سۋرەت: sputnik.kz
جولداۋدا «بۇگىنگى زامان تالابىنا ساي كەلەتىن وقۋ ورىندارىن قولداۋعا, ءاربىر گرانت قۇنى جاستاردىڭ ساپالى ءبىلىم الۋىنا قولايلى جاعداي جاساۋعا ءتيىس» دەپ كورسەتىلدى. ودان ءارى ء«وز كاسىبىن جەتىك مەڭگەرگەن ادامدار ۇلت ساپاسىن ارتتىرادى. ۇستازدار ءبىلىمدى ۇرپاق تاربيەلەۋ ارقىلى ەلىمىزدىڭ وركەندەۋىنە جول اشادى. سوندىقتان, پەداگوگيكالىق جوعارعى وقۋ ورىندارىنا تالاپتى, قابىلەتتى جاستاردى قابىلداۋعا باسا ءمان بەرۋ كەرەك. بۇل باعىتتاعى جۇمىستاردىڭ بەت الىسى جاقسى, ونى جالعاستىرۋ قاجەت» دەلىنگەن.
الەمدىك تاجىريبەدە ەرەكشە قابىلەتتى, تالانتتى بالالارعا ساپالى ءبىلىم بەرۋمەن, ەۋروپا ەلدەرىندە ارنايى مامانداندىرىلعان مەكتەپتەر اينالىسادى. ولار عاسىرلار بويى ادامزاتقا قىزمەت ەتىپ, تاجىريبە جيناقتاعان, تەوريالىق جاعىنان دا جۇيەگە كەلگەن وقۋ ورىندارى.
بىزدە ەگەمەندىك العان سوڭ عانا, وتكەن عاسىردىڭ 90-جىلدارىنان باستاپ جاڭا ءتيپتى مەكتەپ-ليتسەي, گيمنازيا, دارىندى بالالار مەكتەپتەرى قۇرىلىپ, قارقىندى جۇمىس ىستەي باستادى. ولار تالانتتى دا قابىلەتتى بالالاردى بولەك وقىتىپ, ساپالى ءبىلىم بەرۋدە اجەپتاۋىر جوعارى كورسەتكىشكە قول جەتكىزدى.
سولاردىڭ ءبىرى – باتىس قازاقستان وبلىستىق مامانداندىرىلعان دارىندى بالالار مەكتەبى ەدى.
شيرەك عاسىر بويى وبلىستىق دارىندى بالالار مەكتەبى مەكتەپ مارتەبەسىنە سايكەس ەليتارلىق ءبىلىم بەردى. ونىڭ ۇزدىك كورسەتكىشكە جەتۋىنە نەگىز بولعان – تومەندەگى الەمدىك يننوۆاتسيالىق تاجىريبەلەر ەدى.
ەڭ الدىمەن, مەكتەپ مۇلدە تىڭنان, جوعارى پەداگوگيكالىق وقۋ ورنىنىڭ عىلىمي-ادىستەمەلىك, ماتەريالدىق نەگىزىندە قۇرىلدى, ينستيتۋتتىڭ رەكتورى پروفەسسور تۇياقباي رىسبەكوۆ جوعارى وقۋ ورنىنىڭ عىلىمي-ادىستەمەلىك بازاسىن وقۋشىلارعا ستۋدەنتتەرمەن بىردەي پايدالانۋعا تولىق مۇمكىندىك جاسادى.
سونىمەن قاتار سىنىپتا وقۋشىنىڭ قابىلەت-قىزىعۋشىلىعىنا قاراي بىرىڭعاي بەيىندى ءبىلىم بەرۋدە جەكەلەگەن پاندەر تەرەڭدەتىلىپ وقىتىلاتىن انگلو-ساكسوندىق جانە ءار وقۋشىنىڭ شىعارماشىلىق جەكە-دارا قابىلەتىن دامىتۋ باعىتىنداعى فينليانديالىق جۇيە جۇزەگە اسىرىلدى. بۇل باعىتتار ءبىزدىڭ جاعدايىمىزدا دا ءوزىنىڭ ەرەكشە تيىمدىلىگىن كورسەتتى. وقىتۋ ءۇردىسىن ءار وقۋشىنىڭ قابىلەت-مۇمكىندىگىنە قاراي جۇرگىزە وتىرىپ, بەيىندى ءبىلىم بەرۋ مودەلىن جۇزەگە اسىرۋعا قولايلى بولىپ شىقتى. مەكتەپتە بىردەن فرانتسيا, گەرمانيا, قىتاي ەلدەرىندەگى تاڭداۋ جانە مىندەتتى پاندەردى جان-جاقتى مەڭگەرتۋدە, وقۋشىلاردىڭ كۇردەلى دە كولەمدى تەوريالىق تۇراقتى يننوۆاتسيالىق ساۋاتىن دامىتۋداعى لابوراتوريالىق-پراكتيكالىق ماتەريالداردى قوسارلانعان ساباق ارقىلى جۇزەگە اسىرۋ قولعا الىندى. ول بارعان سايىن ادىستەمەلىك جاعىنان جەتىلدىرىلىپ, ساپالى ءبىلىم بەرۋدىڭ باستى فاكتورىنا اينالدى. ءبىلىم ستاندارتىن وقۋشىلاردىڭ جۇيەلى, تۇراقتى مەڭگەرىپ وتىرۋىن قامتاماسىز ەتۋدە جاپوندىق ءبىلىمدى باقىلاۋدىڭ مونيتورينگتىك ادىستەرىنە ەرەكشە ءمان بەرىلدى.
ءبىلىمدى باقىلاۋدىڭ ءبىرتۇتاس جاپوندىق مونيتورينگتىك جۇيەسى وقۋشىنىڭ ءبىلىم الۋ, مۇعالىمنىڭ ءبىلىم بەرۋ ءۇردىسى دەڭگەيىن كۇندەلىكتى, توقساندىق, جىلدىق تۇراقتى باقىلاۋ ارقىلى ءار وقۋشىنىڭ ءبىلىمدى ساپالى مەڭگەرۋىن قامتاماسىز ەتكەن ەڭ ءبىر يننوۆاتسيالىق ءتاسىل بولدى. وسى نەگىزدە دارىندى بالالارعا ارنالعان مەكتەپتىڭ تۇلەكتەرى سوڭعى ونداعان جىل بويى قاتارىنان جوعارى وقۋ ورىندارىنا گرانتپەن 100 پايىز قابىلدانىپ وتىردى. ءجۇز پايىز! بۇل – بۇعان دەيىن رەسپۋبليكادا بولماعان كورسەتكىش. 150-دەن استام شاكىرتىمىز «بولاشاق» باعدارلاماسى بويىنشا الەمنىڭ ەڭ تاڭداۋلى ۋنيۆەرسيتەتتەرىندە, 20-دان استامى ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتى جانىنداعى ا.كولموگوروۆ مەكتەبىندە ءبىلىم الدى.
ءبىر وكىنىشتىسى, بۇگىندە وسى وزىق تاجىريبە ءوز دارەجەسىندە دامي الماي وتىر. جولداۋدا مەملەكەت باسشىسى قابىلەتتى جاستارعا ساپالى ءبىلىم بەرۋدەگى الەمدىك وزىق تاجىريبەلەردى ءوز دارەجەسىندە جالعاستىرۋ قاجەتتىگىن ايتتى. ءبىز وسىدان ءۇمىت ەتەمىز.
ناسىپقالي داۋلەتوۆ,
پەداگوگيكا عىلىمدارىنىڭ كانديداتى, پروفەسسور
