سۋرەت: ortcom.kz
سەربيا – ەلىمىزدىڭ وڭتۇستىك-شىعىس ەۋروپاداعى ماڭىزدى ساۋدا سەرىكتەسى.
«بىزدە ساۋدا ىنتىماقتاستىعىنىڭ ۇلكەن الەۋەتى بار. سەربياعا $500 ملن-نان استام سوماعا شيكىزاتتىق ەمەس تاۋارلاردىڭ 90-نان استام ءتۇرىن جەتكىزۋدى ۇسىنۋعا دايىنبىز. بۇل – مەتاللۋرگيا, مۇناي-حيميا, تاماق, حيميا, ماشينا جاساۋ سالالارىنىڭ ونىمدەرى, كولىك قۇرالدارى, قۇرىلىس تاۋارلارى. وعان بارلىق وندىرىستىك جانە كولىكتىك-لوگيستيكالىق مۇمكىندىكتەر بار», دەدى سەرىك جۇمانعارين وتىرىسقا قاتىسۋشىلارعا.
ءوز تاراپىنان سەربيا پرەمەر-ءمينيسترىنىڭ ورىنباسارى – ىشكى ىستەر ءمينيسترى يۆيتسا داچيچ ەلدەر اراسىنداعى ساۋدا-ەكونوميكالىق ارىپتەستىكتى تەرەڭدەتۋگە مۇددەلىلىك ءبىلدىرىپ, ۇكىمەتارالىق كوميسسيانىڭ III وتىرىسى جاڭا بىرلەسكەن جوبالاردى قۇرۋعا ەلەۋلى قادام بولاتىنىن اتاپ ءوتتى.
اۋىل شارۋاشىلىعى ۆيتسە-ءمينيسترى امانعالي بەردالين قازاقستان سەربياعا بۇرشاق, پياز, قاراقۇمىق, جارما جانە بيداي ەكسپورتىن ۇلعايتۋعا دايىن ەكەنىن اتاپ ءوتتى. مال شارۋاشىلىعى سالاسىندا بالىق جانە بالىق ونىمدەرىن, بال, قۇس ەتى, جىلقى ەتى, سيىر ەتى جانە ءسۇت ونىمدەرىن جەتكىزۋ مۇمكىندىكتەرىنەن بولەك, ەلىمىز شوشقا ەتiن جەتكىزۋدى قاراستىرۋى مۇمكىن. سونىمەن قاتار جاڭا ءسۇت-تاۋار فەرمالارىنىڭ قۇرىلىسىن ەسكەرە وتىرىپ, ەلىمىز سەربيادان اسىل تۇقىمدى سيىرلار مەن اسىل تۇقىمدى ماتەريالداردى يمپورتتاۋعا مۇددەلى.
وتىرىس كۇن تارتىبىندەگى ماڭىزدى ماسەلە كولىك سالاسى بولدى. قازاقستان پرەمەر-ءمينيسترىنىڭ ورىنباسارى اتاپ وتكەندەي, قازاقستان مەن سەربيا اراسىنداعى قولدانىستاعى قۇقىقتىق بازا ەلدەرىمىز اراسىندا اپتاسىنا 14 جولاۋشى رەيسىن ورىنداۋعا مۇمكىندىك بەرەدى.
«قازاقستان اۋەجايلارىندا «اشىق اسپان» رەجىمى جۇمىس ىستەيدى. ءبىزدىڭ ەلدەرىمىز اراسىندا تىكەلەي رەيستەردىڭ اشىلۋى سەربيانىڭ ەۋروپاعا كولىك حابى بولۋىنا مۇمكىندىك بەرەدى. سونداي-اق ءبىز قازاقستان مەن قىتايدان سەربياعا جانە ودان ءارى ەۋروپا ەلدەرىنە جۇك تاسىمالىن ءترانزيتتى دامىتۋعا مۇددەلىمىز. وسى ماقساتتا ترانسكاسپي حالىقارالىق كولىك مارشرۋتىنىڭ مۇمكىندىكتەرىن قاراستىرۋدى ۇسىنامىز», دەدى سەرىك جۇمانعارين.
سەربيادا EXPO-2027 كورمەسىن وتكىزۋ قارساڭىندا ۇكىمەتارالىق كوميسسيانىڭ وتىرىسىندا حالىقارالىق كورمەلەر بيۋروسى تاريحتاعى ەڭ تابىستى مامانداندىرىلعان كورمە رەتىندە تانىلعان EXPO-2017 كورمەسىن وتكىزۋدىڭ قازاقستاندىق تاجىريبەسى تانىستىرىلدى. سونىمەن قاتار تاراپتار جۇمىسپەن قامتۋ, عىلىم, ءبىلىم, تۋريزم, دەنساۋلىق ساقتاۋ, مادەنيەت جانە سپورت سالاسىنداعى ىنتىماقتاستىق مۇمكىندىكتەرىن تالقىلادى.
2023 جىلدىڭ قورىتىندىسى بويىنشا ەلىمىزدىڭ سەربيامەن تاۋار اينالىمى $91,2 ملن قۇرادى, بۇل وتكەن جىلدىڭ سايكەس كەزەڭىمەن سالىستىرعاندا 23,3%-عا جوعارى ($74,8 ملن). ەكسپورت 38,7%-عا ءوستى. جالپى, تاۋار اينالىمىندا قازاقستان مەن سەربيا اراسىنداعى اۋىل شارۋاشىلىعى ءونىمى ساۋداسىنىڭ ۇلەسى شامامەن 22,7 ملن قۇرادى. يمپورتتىڭ نەگىزگى كولەمى – جۇگەرى, كۇنباعىس تۇقىمدارى, ءتىرى وسىمدىكتەر. ەكسپورتتىڭ نەگىزگى كولەمى – قاراقۇمىق, تارى جانە باسقا دا ءداندى داقىلدار.
