«فوتوگراف بولۋدىڭ عاجايىپ ءبىر قاسيەتى – تۇرمىس-تىرشىلىكتى, قورشاعان ورتانى كوكىرەك كوزىمەن كورەسىڭ. سۋرەتتەن جەلدىڭ گۋىلى, قۇستىڭ قانات قاققان سىبدىرى ەستىلەتىندەي اسەرلى بولۋى كەرەك. سوندا سۋرەتكە جان بىتكەندەي بولادى. قيالدىڭ قاناتىندا قالىقتاي ءجۇرىپ, تالاي جەردىڭ ءدامىن تاتتىم. قازاقتا «اتىڭ باردا جەر تانى, جەلىپ ءجۇرىپ» دەپ بەكەر ايتپاسا كەرەك. وسىناۋ ساپارلارىمدا ومىرلىك سەرىگىم قاينارگۇل مەن التىن اسىقتاي ۇلدارىمدى, قىرمىزى گۇلدەي قىزدارىمدى بىرگە ىلەستىرە ءجۇرۋدى ادەتكە اينالدىردىم. بالالاردىڭ كىشكەنە كەزىندەگى كورگەن-بىلگەندەرى ەشۋاقىتتا ەستەن كەتپەيتىنى بەلگىلى. سوندىقتان ولاردىڭ تۋعان كۇندەرىندە, ايتۋلى مەرەكەلەردە, توقساندىق دەمالىستارىن كوڭىلدى ءارى ەستە قالارلىقتاي ەتىپ وتكىزۋگە تىرىستىق. مۇنداي ساپارلاردا بالالارىمىز تابيعات توسىندە دەمالىپ قانا قويمايدى, تانىم كوكجيەگىن كەڭەيتەدى. قورشاعان ورتانىڭ قادىرىن ءبىلىپ, تاسى مەن گ ۇلىنە ۇڭىلەدى. سۇيسىنەدى, سۇيەدى. جەر-انانى ايالاۋدى ۇيرەنەدى. وسىنداي سەزىمدى بويىنا ءسىڭىرىپ وسكەن بالا اسا سەزىمتال, تۋعان جەرگە, وتانعا دەگەن سۇيىسپەنشىلىگى ارتىپ, ءوز ەلىنىڭ پاتريوتى بولارى انىق», دەگەن نۇربولات تاستانقۇلوۆتىڭ وتباسى مۇشەلەرى دە شەتتەرىنەن ونەرلى.
اتا-انانىڭ ايالى الاقانى مەن مەيىرىمىنە بولەنىپ وسكەن ۇل-قىزدارى جوعارى ءبىلىم الىپ, وسى كۇنى سان سالادا ەڭبەك ەتىپ ءجۇر. «ۇيادا نە كورسە, ۇشقاندا سونى ىلەدى» دەگەندەي, ونەرگە جاقىن وتباسى مۇشەلەرى وتكەن جىلى «مەرەيلى وتباسى» بايقاۋىنىڭ جەڭىمپازى اتانعان.
«مەن ءوزىم فوتوجۋرناليست بولعاندىقتان اۋدانىمىزدىڭ اسەم جەرلەرىن سوناۋ 1985 جىلدان بەرى فوتواپپاراتىما ءتۇسىرىپ, مۇراعاتىمدا سان مىڭداعان كادرلارىم ساقتالعان. اۋدانعا كينو جانە بەينەكامەرانى العاش اكەلگەندەردىڭ ءبىرىمىن. بۇل مەنىڭ ماماندىعىم, ءحوببيىم دەسەم بولادى. ءوڭىردىڭ اسەم تابيعاتىن, تاريحي ورىندارىن اراگىدىك الەۋمەتتىك جەلىدە جاريالاپ, ەلىمىزدىڭ تۋريزم سالاسىن دامىتۋعا وزىندىك ۇلەسىمدى قوسىپ, قىزمەت جاساپ كەلەمىن. الەمگە ايگىلى كولساي, قايىڭدى كولدەرى, شارىن شاتقالى, ءشولادىر تاۋىنىڭ ەتەگىندەگى قۇمتەكەي قۇمى, اقتاستى پەتروگليفتەرى مەن تادو بۋچيك جازۋى, سان عاسىر ساقتالعان ءۇيسىن توبەلەر, قارقارا جايلاۋىنداعى وبالار ءالى دە زەرتتەۋگە ءزارۋ. سارىكولدىڭ تۇزدى باتپاعى قانشاما جانعا شيپا, جانىنا قۋات بولدى. جۋانتوبە, قاتارتوبە, قوستوبە اتالىپ, قويناۋىنا سىر تۇنعان توبەلەر كىمدى دە بولسا ويلانتۋى كەرەك», دەگەن كاسىبي ءفوتوتىلشى كەڭ-بايتاق جەرىمىزدىڭ كەرەمەتتەرىن تامسانا تىلگە تيەك ەتتى.
