وبلىستىق دەنە شىنىقتىرۋ, سپورت جانە ءتۋريزمدى دامىتۋ باسقارماسى باسشىسىنىڭ مىندەتىن اتقارۋشى نۇرجاۋعان تولەۋوۆانىڭ ايتۋىنشا, 20 جاستاعى پالۋان نۇرجان سارسەنعاليەۆ الىش كۇرەسىنەن ەل چەمپيوناتىندا باق سىناپ, ءوز سالماعىندا جەڭىمپاز اتانعان. ال قۇسبەگىلىكتەن سپورت شەبەرى ارمان قوشقاروۆ ءبىراز جىلدان بەرى ساياتشىلىقتى سەرىك ەتىپ كەلەدى. ونىڭ دا ەنشىسىندە قازاقستان چەمپيوناتىنىڭ جەڭىمپازى جۇلدەسى بار. ءۇشىنشى سپورتشى – مارات بەكسۇلتان ۇلى. ءداستۇرلى ساداق اتۋدان ەل چەمپيوناتى مەن بىرنەشە حالىقارالىق تۋرنيردە توپ جارعان سپورتشى سپورت شەبەرى اتاعىن يەلەنگەن.
«كوشپەلىلەر ويىندارىنا اتىراۋ وڭىرىنەن 3 كيىز ءۇي تىگىلەدى. كيىز ءۇيدىڭ بىرىنە جەرگىلىكتى مۇراجايدىڭ جادىگەرلەرى قويىلادى. ال ەكىنشى ۇيدە ۇلتتىق سالت-ءداستۇر تانىستىرىلادى. ءۇشىنشى كيىز ۇيدە ايماق تۋريزمىنە قاتىستى مالىمەتتەر كوپشىلىك نازارىنا ۇسىنىلادى», دەيدى ن.تولەۋوۆا.
ونىڭ دەرەگىنە سۇيەنسەك, اتىراۋلىق سپورتشىلار بۇدان بۇرىن وتكەن دۇنيەجۇزىلىك كوشپەلىلەر ويىندارىندا جۇلدەلى ورىنداردى يەلەنىپ ءجۇر. ماسەلەن, 2016 جىلعى ءىى دۇنيەجۇزىلىك كوشپەلىلەر ويىندارىندا سۇڭعات زاكارياەۆ قازاق كۇرەسىنەن التىن, ارمان قاليەۆ كۇمىس مەدالعا ورىنعا يە بولعان. ال 2018 جىلى ارمان قاليەۆ قىرعىز كۇرەسىنەن كۇمىس, ابىلاي اماندىق تۇركىمەن كۇرەسىنەن, قايىپقان اقجول الىش كۇرەسىنەن قولا جۇلدەنى قاناعات تۇتىپتى.
ەندى مىنە, استانادا باستالاتىن V دۇنيەجۇزىلىك كوشپەلىلەر ويىندارىنا 100-گە جۋىق ساداقشى قاتىسادى. سولاردىڭ قاتارىندا اتىراۋلىق سپورتشى, ساداق اتۋدان سپورت شەبەرى مارات بەكسۇلتان ۇلى ەل نامىسىن قورعاۋعا بەكىنىپ وتىر. ءبىر قىزىعى, ونىڭ ماماندىعى – زاڭگەر. ءبىراز جىل مەملەكەتتىك قىزمەتتە جۇمىس ىستەپ, لاۋازىمدىق قىزمەت اتقارعان. بىراق 4 جىلدان بەرى جەكە شارۋاشىلىقپەن اينالىسۋعا بەت بۇرعان ەكەن. قازىر اتىراۋلىقتارعا داستۇرلىك, ساداق اتۋدى ۇيرەتىپ ءجۇر.
