№97 مەكتەپ-گيمنازيادا اشىلعان وسىنداي جاڭا سيپاتتاعى ينكليۋزيانى قولداۋ كابينەتىنىڭ ءبىرىن «سامۇرىق-قازىنا» قورىنىڭ باسقارما توراعاسى نۇرلان جاقىپوۆ پەن استانا اكىمىنىڭ ورىنباسارى ەسەت بايكەن ارالاپ كوردى. جاڭا سيپاتتاعى ءتيىستى سىنىپتار №22 مەكتەپ-گيمنازيادا, №36 ورتا مەكتەپتە, ك.مىڭباەۆ اتىنداعى №59 مەكتەپ-ليتسەيدە, ءا.بوكەيحان اتىنداعى №76 مەكتەپ-ليتسەيدە جابدىقتالدى. يگىلىكتى ءىس «Charity Samruk Marathon» قايىرىمدىلىق مارافونى كەزىندە جينالعان 126,7 ميلليون تەڭگەگە اتقارىلعانىن اتاپ وتكەن ءجون. بۇل قاراجاتقا مەكتەپتەردە جوندەۋ جۇمىستارى جۇرگىزىلىپ, قۇرال-جابدىقتار, جيھاز بەن وقۋ-ادىستەمەلىك كەشەندەرى ساتىپ الىندى, ماماندار دايارلاندى.
«سامۇرىق-قازىنا» اق كورپوراتيۆتىك الەۋمەتتىك جاۋاپكەرشىلىك اياسىندا ەرەكشە قاجەتتىلىكتەرى بار ادامداردى كەشەندى تۇردە قولداپ كەلەدى. ەل وڭىرلەرىندە 42 وڭالتۋ ورتالىعىن, 10 سپورت كەشەنىن اشتىق. بەيىمدەلگەن سپورت سەكتسيالارىنا 1000-نان استام بالا قاتىسادى. مۇگەدەكتىگى بار جاستاردى تسيفرلىق كاسىپتەرگە وقىتۋدى باستادىق. وسىلايشا, ادامدارعا تۋعانىنان باستاپ كومەك كورسەتىپ, ولاردىڭ قوعامدا الەۋمەتتەنۋىنە بارلىق جاعىنان ىقپال ەتەمىز», دەدى نۇرلان جاقىپوۆ.
ينكليۋزيانى قولداۋ كابينەتىنىڭ ۇلگىسىن قور ينكليۋزيا سالاسىنداعى ساراپشىلارمەن بىرلەسىپ ازىرلەدى. سىنىپتار ەكى بولەك كەڭىستىكتەن تۇرادى: پسيحولوگ, دەفەكتولوگ, لوگوپەد جانە قىش بۇيىمدارىن جاساۋ كابينەتىنە open space تۇرىندەگى كەڭ بولمەلەر, سونىمەن قاتار ەمدىك دەنە شىنىقتىرۋ كابينەتى (فيزيكالىق تەراپيا). ءدارىسحانالار اۋماعى كەمىندە 60 شارشى مەتردى قۇرايدى. بۇل سايكەسىنشە بالالارعا ىڭعايلى دا جايلى جاعدايدا ساباق وتكىزۋگە مۇمكىندىك بەرەدى.
«سىزدەر كەرەمەت جۇمىس جاسادىڭىزدار. سىزدەردىڭ ارقالارىڭىزدا ەرەكشە بالالار قاراپايىم بالالارمەن بىرگە وقۋعا مۇمكىندىك الدى. قازىر مەنىڭ ۇلىم بەيىمدەلۋ كەزەڭىنەن ءوتىپ جاتىر. مۇعالىمنىڭ نۇسقاۋلارىن ورىنداۋدى ۇيرەنەدى, ورتاعا قوسىلادى. ءاۋتيزمى بار بالالار ءۇشىن الەۋمەتتەنۋ وتە ماڭىزدى», دەپ ريزاشىلىعىن جەتكىزدى مەكتەپ وقۋشىسىنىڭ اناسى ماريا ايدارحانوۆا.
وقىتۋشىلار مەن ماماندار وقۋدان ءوتىپ, ولارعا جىل بويىنا ادىستەمەلىك قولداۋ كورسەتىلەدى. ينكليۋزيانى قولداۋ كابينەتتەرىن قۇرۋ جوباسىن «سامۇرىق-قازىنا» كومپانيالار توبى اتىنان «Samruk-Kazyna Trust» قورى جۇزەگە اسىردى.
