فوتو: اشىق دەرەككوز
سۇيىتىلعان گازدى جەڭىلدەتىلگەن باعامەن ءبولۋ ماسەلەسى قاشاندا وزەكتى بولىپ قالا بەرەدى. استىق ەگەتىن التى ءوڭىردىڭ بۇكىل جيناۋ ماۋسىمىنا كەپتىرگىشتەردىڭ جۇمىسى ءۇشىن جالپى قاجەتتىلىگى 21,5 مىڭ توننا سۇيىق وتىن بولسا, (قىركۇيەك-قازان) قازىرگى ۋاقىتتا 5 مىڭ توننا بولىنگەن.
«سۇيىتىلعان گاز سۇيىق وتىنمەن جۇمىس ىستەيتىن كەپتىرگىشتەردىڭ ەڭ كوپ سانى ورنالاسقان اقمولا, پاۆلودار جانە سولتۇستىك قازاقستان وبلىستارىنا تاراتىلدى. باسقا ءۇش وبلىستىڭ فەرمەرلەرىن كەپتىرۋ اگرەگاتتارىن سۇيىتىلعان گازبەن جەدەل قامتاماسىز ەتۋ ءۇشىن سەرىك جۇمانعارين بولىنگەن وتىن كولەمىن قاجەتتىلىك تۋىنداعان وڭىرلەرگە قايتا ءبولۋدى تاپسىردى. استىق جيناۋ ماۋسىمىنا گاز قاجەتتىلىگىن تولىق قامتاماسىز ەتۋ ءۇشىن وندىرۋشىدەن سۇيىتىلعان گازدىڭ كوممەرتسيالىق باعاسىن ارزانداتۋ مۇمكىندىكتەرى قاراستىرىلادى. سونىمەن قاتار ىشكى نارىقتا سۇيىتىلعان گازعا دەگەن جوعارى سۇرانىستى ەسكەرە وتىرىپ, وڭىرلەرگە كەپتىرۋ اگرەگاتتارىنىڭ مۇمكىندىكتەرى كەزىندە وتىننىڭ ەكى تۇرىمەن جۇمىس ىستەۋ, سونىڭ ىشىندە ديزەلدى تاڭداۋ ۇسىنىلدى», دەپ حابارلادى ۇكىمەتتىڭ ءباسپاسوز قىزمەتى.
جەدەل شتابتا «قازاگروقارجى» اق باسقارما توراعاسى ايدار پراشەۆ ەگىن جيناۋ كەزەڭىندە استىق كەپتىرگىشتەردى جىلدىق 9%-بەن ساتىپ الۋعا كرەديت بەرۋ ءۇشىن قارجى قۇرالى ازىرلەنگەنىن حابارلادى. فەرمەرلەردەن 260 ملن تەڭگە سوماعا 6 ءوتىنىم كەلىپ تۇسكەن. ايتا كەتەيىك, اۋىل شارۋاشىلىعى تەحنيكاسىنىڭ وسى ءتۇرى قۇنىنىڭ 30% مەملەكەت سۋبسيديالايدى.
10 قىركۇيەكتەگى جاعداي بويىنشا ەلىمىزدە شامامەن 4,7 ملن گا ءداندى جانە بۇرشاقتى داقىلدار جينالدى نەمەسە 28%, ورتاشا ونىمدىلىك 14,9 تس/گا قۇرايدى, شامامەن 6,9 ملن توننا استىق باستىرىلعان.
ال 5 قىركۇيەكتەگى جاعداي بويىنشا رەسپۋبليكا ەلەۆاتورلارىنا 880,5 مىڭ توننا استىق تۇسكەن, ونىڭ ىشىندە ىلعالدىلىعى 14,5%-عا دەيىن – 40,1% بولسا, 14,6-دان 17,0%-عا دەيىن – 23,1%. 260,4 مىڭ توننا (29,6%) كەپتىرىلدى, 321,8 مىڭ توننا (36,5%) وڭدەلگەن.
