مەملەكەت باسشىسى قاسىم-جومارت توقاەۆ «ادىلەتتى مەملەكەت. ءبىرتۇتاس ۇلت. بەرەكەلى قوعام» جولداۋىندا: «كەلەسى ماڭىزدى ماسەلە – ستۋدەنتتەردى جاتاقحانامەن قامتاماسىز ەتۋ. بۇل تۇيتكىلدى شەشۋ ءۇشىن جوعارى وقۋ ورىندارىمەن جانە قۇرىلىس كومپانيالارىمەن مەملەكەتتىك-جەكەمەنشىك سەرىكتەستىك ورناتۋ ءتاسىلىن بارىنشا ەنگىزۋ كەرەك» دەگەن ەدى.
مىنە, پرەزيدەنتتىڭ وسىناۋ تاپسىرماسىن ورىنداۋ ماقساتىندا «SUNRISE CY» جشس شىمكەنتتىڭ ورتالىعىنان مەملەكەتتىك-جەكەمەنشىك سەرىكتەستىك اياسىندا 550 ورىندىق جاتاقحانا سالىپ بەردى. ەندى ونى م.اۋەزوۆ اتىنداعى وقۋ ستۋدەنتتەرى پايدالانادى. جۋىردا جاڭادان بوي كوتەرگەن جاتاقحانانىڭ اشىلۋ ءراسىمى ءوتتى.
م.اۋەزوۆ اتىنداعى وقۋ-ءدىڭ الەۋمەتتىك جانە تاربيە جۇمىسى جونىندەگى پرورەكتورى عاني بەسباەۆتىڭ ايتۋىنشا, عىلىم جانە جوعارى ءبىلىم مينيسترلىگى, ۋنيۆەرسيتەت پەن «SUNRISE CY» سەرىكتەستىگى اراسىنداعى ۇشجاقتى كەلىسىم ناتيجەسىندە, وسى جاتاقحانا بوي كوتەرگەن.
«زەرتتەۋشى مارتەبەسىن العان م.اۋەزوۆ اتىنداعى وقۋ-دىڭ جەكە يەلىگىندە بۇرىننان كەلە جاتقان ءوزىنىڭ 4 جاتاقحاناسى بار. سونىمەن قاتار مەملەكەتتىك-جەكەمەنشىك ارىپتەستىگى اياسىندا تاعى 4 جاتاقحانانى سالىپ بەرگەن كومپانيالارمەن كەلىسىمشارتقا تۇردىق. سونىڭ ءبىرى – بۇگىن سالتاناتتى اشىلۋى بولعان «SUNRISE CY» سەرىكتەستىگىنىڭ ستۋدەنتتەر ءۇيى. ايتا كەتۋ كەرەك, وقۋ ورنىنىڭ 1 600 ستۋدەنتى جاتاقحانامەن قامتاماسىز ەتىلگەن. جالپى ورىن سانى 2 200 بولاتىن 4 جاتاقحاناعا قالعان ستۋدەنتتەردى ورنالاستىرۋعا تولىق جاعدايىمىز جەتەدى. ال مىناۋ جاڭا عيماراتقا 100 پايىزداي ستۋدەنتتەر تولدى. سوندىقتان ۋنيۆەرسيتەتتە جاتاقحانا ماسەلەسى تولىعىمەن شەشىلگەن دەپ ايتۋعا بولادى. ستۋدەنتتەر تۇراتىن بۇل عيماراتتىڭ ەرەكشەلىگى, مۇندا ءار بولمەدە جۋىناتىن ورىن قاراستىرىلعان. بارلىق بولمەدە ءبىر-ءبىر كونديتسيونەردەن قويىلعان. Wi-Fi جەلىسى ىستەپ تۇر. ءوزىنىڭ جەكە كىتاپحاناسى بار. قورىتا ايتقاندا, بارلىق جاعداي جاسالعان. ستۋدەنتكە تەك بوس ۋاقىتىن ءتيىمدى وتكىزىپ, ءبىلىم الۋ عانا قالدى», دەدى پرورەكتور.
