ۇزىندىعى 6 شاقىرىم بولاتىن ۋچاسكە «ورتالىق-وڭتۇستىك» (استانا – قاراعاندى – بالقاش-الماتى) كولىك ءدالىزىنىڭ نەگىزگى قۇرامداس بولىگى جانە ەلىمىزدىڭ كولىك ينفراقۇرىلىمىنىڭ دامۋىندا ماڭىزدى ءرول اتقارادى.
قايتا جاڭارتۋ بارىسىندا جەر توسەمىن ورنالاستىرۋ, تەمىرجول تورابى ارقىلى وتەتىن ەستاكادا, وتپەجول, ەكى كولىك قيىلىسى, سۋوتكىزگىش قۇبىرلار سەكىلدى جاساندى قۇرىلىستارى سالىنىپ, كەشەندى جۇمىستار اتقارىلدى. بۇكىل ۋچاسكە بويىنشا جولدىڭ ۇستىڭگى قاباتىنا قيىرشىق تاستى-ماستيكالىق اسفالتبەتون توسەلگەن. سونداي-اق جارىقتاندىرۋ جانە سۋوتكىزگىش جۇيەسى ورناتىلىپ, جول بەلگىلەرى, توسقاۋىلدار مەن تاڭبالاۋ سىندى ارلەۋ جۇمىسى جۇرگىزىلدى. جولدىڭ قولدانىستاعى ۋچاسكەلەرىندە بەكىتۋ جانە ورتاشا جوندەۋ جۇمىستارى جۇزەگە استى.
جىلدىڭ باسىنان بەرى جول-قۇرىلىس ماتەريالدارىن دايىنداۋ, ونىڭ ىشىندە قيىرشىق تاس, قۇم, تەمىربەتون كونسترۋكتسيالارى, توسقاۋىلدار مەن قورشاۋلار, جول بەلگىلەرى مەن جارىقتاندىرۋ ەلەمەنتتەرى جاسالدى. قارقىندى ءىس-قيمىلدىڭ ناتيجەسىندە قۇرىلىس بەلگىلەنگەن مەرزىمدە اياقتالىپ, ترانزيتتىك قوزعالىستىڭ ۋاقىتىلى اشىلۋىنا مۇمكىندىك بەردى.
جوبانى جۇزەگە اسىرۋ ءۇشىن اسفالتبەتون جانە بەتون ارالاستىرۋ زاۋىتى, 81 بىرلىك تەحنيكا مەن 256 جۇمىسشى جۇمىلدىرىلدى.
«بيىل 3,1 مىڭ شاقىرىم رەسپۋبليكالىق اۆتوجولداردا قايتا جاڭارتۋ جانە قۇرىلىس جۇمىسى جۇرگىزىلىپ جاتىر, ونىڭ ىشىندە 1,5 مىڭ شاقىرىمدا جۇمىس جىلدىڭ سوڭىنا دەيىن اياقتالادى. پرەزيدەنت قاسىم-جومارت توقاەۆ ءوز سوزىندە: «جوعارى ساپالى جولدار جالپىحالىقتىق مىندەتكە اينالۋى ءتيىس. ساپالى جولدار بولماسا, ەلىمىزدە ەشقانداي ىلگەرىلەۋشىلىك تۋرالى ءسوز بولۋى مۇمكىن ەمەس», دەگەن ەدى. وسىعان سايكەس, مەملەكەت باسشىسىنىڭ تاپسىرماسىن ورىنداۋ ماقساتىندا ءبىزدىڭ تاراپىمىزدان اۋقىمدى جۇمىس جۇرگىزىلۋدە. بۇل اينالما جولدىڭ ۇزىندىعى 6 شاقىرىم, قۇنى 25,6 ملرد تەڭگە, شامامەن ءتورت جىل ۋاقىت كولەمىندە سالىندى. وسى جوبانىڭ بۇكىل وبلىس ءۇشىن ماڭىزى زور, سەبەبى ول كولىك اعىنىن ايتارلىقتاي جەڭىلدەتەدى, جاقىن ماڭداعى ەلدى مەكەن تۇرعىندارىنىڭ جول ءجۇرۋ ۋاقىتىن قىسقارتادى, سونىمەن قاتار ءبىزدىڭ ەل ارقىلى وتەتىن ءترانزيتتىڭ ارتۋىنا دا سەپتىگىن تيگىزەدى, قوزعالىس قاۋىپسىزدىگىنىڭ دەڭگەيىن ارتتىرادى. بۇل جول تەك وسى اۋداننىڭ عانا ەمەس, جالپى وبلىستىڭ دامۋىنا دا وڭ اسەرىن تيگىزەدى», دەدى الماتى وبلىسىنىڭ اكىمى مارات سۇلتانعازيەۆ.
الماتى وبلىسى
