ۇلتتىق ۇلان اسكەري جاساعى ەلوردانىڭ الماتى اۋدانىندا قوعامدىق ءتارتىپتى قاداعالاۋ كەزىندە ەسىرتكى زاتىن تاپتى. ساربازدار ەلەكترلىك تاسپامەن ورالعان ورامانى الۋعا تالپىنعان كۇدىكتىنى بىردەن بايقاعان. اسكەري جاساق باستىعى, قاتارداعى جاۋىنگەر نۇرتاي ايتباي, پاترۋلدەۋشى ساربازدار سانات تۇرعىمباەۆ پەن ماۋلەت جانىمحان بۇل تۋرالى بايلانىس قۇرالدارى ارقىلى دەرەۋ كەزەكشىگە باياندايدى.
«ەر ادام ءبىزدى كورگەندە, ونىڭ مىنەز-قۇلقى بىردەن وزگەرىپ, ارەكەتى كۇدىك تۋدىردى. ءبىز قۇجاتتارىن سۇرادىق. سىرتتاي تەكسەرۋ كەزىندە پوليتسەيلەر ازاماتتان قارا ءتۇستى, ەرەكشە ءيسى بار ۇنتاق پاكەتىن تاپتى. ءتارتىپ ساقشىلارى ءمان-جايدى ودان ءارى ناقتىلاۋ ءۇشىن ورامانى تاركىلەدى», دەيدى قاتارداعى جاۋىنگەر نۇرتاي ايتباي.
ۇستالعان ادام پوليتسيا بولىمىنە جەتكىزىلدى. سونداي-اق وسى كۇنى ساعات 21:30 شاماسىندا قالادا تاعى ءبىر وقىس وقيعا بولدى. كەلەسى ءبىر اسكەري جاساق باستىعى, قاتارداعى نۇرباق قالابەك, ونىڭ قاراماعىنداعى پاترۋلشىلەر الماس بەكسەيىت پەن بەكسۇلتان ەسەننەن قالا تۇرعىنى 6 جاسار بالاسىن تاۋىپ بەرۋلەرىن ءوتىنىپ, كومەك سۇرايدى.
اسكەري جاساق بىردەن بالانىڭ بولجامدى مالىمەتتەرىن پاترۋلدىك توپ باستىعىنا حابارلايدى. سودان كەيىن ۇلاندىقتار جاقىن ماڭداعى پاترۋلدىك باعىتتاردا شۇعىل ىزدەۋ شارالارىن ۇيىمداستىرادى. اسكەري قىزمەتشىلەردىڭ جەدەل جانە ۇيلەسىمدى ارەكەتتەرىنىڭ ناتيجەسىندە جوعالعان بالا امان-ەسەن تابىلىپ, اناسىنا قايتارىلدى. ۇلتتىق ۇلان جاۋىنگەرلەرىنە ىزدەۋدى جەدەل ۇيىمداستىرعانى جانە كاسىبي كومەكتەرى ءۇشىن العىس ايتقان بالانىڭ اناسى العىسىن ءبىلدىرىپ, ساربازدارعا ساۋلىق تىلەدى.