تاستانقۇلوۆتار اۋلەتى جاقىندا ەلىمىزدىڭ وڭتۇستىك ءوڭىرىن ارالاپ قايتىپتى.
«تۇركىلەردىڭ ءتورى اتانعان تۇركىستاندا بولىپ كەلدىك. ارىستانباب, قوجا احمەت ياساۋي كەسەنەلەرىندە, سول ماڭدا ورنالاسقان شىعىس مونشاسى, جەراستى قىلۋەت مەشىتىنىڭ ءبىز وقىعان سىرلارىنان بولەك تاڭعاجايىپ قىرلارىن كوزبەن كورىپ, قولىمىزبەن ۇستاپ قايتتىق. تۋريستەردىڭ كوپتىگى وزىمە ۇلكەن وي تۋعىزدى. وسىنداي ۇشى-قيىرى جوق كەڭ دالانى بابالارىمىز نايزانىڭ ۇشىمەن, بىلەكتىڭ كۇشىمەن, اقىل-ايلاسىمەن قورعاعانى كەيىنگى ۇرپاققا ساباق بولار دەگەن ويدامىن. ونى وسكەلەڭ ۇرپاققا ۇلگى ەتە بىلسەك قانا كوپ نارسەگە قول جەتكىزەتىنىمىزگە تولىق سەنىمدىمىن. وسى تۇرعىدا ولكەتانۋشى دوسىم بولات جاپسارباي ۇلىن ايتپاي كەتۋىمە بولمايدى. ەرەن ەڭبەگىنىڭ, تىنىمسىز ىزدەنىسىنىڭ ناتيجەسىندە «كەگەن اۋدانىنىڭ 100 تاريحي كيەلى ورنى» دەگەن اتاۋمەن ولكەمىزدىڭ تاريحناماسىن جارىققا شىعاردى. ءبىز وتباسىمىزبەن ارالاسىپ قانا قويماي, ەل-جۇرتىمىزدىڭ قاجەتىنە جارايتىن, ۇرپاققا ۇلگى بولارلىق ءىس قالدىرۋ جولىندا جۇمىلا جۇمىس ىستەپ كەلەمىز. بۇل دا ءبىزدىڭ وتباسىلىق ءداستۇرىمىزدىڭ ءبىر كورىنىسى», دەيدى كورگەنى كوپ وتاعاسى.
تەمىرلىك اۋلىندا دۇنيەگە كەلگەن ن.تاستانقۇلوۆ 40 جىلعا جۋىق اۋداندىق «كوممۋنيزم نۇرى», كەيىننەن ء«حانتاڭىرى», قازىرگى «قارقارا» گازەتىندە تاباندى ەڭبەك ەتىپ كەلەدى.
جەتى بالانى ءوسىرىپ, جەتكىزگەن نۇربولات تاستانقۇلوۆ پەن قاينارگۇل سمايىلقىزى – بۇل كۇندە ۇلدى ۇياعا قوندىرىپ, قىزدى قياعا ۇشىرىپ, ولاردان 17 نەمەرە-جيەن سۇيگەن باقىتتى وتباسى.
الماتى وبلىسى
