سۋرەت: primeminister.kz
پرەمەر-مينيستر ولجاس بەكتەنوۆ ەۋرازيالىق دامۋ بانكىنىڭ باسقارما توراعاسى نيكولاي پودگۋزوۆپەن كەزدەسۋ وتكىزدى. ينۆەستيتسيالىق ءوزارا ءىس-قيمىلدى كەڭەيتۋ جانە ەادب-نىڭ ينفراقۇرىلىمدىق جوبالاردى ىسكە اسىرۋعا قاتىسۋ ماسەلەلەرى قارالدى.
ولجاس بەكتەنوۆ پەن نيكولاي پودگۋزوۆ ەۋرازيالىق دامۋ بانكىنىڭ ەلىمىزدەگى جوعارى ينۆەستيتسيالىق بەلسەندىلىگىن اتاپ ءوتتى. جىل باسىنان بەرى ەادب 900 ملن دوللاردان اساتىن سوماعا ەكونوميكانىڭ ءتۇرلى سەكتورىنداعى جوبالاردى قارجىلاندىردى. سونىمەن قاتار 2023 جىلى ەلىمىزگە 1 ملرد دوللار قاراجات سالىندى. وسى جىلدىڭ قورىتىندىسى بويىنشا ينۆەستيتسيا كولەمى ەداۋىر ارتىپ, 1,4–1,6 ملرد دوللارعا جەتەدى دەپ كۇتىلۋدە.
ەلىمىزدە ىسكە اسىرىلىپ جاتقان ەادب نەگىزگى جوبالارىنىڭ تىزبەسىندە – كومىر ءوندىرۋدىڭ تسيكلدىك-اعىندىق تەحنولوگياسىن ەنگىزۋ, كۇن ەلەكتر ستانسالارىن سالۋ, «استراحان – ماڭعىشلاق» ماگيسترالدى سۋ قۇبىرىن رەكونسترۋكتسيالاۋ جانە كەڭەيتۋ, اۆتوجولداردى سالۋ جانە رەكونسترۋكتسيالاۋ جوبالارى بار.
ولجاس بەكتەنوۆ ەۋرازيالىق دامۋ بانكى ماڭىزدى سەرىكتەستەردىڭ جانە ينۆەستيتسيالاردىڭ سەنىمدى كوزدەرىنىڭ ءبىرى بولىپ سانالاتىنىن اتاپ ءوتتى.
«مەملەكەت باسشىسى حالىققا جولداۋىندا ءبىرىنشى كەزەكتەگى ينفراقۇرىلىمدىق ماسەلەلەردى شەشۋ مىندەتتەرىن اتاپ ءوتتى. قازىر ۇكىمەت ينجەنەرلىك, كولىك, الەۋمەتتىك جانە تسيفرلىق ينفراقۇرىلىمدى جاڭعىرتۋ جانە سالۋ بويىنشا اۋقىمدى جۇمىس جۇرگىزىپ جاتىر. ءبىز بانكپەن ءوزارا ءتيىمدى شارتتارمەن ىنتىماقتاستىقتى كەڭەيتۋگە دايىنبىز جانە ەل ەكونوميكاسى ءۇشىن ماڭىزدى جوبالاردى بىرلەسىپ ىسكە اسىرۋعا مۇددەلىمىز», دەپ اتاپ ءوتتى و.بەكتەنوۆ.
ءوز كەزەگىندە ەادب توراعاسى نيكولاي پودگۋزوۆ بانكتىڭ ءىرى ينۆەستيتسيالىق جوبالاردى جۇزەگە اسىرۋداعى ءوزارا ءىس-قيمىلدى نىعايتۋعا دايىن ەكەنىن مالىمدەدى.
سونداي-اق تاراپتار بانكتىڭ اعىمداعى ينۆەستيتسيالىق پورتفەلى, كاپيتال قۇرىلىمىن ءارتاراپتاندىرۋ, كورپوراتيۆتىك باسقارۋ ساپاسىن ارتتىرۋ ماسەلەلەرىن تالقىلادى.
ايتا كەتۋ كەرەك, ەۋرازيالىق دامۋ بانكى – 2006 جىلى قۇرىلعان حالىقارالىق قارجى ۇيىمى. بانكتىڭ جارعىلىق كاپيتالى 7 ملرد دوللاردى قۇرايدى. اعىمداعى ينۆەستيتسيالىق پورتفەلدىڭ سالالىق قۇرىلىمى: ەنەرگەتيكا – 21,7%, كولىك – 18,1%, تاۋ-كەن ونەركاسىبى – 27,5%, قارجى سەكتورى – 9,2%, ينفراقۇرىلىم – 5,8%, ماشينا جاساۋ – 2,8%, اگروونەركاسىپ كەشەنى – 3,3%, حيميا ونەركاسىبى – 7,3%, قۇرىلىس – 1,1%% , باسقا سالالار 3,2%-دى قۇرايدى.