راسىندا, ستۋدەنتتەر, ماگيسترانتتار جانە دوكتورانتتارعا ارنالعان جاڭا جاتاقحانا قوناقۇي ۇلگىسىندە سالىنعان ەكەن. ۋنيۆەرسيتەت وكىلى ايتىپ وتكەندەي, ءار بولمەسى تۇرمىستىق تەحنيكالارمەن, جيھازدارمەن جابدىقتالعان. وقۋ زالىمەن بىرگە دەمالىس ايماعىندا شاعىن كينوتەاتر دا قاراستىرىلىپتى. ەڭ باستىسى, جاتاقحانا ۋنيۆەرسيتەتكە جاقىن ماڭدا ورنالاسقان. ول ستۋدەنتتەردىڭ ساباقتان سوڭ ۋاقىتىن جولعا شىعىنداماۋى ءۇشىن دە ماڭىزدى.
سالتاناتتى جيىندا پوليتسيا گەنەرال-مايورى جەڭىسباي سۇلتانوۆ پەن شىمكەنت قالالىق ارداگەرلەر ۇيىمىنىڭ توراعاسى كەنجەحان تولەباەۆ ءسوز سويلەپ, قۇتتىقتاۋ لەبىزدەرىن ارنادى.
«بۇگىنگى ۇرپاق باقىتتى. ويتكەنى قازىر ستۋدەنتتەر وسىنداي قوناقۇيگە بەرگىسىز جاتاقحانادا تۇرىپ جاتىر. ءبىزدىڭ كەزىمىزدە ول ارمان ەدى. سوندىقتان مەملەكەتتىڭ سەنىمىن اقتاپ, ادال ازامات بولىپ كەلەشەكتە ەلگە ەڭبەكتەرىڭدى سىڭىرەدى دەگەن سەنىمدەمىز. كورىپ وتىرمىز, ستۋدەنتتەرگە بارلىق جاعداي قاراستىرىلىپتى. ەندى تەك قالعانى وقۋ بولىپ تۇر. ەلدىڭ بولاشاعى سەندەرسىڭدەر, سول ءۇشىن جاقسى وقىپ, ءوز ماماندىقتارىڭنىڭ مىقتى يەسى بولۋعا شىن جۇرەكتەن تىلەكتەسپىن. وسى ورايدا عيماراتتى سالىپ, ستۋدەنتتەرگە تارتۋ ەتكەن كومپانياعا العىس بىلدىرەمىن. ارينە, جاتاقحانا ەمەس, باسقا ءبىر نىسان سالىپ پايدا تابۋعا دا بولادى. بىراق كاسىپكەر باتىربەك كوشەرباي باستاعان كومپانيا تەك تابىستى ويلاماي, جاس ۇرپاقتىڭ قامى ءۇشىن وسىنداي جاتاقحانا سالۋىمەن قالتالى ازاماتتارعا ۇلگىلى ءىس جاسادى. توقسانىنشى جىلدارى قيىندىق كەزەڭى بولدى. ءبىر قوعامنان ەكىنشى قوعامعا ءوتۋ ەل ءۇشىن وڭايعا سوقپادى. نەبىر سوقپاقتارمەن جۇرۋگە تۋرا كەلدى. الايدا اعا ۇرپاق ەڭبەگىنىڭ ارقاسىندا سونىڭ ءبارىن ەڭسەرىپ شىقتى. ەندىگى مىندەت سول جولدى جالعاستىرىپ, ەلدىڭ كوركەيۋىنە اياماي تەر توگۋ مىنا جاستاردىڭ موينىنا ارتىلعالى تۇر. سول جاۋاپكەرشىلىكتى زور سەنىممەن ارقالاپ وتەسىزدەر دەگەن ۇمىتتەمىن», دەدى ابىز اقساقال, پوليتسيا گەنەرال-مايورى ج.سۇلتانوۆ.
