فوتو: سۋ رەسۋرستارى جانە يرريگاتسيا مينيسترلىگى
كەزدەسۋدە نۇرجان نۇرجىگىتوۆ شەتەلدىك ينۆەستورلارعا ىنتىماقتاستىق مۇمكىندىكتەرى مەن جۇزەگە اسىرۋعا بولاتىن جوبالاردى تانىستىردى. اتاپ ايتقاندا, سۋ سالاسىن دامىتۋدىڭ 2024-2028 جىلدارعا ارنالعان كەشەندى جوسپارىندا كوزدەلگەن سۋ شارۋاشىلىعى نىساندارىن سالۋ جانە رەكونسترۋكتسيالاۋ جونىندەگى جۇمىستار تۋرالى ايتىپ بەردى.
مينيستر سۋ سالاسىن, جەراستى سۋلارىن اۆتوماتتاندىرۋ جانە تسيفرلاندىرۋ, توپتىق سۋ قۇبىرلارىن قايتا جاڭعىرتۋ جانە مامان دايارلاۋ سالاسىندا دا بىرلەسە ارەكەت ەتۋدى ۇسىندى. سونىمەن قاتار, تاراپتار قازاق سۋ شارۋاشىلىعى عىلىمي-زەرتتەۋ ينستيتۋتىنىڭ, سۋ رەسۋرستارى اقپاراتتىق-تالداۋ ورتالىعىنىڭ جانە ۇلتتىق گيدروگەولوگيالىق قىزمەتتىڭ ماتەريالدىق-تەحنيكالىق بازاسىن جاقسارتۋ ماسەلەسىن تالقىلادى.
شەتەلدىك ينۆەستورلار ءوز كەزەگىندە مينيسترلىكتىڭ جوبالارىنا قاتىسۋعا دايىن ەكەندىكتەرىن ءبىلدىرىپ, تالقىلاۋدى بىرلەسكەن جۇمىس توپتارى شەڭبەرىندە جالعاستىرۋعا كەلىستى.
ء«بىز يسلام دامۋ بانكىمەن كەلىسسوزدەر حاتتاماسىنا قول قويدىق. وسى ارقىلى قازاقستاننىڭ سۋ سالاسىنا قوماقتى ينۆەستيتسيا اكەلەتىن كەلىسىمدەردى ازىرلەۋ جانە وعان قول قويۋعا مۇمكىندىك بەرەتىن كەلەسى كەزەڭگە وتتىك. مەملەكەت باسشىسى ەلىمىزدىڭ سۋ سالاسىنا ينۆەستيتسيا تارتۋدىڭ ماڭىزىن اتاپ ءوتتى, سوندىقتان ءبىز حالىقارالىق قارجى ينستيتۋتتارىمەن بەلسەندى كەلىسسوز جۇرگىزىپ جاتىرمىز», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
