالادى. «سامۇرىق-قازىنا» كومپانيالار توبى مەموراندۋم اياسىندا كونفەدەراتسيامەن بىرلەسە وتىرىپ, وسى باعىتتاعى جۇمىستى كۇشەيتەتىن بولادى.
