وسىعان بايلانىستى وبلىستىق ونكولوگيا ديسپانسەرىندە وكپەنىڭ قاتەرلى ىسىگىن ەرتە دياگنوستيكالاۋ اشىق ەسىك كۇنى ءوتتى. ديسپانسەردىڭ دارىگەرى گاۋحار قاريشوۆانىڭ دەرەگىنە سۇيەنسەك, بۇل اۋرۋعا 40 جاستان اسقان تۇرعىندار شالدىعادى.
«اشىق ەسىك كۇندەرىن وتكىزۋدىڭ ماقساتى – تۇرعىنداردى قاتەرلى ىسىكتەردىڭ قاۋپى مەن دامۋ فاكتورلارى, ەرتە دياگنوستيكالاۋ مۇمكىندىكتەرى, اسىرەسە وكپە وبىرىن ەرتە انىقتاۋدىڭ ماڭىزى تۋرالى حاباردار ەتۋ. ستاتيستيكاعا سايكەس بىلتىر اتىراۋ وبلىسىندا 59 ادامنان وكپەنىڭ قاتەرلى ىسىگى انىقتالعان ەدى. ال بيىل جەتى ايدا بۇل اۋرۋعا شالدىققان ناۋقاستار سانى 72 ادامعا جەتتى», دەيدى گ.قاريشوۆا.
ونىڭ ايتۋىنشا, وكپە وبىرىنىڭ بىرنەشە بەلگىسى بار. العاشقىدا ۇزاق مەرزىمگە سوزىلاتىن جوتەلمەن باستالادى.
«جوتەل الدىمەن قۇرعاق كۇيىندە بولادى. سودان كەيىن بىرتىندەپ قاقىرىق تۇسەدى. كەيدە قان ارالاسقان قاقىرىق بولۋى مۇمكىن. وسىنداي بەلگى بايقالعان ادام دەر كەزىندە ەم قابىلداماسا, قاقىرىق ىرىڭگە اينالادى. ناۋقاستىڭ دەنە تەمپەراتۋراسى كوتەرىلىپ, وعان السىزدىك پەن ەنتىگۋ قوسىلادى. كەيىن قاتەرلى ىسىك پنەۆمونياسىنا ۇلاسادى. ال اسقىنۋ ۇدەگەن سايىن داۋىس قارلىعىپ, جۇرەگى نەمەسە قولىندا اۋىرسىنۋ بايقالادى. بەتى كوگەرىپ, ىسىنەدى. موينىندا, قولى مەن كەۋدە قۋىسىنىڭ تامىرلارىندا ىسىك پايدا بولادى», دەدى گ.قاريشوۆا.
وڭىردەگى ايەلدەر اراسىندا جاتىر موينى وبىرىنا شالدىققاندار دا بار. وبلىستىق ونكولوگيا ديسپانسەرىنىڭ ونكو-گينەكولوگى جادىرا قۇداباەۆانىڭ ايتۋىنشا, قازىر وسىنداي سىرقاتپەن 560 ايەل ەسەپتە تۇر. بىلتىر اتالعان اۋرۋ سالدارىنان 24 ايەل قايتىس بولعان. بيىل 6 ايدا جاتىر موينى سىرقاتىنا 56 ايەل شالدىققان.
«جاتىر موينى وبىرىنان ساقتانۋدىڭ نەگىزگى جولى – ادام پاپيللوما ۆيرۋسىنا قارسى ەكپە الۋ. دۇنيەجۇزىلىك عالىمداردىڭ زەرتتەۋىنە سۇيەنسەك, قاتەرلى ىسىكتى تۋدىرۋشى ۆيرۋس ادام پاپپيلوماسى ەكەنى دالەلدەنگەن. وسىعان بايلانىستى اتىراۋ وبلىسىندا 2012–2013 جىلدارى بۇل ەكپە قاناتقاقتى جوبا رەتىندە ىسكە اسىرىلدى. سول كەزدە ەكپە العانداردان اتالعان اۋرۋدىڭ بەلگىلەرى انىقتالمادى. سوندىقتان بيىل ۆاكتسينانى قايتا ەگۋ جوسپارعا ەنگىزىلدى. ەكپە سالۋ وقۋشى قىزدارعا اتا-اناسىنىڭ رۇقساتىمەن عانا جۇرگىزىلەدى», دەپ حابارلادى ج.قۇداباەۆا.
اتىراۋ وبلىسى
