قازاقستان پرەزيدەنتى وسى حالىقارالىق ماڭىزدى شاراعا ارنايى كەلگەن تاتارستان رايسىنا ريزاشىلىعىن ءبىلدىردى. مەملەكەت باسشىسى كوشپەندىلەر ويىندارىنا رەسەي قۇراماسىنىڭ اتىنان كوپتەگەن سپورتشى قاتىساتىنىن, ونىڭ ىشىندە تاتارستاننىڭ وكىلدەرى دە بار ەكەنىن اتاپ ءوتتى.
قازاقستان پرەزيدەنتى ساۋدا-ەكونوميكالىق ىنتىماقتاستىق جوسپارلى تۇردە دامىپ كەلە جاتقانىن ايتىپ, ماشينا جاساۋ جانە مۇناي-گاز حيمياسى سالالارىنداعى بىرلەسكەن جوبالاردى ۋاقتىلى ءارى ساپالى ىسكە اسىرۋدىڭ ماڭىزىنا توقتالدى.
رۋستام ميننيحانوۆ قوناقجايلىق تانىتقانى جانە تۇركى حالىقتارىنىڭ تاريحى, ءداستۇرى ءارى كۇللى كوشپەندىلەر وركەنيەتىنىڭ ورتاق ەكەنىن كورسەتەتىن ويىندارعا شاقىرعانى ءۇشىن قاسىم-جومارت توقاەۆقا العىس ايتتى.
تاتارستان باسشىسى تەرەڭ وڭدەلگەن ءونىم شىعارۋ, IT-يندۋستريا جانە ەكونوميكانىڭ باسقا دا ءوزارا مۇددەلى سالالارىندا جاڭا بىرلەسكەن جوبالاردى جۇزەگە اسىرۋعا دايىن ەكەنىن جەتكىزدى.
كەزدەسۋدە وڭىرارالىق ىنتىماقتاستىق ماسەلەلەرى جانە بيىل كۇزدە قازان قالاسىندا وتەتىن بريكس ءسامميتىنىڭ كۇن ءتارتىبى تالقىلاندى.