ال شىمكەنت قالالىق ارداگەرلەر ۇيىمىنىڭ توراعاسى ك.تولەباەۆ ءوز سوزىندە جاتاقحانا ماسەلەسىن پرەزيدەنت تاپسىرماسىنا سايكەس وسىلاي مەملەكەتتىك-جەكەمەنشىك سەرىكتەستىگى اياسىندا تۇبەگەيلى شەشىپ تاستاۋعا بولاتىنىن مالىمدەدى.
«بۇرىن ستۋدەنتتەردىڭ جاتاقحانادا جاتۋى سيرەك ەدى. كوپشىلىگى كۋرستاستارمەن بىرىگىپ پاتەر جالداپ تۇراتىن نەمەسە تۋما-تۋىستى جاعالايتىن. بۇل جاعداي بەرتىنگە شەيىن ورىن الىپ كەلدى. ەندى قازىر احۋال كىشكەنە وزگەرە باستادى. جاتاقحانالار بوي كوتەرىپ ستۋدەنتتەر قىمبات پاتەر جالداۋ اۋىرتاپىلىعىنان قۇتىلا باستادى. سول ءۇشىن دە بۇگىنگى تاڭدا ەلىمىزدە جۇرگىزىلىپ جاتقان الەۋمەتتىك قامسىزداندىرۋ, ءبىلىم سالاسىنداعى وڭدى رەفورمالاردىڭ ءساتتى جۇزەگە اسىرىلىپ جاتقانىنا وتە ريزامىز. ءسوزىمدى ستۋدەنتتەرگە وسى قامقورلىقتى باعالاپ, ەل ءۇمىتىن اقتاي بىلىڭدەر دەگەن تىلەكپەن اياقتاعىم كەلەدى», دەدى مەگاپوليس ارداگەرلەرىنىڭ جەتەكشىسى ك.تولەباەۆ.
سونداي-اق عيماراتتىڭ اشىلۋ راسىمىندە ءسوز العان «SUNRISE CY» جشس ديرەكتورى بەكسۇلتان ءۇسىپالى مەن قۇرىلىس جوباسىنىڭ جەتەكشىسى بەكسۇلتان باتىربەك ستۋدەنتتەردىڭ جانارىنداعى شاتتىقتى كورىپ قۋانعانىن, الداعى ۋاقىتتا دا الەۋمەتتىك ماڭىزدى نىسانداردى سالۋ بويىنشا مەملەكەتتىك-جەكەمەنشىك سەرىكتەستىگى اياسىندا جۇمىستارىن كۇشەيتە بەرەتىندەرىن جەتكىزدى.
سونىمەن, جوعارىدا ايتىپ وتكەنىمىزدەي, م.اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ جاڭا جاتاقحاناسى – مەملەكەتتىك-جەكەمەنشىك ارىپتەستىك اياسىندا پايدالانۋعا بەرىلگەن ءتورتىنشى جاتاقحانا. ايتا كەتۋ كەرەك, رەسپۋبليكانىڭ ءۇشىنشى مەگاپوليسى ەلىمىزدەگى جاستار سانى ەڭ كوپ وڭىرلەردىڭ قاتارىنا كىرەدى. سونداي-اق شاھاردا ءبىلىم ساپاسى بويىنشا جوعارى رەيتينگتىڭ تىزىمىندە تۇرعان ىرگەلى ۋنيۆەرسيتتەر بارشىلىق. ول جەردە بۇگىندە مىڭداعان ستۋدەنت ءبىلىم الىپ جاتىر. سوندىقتان جاتاقحانا ماسەلەسى قوعامنىڭ الەۋمەتتىك سالاسىندا ءبىرىنشى كەزەككە كوتەرىلۋى – زاڭدى قۇبىلىس. دەيتۇرعانمەن ەلىمىزدە قولعا الىنعان مەملەكەتتىك-جەكەمەنشىك ارىپتەستىگى بۇل ماسەلەنى بۇگىندە وڭتايلى شەشىپ جاتقانىن كورىپ وتىرمىز.
