كوپ ۇزاماي ەلدە ەنەرگيا تاپشىلىعى ورىن الاتىنى بارشاعا ءمالىم. ويتكەنى بىزدەگى ەلەكتر ەنەرگياسىنىڭ 70%-ى كومىر ستانسالارىندا وندىرىلەدى. ولاردىڭ توزۋ دەڭگەيى وتە جوعارى. ستانسالاردىڭ كەيبىرى الداعى 10 جىل ىشىندە پايدالانۋدان شىعارىلۋى ىقتيمال. جوسپارعا سايكەس, الداعى ونجىلدىقتا 26 مىڭ مۆت قۋاتتىلىعى بار ستانسالار ىسكە قوسىلادى. ارينە, ونىڭ ىشىندە قولدانىستاعى ستانسالاردى جاڭارتۋ جۇمىستارى دا بار. جاڭا ستانسالاردى سالۋ دا كوزدەلگەن. بۇل تۋرالى جاۋاپتى ورگان قىزمەتكەرلەرى نەشە رەت قايتارا ايتتى. دەسەك تە, اەس-ءتىڭ ورنى بولەك. ونى مەملەكەت باسشىسى قاسىم-جومارت كەمەل ۇلى جاقسى ايتتى. ەل ەكونوميكاسى كۇن وتكەن سايىن مول ەنەرگيانى قاجەت ەتىپ جاتقانىن ايتا كەلىپ, مۇنداي سۇرانىستى اتوم ەنەرگەتيكاسى قامتاماسىز ەتە الاتىنىن ۇقتىردى.
ء«بىز ەلىمىزدىڭ وزىنە ءتان ەرەكشەلىگىن جانە ۇزاق مەرزىمگە ارنالعان ۇلتتىق مۇددەلەرىمىزدى ەسكەرە وتىرىپ, تەك العا قاراي ءجۇرۋىمىز قاجەت. ءبىر سوزبەن ايتساق, بولاشاقتى ويلاۋىمىز كەرەك. سوندىقتان مەن اتوم ەلەكتر ستانساسىن سالۋعا قاتىستى بارىنشا بايىپتى شەشىم قابىلداۋ قاجەتتىگىن ۇدايى ايتىپ كەلەمىن», دەگەن مەملەكەت باسشىسى الداعى رەفەرەندۋمدا حالىقتى بايىپتى شەشىم قابىلداۋعا شاقىردى.
بۇل بىرەر جىلدىڭ ەمەس, حالىقتىڭ الداعى جۇزدەگەن جىلدىق جاعدايىن باعامداپ ايتقان ۇسىنىس-پىكىردى ءبىز «قازاقستاننىڭ ازاماتتىق اليانسى» ءبىر اۋىزدان قولدايمىز. ويتكەنى ەلدىڭ 20 ءوڭىرى مەن باستى قالالارىندا اەس-كە قاتىستى وتكەرگەن ءىس-شارالاردا حالىقتىڭ بايىپتى تاڭداۋ جاساي الاتىنىنا كوزىمىز جەتتى.
بانۋ نۇرعازيەۆا,
«قازاقستاننىڭ ازاماتتىق اليانسىنىڭ» پرەزيدەنتى