«حالقىمىزدىڭ كوشپەلىلەرگە ءتان ۇلتتىق ونەرى كوپ. ءداستۇرلى ءان, كۇي مەكتەبى قالىپتاسقان. باعزى داۋىردە اڭ اۋلاۋعا شىققان بابالارىمىزدىڭ بارىندە بىردەي بەرەن مىلتىق بولماعان شىعار. وسى تۇرعىدان ايتقاندا, ساداق اتۋدى سول بابالاردان قالعان اسىل مۇراعا جاتقىزۋعا بولادى. ال ونى جاس ۇرپاققا كەڭىنەن ناسيحاتتاپ ءجۇرمىز بە؟ وسى ساۋال توڭىرەگىندە ويلانىپ, «بۇل ءىستى نەگە قولعا الماسقا؟» دەگەن توقتامعا كەلدىم. الايدا اتىراۋدان ساداق اتۋدىڭ قىر-سىرىن ۇيرەتۋدى قولعا العان ۇيىرمە تاپپادىم. سول سەبەپتەن ءوزىم ساداق اتۋدى ۇيرەتەتىن ساباقتى ينتەرنەت جەلىسىنەن تاۋىپ الدىم. سول ارقىلى ساداق اتۋدى مەڭگەردىم», دەيدى مارات بەكسۇلتان ۇلى.
سپورتشىنىڭ باستى ماقساتى – ءداستۇرلى ساداق اتۋدى ناسيحاتتاۋ. اسىرەسە جاس بۋىننىڭ وسى سپورتقا ىنتاسىن وياتىپ جۇرگەن سپورتشىنىڭ ايتۋىنشا, قازىر ساداق اتۋ مەكتەبى قالىپتاسا باستاعان.
«ساداق اتۋمەن اينالىسۋدىڭ پايداسى وتە كوپ. الدىمەن بۇل – ادامنىڭ رۋحاني جەتىلۋىنە, فيزيكالىق دامۋىنا وڭ اسەر ەتەتىن ونەر ءارى سپورت. ەكىنشىدەن, جاس بۋىننىڭ مىنەز-قۇلقىنىڭ سالماقتى بولۋىنا ىقپالىن تيگىزەدى. ساداق اتۋدى مەڭگەرگەن جاستاردىڭ مىنەزى بايسالدى بولادى. ويتكەنى ساداقشىعا بايسالدىلىق اۋاداي قاجەت. بۇل سپورتتا اشۋعا بوي الدىرىپ, اسىعىس ارەكەتپەن جەڭىسكە جەتۋ مۇمكىن ەمەس. ۇشىنشىدەن, ساداق اتقان ادامنىڭ ەپتىلىگى, شەبەرلىگى جەتىلەدى», دەيدى مارات.
قازىر ول «باتۋحان جەبەسى» فەدەراتسياسىنىڭ جۇمىسىن جانداندىرۋعا جۇمىستانىپ ءجۇر. بيىل جەرگىلىكتى بيۋدجەتتەن قارجى بولىنە باستاپتى. ءوزىنىڭ 40-قا جۋىق شاكىرتى بار.
«كەيىنگى 4-5 جىلدا اتىراۋ وبلىسىندا ءداستۇرلى ساداق اتۋعا نيەت بىلدىرگەندەر سانى 100-گە جۋىقتادى. ولاردىڭ اراسىندا 7 جاسار بالا دا, جاسى 60-تى القىمداعان ۇلكەندەر دە بار. ەل قۇراماسىنا ءبىزدىڭ وڭىردەن مەنىمەن بىرگە باۋىرجان اقتاەۆ, ءالي سەسيگۇزەل, ءمادينا بيسەمبيەۆا الىندى. ءبارىمىز دە ىرىكتەۋ سايىسىنا قاتىستىق. سول سايىستا مەن V دۇنيەجۇزىلىك كوشپەلىلەر ويىندارىنىڭ جولداماسىنا يە بولدىم. ەندى ءدۇبىرلى دودادا ەلدىڭ نامىسىن قورعاپ, جاقسى ناتيجە كورسەتۋگە بارىمدى سالام», دەيدى م.بەكسۇلتان ۇلى.
اتىراۋ وبلىسى
