فوتو: Depositphotos
ولجاس بەكتەنوۆ مۇنايلى اۋدانى بەسشوقى اۋىلىنداعى بالالاردىڭ ۋلانۋىنا قاتىستى دەنساۋلىق ساقتاۋ, وقۋ-اعارتۋ مينيسترلەرى مەن ماڭعىستاۋ وبلىسىنىڭ اكىمىن تىڭدادى.
«بۇگىنگى تاڭدا 460 بالا دارىگەرلەردىڭ باقىلاۋىندا, ولاردىڭ 83-ءى اۋرۋحانادا, تاعى ەكى بالا جانساقتاۋ بولىمىندە جاتىر. بارلىق زارداپ شەككەندەردىڭ جاعدايى تۇراقتى. دەنساۋلىق جاعدايىنىڭ جاقسارۋىنا بايلانىستى رەانيماتسيادا بولعان ەكى بالا جالپى بولىمشەگە اۋىستىرىلادى», دەلىنگەن حابارلامادا.
ۋلانۋ بەلگىلەرىمەن كەلگەن بالالاردىڭ بارلىعىنا تولىق كولەمدە قاجەتتى مەديتسينالىق كومەك, ونىڭ ىشىندە پسيحولوگيالىق كومەك كورسەتىلەتىنى اتاپ ءوتىلدى. وقيعا ورنىندا وقۋ-اعارتۋ مينيسترلىگىنە قاراستى بالالاردىڭ قۇقىقتارىن قورعاۋ كوميتەتىنىڭ وكىلدەرى جۇمىس ىستەپ جاتىر. زارداپ شەككەندەرگە جانە ولاردىڭ وتباسىلارىنا قولداۋ شارالارىن كورسەتۋ بويىنشا جۇمىستار جۇرگىزىلىپ جاتىر. اۋرۋ وشاعىن وقشاۋلاۋ جانە جويۋ شارالارىن كۇشەيتۋ ءۇشىن وبلىسقا «حالىق دەنساۋلىعىن قورعاۋ ۇلتتىق ورتالىعى» رمك جانىنداعى «سانيتاريالىق-ەپيدەميولوگيالىق ساراپتاما جانە مونيتورينگ عىلىمي-پراكتيكالىق ورتالىعى» رمك فيليالىنىڭ ماماندارى جىبەرىلدى.
«ۇكىمەت باسشىسىنىڭ تاپسىرماسى بويىنشا ءبىر اي مەرزىمدە رەسپۋبليكاداعى بارلىق مەكتەپ اسحانالارى سانيتارلىق-ەپيدەميولوگيالىق تالاپتاردىڭ ساقتالۋىن قاداعالايدى, بۇل شارا مەكتەپتەگى تاماقتاندىرۋدىڭ قاۋىپسىزدىگىن قامتاماسىز ەتۋ شارالارىن كۇشەيتۋگە جانە مۇنداي جاعدايلاردىڭ قايتالانۋىن بولدىرماۋعا باعىتتالعان», دەپ حابارلادى ۇكىمەتتىڭ ءباسپاسوز قىزمەتى.
ەستەرىڭىزگە سالا كەتەيىك, بەسشوقى اۋىلىنداعى №8 مەكتەپتە ءبىرىنشى جانە ءتورتىنشى سىنىپ وقۋشىلارى اسحانادا جاپپاي ۋلانىپ قالعان.
